Kirisi In Loningi Kiidi
2
1 Ang di natuk yo lok pang mai san nga,
awodo betanga i pang,
a be nen ngan kayei noonoo be.
Bong kumata tool sa be iyei noonoo nga,
ngan idi nga tool kiidi atu ke be iwetewete pang Tamada a ilonidi ye betebetanga kiidi.
Ngan ya la Yesu Kirisi i,
inbe ya taleu in la Tool Noonoonoo ke Maro i.
2 Inbe ya in iraia tinini le imot inbe tiraumate a be nen ngan Maro iyemenai idi ye noonoo yo kiidi,
ngan be.
Ngan ye yo iyei nen nga,
ngan be nen a Maro igiri noonoo kiidi le ipa ye noonoo kidi tooltool ke ni mai i le imot lapau.
3 Nen le kumata be tatoo betanga ke Maro yo lono be tatoo nga,
ngan la be ipatnai idi ben idi nga lod galanga moolmool ye nga.
4 Inbe tool yo iwete nen,
“Au i lok galanga moolmool ye,”
bong be itoo betanga yo Maro lono be tatoo ngan tiap nga,
ngan ya in tool ke kaplungunu,
inbe betanga moolmool ke Maro sa iken lono tiap.
5 Bong kumata tool atu be itoo betanga ke Maro nga,
ngan tool tani in la lono pang Maro mai san moolmool i.
Le dada yo be lod galanga ben Maro iyepe yidi i,
in nen:
6 Kumata sei tool iwete be Maro iyepe ye i,
in ole ipa le dawa ben Yesu ipa nga.
7 Ang di tooltool kiau nga,
ngan betanga yo awode pang be katoo i,
in betanga paunu tiap.
Bong i betanga gurunu tani yo kakauu kulkulunu yege ye kene yo katara lomim medana pang Kirisi ye i.
Le betanga gurunu tani i,
in betanga tani la kalonga koot i.
8 Bong betanga yo nookoot awode pang i,
in paunu lapau,
yesoo betanga tani in kanono pombe ye Kirisi le nookoot nga kanono pombe yang lapau.
Nen le idi nga lod galanga be betanga tina ngan moolmool,
yesoo todo i nga be imot,
inbe sul moolmool in ilolo oo.
9 Le kumata tool sa iwete be ya in iyepe ye sul loloana,
bong be lono dook tiap pang ene san yo itara lono medana pang Kirisi in nga,
ngan tool tani in dada dook tiap ki ngan ipaposi ben ya in ngan iyepe todo lono go.
10 Nen le kumata tool sa be lono pang ene atu yo itara lono medana pang Kirisi in mai san nga,
ngan ya in iyepe ye sul loloana.
Le sul loloana tani yo iyepe ye i,
in so sa yo be iyeii a ikapsap ye noonoo,
ngan tiap.
11 Bong sei tool be lono dook tiap pang ene san nga,
ngan ya in iyepe todo lono,
inbe ipa todo lono le lon galanga ye ni yo be ipa pang ye in tiap,
yesoo todo iyakala matana.
12 Ang di natuk nga,
ngan awodo rau i pang,
yesoo noonoo kiang ngan Maro igiri ye gurana ke Kirisi,
inbe ye urata yo iyeii i.
13 Ang di tamak nga,
ngan awodo rau i pang,
yesoo ang ngan lomim galanga moolmool ye tool yo iyepe mukot ye kene yo Maro itar lang le tana tiao nga.
Ang di tamoto yo tinimim paunu nga,
ngan awodo rau i pang,
yesoo ang ngan kalloso tool dook tiap yo Satan i.
Ang di natuk yo lok pang mai san nga,
ngan awodo rau i pang,
yesoo ang ngan lomim galanga moolmool ye Tamada.
14 Ang di tamak nga,
ngan awodo rau i pang,
yesoo ang ngan lomim galanga moolmool ye tool tani yo iyepe mukot yege ye kene yo Maro itar lang le tana tiao nga.
Ang di tamoto yo tinimim paunu nga,
ngan awodo rau i pang,
yesoo ang ngan kakodo le kamede ye lomim medana yo kataru i,
inbe betanga ke Maro iken lomim le imede
le ang ngan kalloso tool dook tiap yo Satan i.
Kin Lomim Mai San Pang So Yo Ke Tana I Nga Be
15 Awete pang nen,
kin katara lomim le mai san pang dada yo ke tana i le ipa ye so ki nga le imot ngan be.
Ngan kumata le tool sa be lono pang so ke tana i mai san nga,
ngan tool tani in lono pang Tamada mai san tiap.
16 Le dada dook tiap tina le imot yo ke tana i nga,
ngan la dada ke be di tooltool tiyei so dook tiap yo lodi be tiyei a lodi ponana ye nga,
inbe matadi gorengana ye so kidi diedi,
inbe di tapdi tipayit di ye so yo tiyei nga.
Ngan dada yo nen nga,
ngan ipa ye Tamada tiap,
bong so yo nen ngan so ke tana i leu.
17 Nen le tana i ipa ye di tooltool yo lodi be titoo dada dook tiap ki tina nga,
ngan ole tilledi le imot.
Bong tool yo iyei urata le itoo Maro lono i,
in ole ikaua yepongo dook mata yo taukan motingi i.
Koi Ke Kirisi In Pombe Oo
18 Ang di natuk nga,
lal yo be tana i imot ye i,
in iman potai oo.
Muku ngan amwete pang a kalongo ye koi ke Kirisi be ole pombe ye tana i.
Nen le nookoot nga di koi ke Kirisi alunu la pompombe koot nga.
Ngan nen le ole lod galanga nen,
lal yo be tana i imot ye i,
in o iman potai oo.
19 Di tooltool yo nen ngan muku ngan taye di tagaua,
motong la tikoo yidi a tila nga.
Le di ngan di tooltool kiidi moolmool tiap.
Kumata be di ngan di tooltool kiidi moolmool nga,
ngan matin nga le taye di tayepe.
Bong tiyegidi a tila le lod galanga nen,
di tooltool tina ngan sa yo tooltool kiidi moolmool ngan tiap.
20 Bong ang ngan,
Tool Tani Yo Maro Ipootoo Panga Ya Taunu I,
in imaia Maro Amunu Silene ilo lomim nen le ang le imot ngan lomim galanga ye betanga yo moolmool i.
21 Ngan ye yo awodo betanga nga pang nga,
yesoo o lok tar be ang ngan lomim galanga ye betanga moolmool i tiap,
ngan tiap.
Bong awodo betanga nga pang nga,
yesoo lomim galanga ye betanga moolmool,
inbe lomim galanga ye betanga yo ke kaplungunu ngan sa ipa ye betanga moolmool i,
ngan tiap.
22 Ngan tool ke kaplungunu in sei?
In tool tani yo iwete be Yesu in Kirisi tiap i.
Inbe tool yo nen i,
in koi ke Kirisi inbe ya in iwala murini pang Tamada iye Natunu.
23 Le sei tool be iwala murini pang Natunu nga,
ngan tool tani in iwala murini pang Tamana lapau.
Inbe sei tool be itara lono medana pang Yesu be ya in Maro Natunu nga,
ngan tool tani in itara lono medana pang Tamana lapau.
24 Nen le betanga tina yo kalongo kulkulunu ye kene yo katara lomim medana pang Kirisi ye in nga,
ngan kaparama le imede.
Ngan kumata le be kaparama le imede nga,
ngan o kayege dada ke Tamada iye Natunu tiap,
bong ole katoo le iken so.
25 Ngan Kirisi ipamede betanga paidi nen,
be ole ikaua yepongo dook mata yo taukan motingi i,
in paidi.
26 Au i yo a le awodo betanga tina ngan pang nga,
ngan be awete pang ye di tooltool tina yo tikapye be tillungang ye betanga kidi nga.
27 Bong ang ngan Kirisi imaia Maro Amunu Silene ilo lomim a kakauu le nookoot ngan iyepe yang.
Nen le Amunu Silene tani in ipatomonai ang ye so tina ngan le imot,
inbe so tina yo ipatomonai ang ye nga,
ngan moolmool le doko tiap.
Le kin kamalum pang tool sa mulu be ipatomonai ang ye patomonaingi san mulu,
ngan be.
Ngan nanga,
katoo patomonaingi ke Amunu Silene yo ipatomonai ang ye nga,
ngan la be kayege dada ke Kirisi tiap,
bong katoo le iken so nga.
Tayepe Ben Maro Di Natunu
28 Le ang di natuk nga,
kin katoo dada yo ke Kirisi nga le ikenen leu.
Ngan la be ye kene yo be pombe mallangana ye in nga,
ngan idi nga ole moomoodoo tiap,
bong ole takodo le tamede ye kene yo be takodo matana ye i.
29 Ngan nanga,
kumata le be lomim galanga nen be Kirisi in ya tool noonoonoo ke Maro nga,
ngan ole lomim galanga nen lapau,
be di tooltool le imot yo titoo dada noonoonoo nga,
ngan Maro di natunu.