2
1 Ang ngan kayei ben tooltool paunu mulu oo,
le be nen nga,
ngan kayege dada dook tiap le imot yo be kakap masngana pang di tooltool ye nga.
Inbe kakap lungunu ye di tooltool ye betanga be.
Inbe kin kallung di tooltool ye dada kiang yo kayei nga a nen ngan tiyitmak emim ye,
ngan be.
Inbe matamim gorengana ye so ke di diemim a lomim dook tiap pang di ye,
ngan be.
Inbe kawete mur ye di diemim a kagarung edi be lapau.
2 Ngan idi nga lod galanga nen,
tool kase paunu yo kooroonoo i,
in lono pang sui mai san.
Le gaongo leu ye ang ngan,
ole lomim pang sui yo ipa ye Maro Amunu Silene i.
Ngan sui ki tani in so dook tiap sa be iken ye,
ngan tiap.
Le kayinu,
a be nen ngan ipamedang be kayepe dook mata le lo Maro ikau ang a ipamulang ye so dook tiap yo be igarungang i.
3 Ang ngan kakamata ben Tool Mai in dook mata moolmool oo,
le kakaua betanga ki a katoo le ikenen leu.
Yesu In Dawa Ben Pat Yo Iyepe Matana Rrene I
4 Ang ngan kaman ye Tool Mai Yesu tani in oo.
Ngan ya in dawa ben pat yo iyepe matana rrene i.
Moolmool,
di tooltool ke tana tikamata ngan lodi panga tiap le tiwala muridi panga,
bong Maro ikamata ngan dook mata ye matana,
le ipootoo be iyei urata ki.
5 Inbe ang ngan lapau dawa ben pat yo iyepe matana rrene i.
Nen le Maro ire rumu ki ye pat tina yo ang ngan,
a be nen ngan Amunu Silene iyepe ye.
Ngan nen le ang ngan ole kayepe le taukamim busunu ye matana,
inbe ang ngan ole dawa ben di tooltool ke paroranga so panga nga.
Bong so yo be kayei paroranga pang Maro ye i,
in so ke tana i tiap,
bong in so ke Maro Amunu Silene leu.
Ngan in dada dook mata tani yo be Yesu Kirisi ilonang ye a be kayeii i.
Le paroranga yo nen i,
in la Maro ikamata ngan ole lon ponana ye i.
6 Ngan Rau ke Maro iwete betanga nen lapau.
Iyei ne,
“Kakamata,
au i atara pat atu a iken Saion.
a
Ngan pat tani in dook mata ye matak,
inbe ataru a be nen ngan ipamede rumu.
Nen le tool yo be itara lono medana ye i,
in o ke be moomoonoo ye tiap.”b
7 Ngan la ang di tooltool yo katara lomim medana ye nga,
ngan kakamata ben so dook mata.
Bong di tooltool yo titara lodi medana ye tiap nga,
ngan di ngan dawa ben betanga ru yo iken ye Rau ke Maro a tiwete ye di nga.
Ngan betanga atu in nen,
“Pat yo di tooltool ke renge rumu lodi panga tiap a tisukraii i,
in la iyei pat dook mata yo ipamede rumu le imede i.”c
8 Inbe betanga san in nen,
“Ya in dawa ben pat yo di tooltool kedi isaurai ye a timol,
inbe dawa ben pat yo di tooltool titut kedi ye a timol du tana i.”
d
Ngan betanga ke Maro iwete nen a imot,
le moolmool ole timol,
yesoo di ngan titara lodi medana ye betanga ke Maro tiap.
Mukot yege nga, ngan Maro itara betanga atu a iken nen be di tooltool yo nga ole timol.
9 Bong ang ngan,
Maro ipootang panga ya taunu.
Inbe ang ngan ben di tooltool kuto maimai yo Maro itar di be tiyei urata ke paroranga so panga nga.
Inbe ang ngan dawa ben di tooltool yo tigaua be tiyepe gaongo ye tana maimai kapala nga.
Le ye dada gaongo leu,
ang ngan,
Maro igau ang panga man kagaua le atu a be nen ngan ole kayepe ben di tooltool yo ipootoo di panga ya taunu nga.
Ngan iyei nen,
a be nen ngan kawetewete pang di tooltool ye so dook mata yo Maro iyei pang nga,
inbe kayitmaka ene ye yo ikau ang ye ni todo lono a kaman kayepe ye nunngana yo dook mata in nga.
10 Muku ngan kayepe dawa ben di tooltool ke Maro tiap,
bong nookoot nga,
igau ang panga le kayepe ben di tooltool ki ya taunu.
Inbe muku ngan dada yo be Maro lono pang a iyei dada dook mata pang ye i,
in pombe pang yang tiao.
Bong nookoot nga,
dada yo be lono pang a iyei dada dook mata pang ye i,
in pombe oo.
11 Ang di tooltool kiau yo lok pang mai san nga,
ang ngan ke tana i tiap,
le kayepe dawa ben ang ngan di tooltool ke malala san.
Ngan nen le awete pang le kook mede ye betanga nen,
kayege dada dook tiap ke noonoo yo tinimim iyolang be la kayei nga,
yesoo dada dook tiap yo nen ngan la be igarung lomim nga.
12 Inbe ole kakap tutang dook ye panga kiang,
a be nen ngan kayepe dook mata ye di tooltool yo lodi galanga ye Maro tiap nga,
ngan matadi.
Moolmool,
di ngan tisopo koodi pang be kayei dada yo dook tiap nga,
bong kayepe dook,
a be nen ngan tikamata dada dook mata kiang tina yo kayei nga.
Ngan la ye lal yo Maro be ikarata betanga ke di tooltool ye in nga,
ngan ole tiyeie Maro ene le ilo ete ke be di tooltool tipayiti ye.
Karaua Pang Di Tooltool Yo Kuto Maimai Nga
13 Ngan dada dook mata yo Tool Mai lon ponana ye ngan nen,
be ang tapmim karautoo ang le kayepe ye gurana ke di tooltool kuto maimai nga le imot,
ngan parmadi.
Le tool kuto mai yo matan kala di tooltool le imot ke tana mai i,
in kayepe parmana a katoo betanga ki.
14 Inbe di tooltool ki yo itar di be tiyei tooltool kuto maimai pang nga,
ngan karaua pang di a katoo betanga kidi lapau.
Di ngan iyawar di be tiyemenai di tooltool yo tiyei dada dook tiap nga,
inbe tiyitmak di tooltool yo tiyei dada dook mata nga.
15 Ngan Maro lono be kayei dada yo dook mata nga,
a be nen ngan kayakala di tooltool yo taukadi lo galanga nga,
ngan koodi,
a timot ye betanga dook tiap kidi yo tiwete nga.
16 Ngan ang ngan kayepe ben di poranga mulu,
ngan tiap.
Bong kin lomim tar be ang ngan kayepe nen a be kayei dada yo dook tiap,
ngan be.
Nen le katoo dada yo dook mata nga ben ang ngan di poranga ke Maro.
17 Inbe tinimim booroomoo ye tool sa be,
bong katar talngamim ye betanga kidi.
Inbe lomim mai san pang di diemim kapala yo titara lodi medana pang Yesu nga.
Inbe katattadaia Maro,
inbe karaua panga le kaporonaii dook mata.
Inbe ole kalongo pang tool kuto mai tani yo matan kala di tooltool le imot ke tana mai i,
a katoo betanga ki leu.
Tatoo Kirisi Kene Nene, Inbe Tasolo Masngana
18 Ang di poranga nga,
ngan karautoo ang le du kayepe di kuto maimai kiang parmadi,
inbe kalongo betanga kidi a katoo dook le imot.
Ngan kin kayei dada nen pang di kuto maimai dook mata yo lodi iken silene pang,
ngan leu be.
Bong kayei dada gaongo leu pang di kuto maimai yo malmalidi a tiyei dada dook tiap pang,
ngan lapau.
19 Nen le lomim tutu Maro ye so yo be kayei nga,
ngan kumata be kayei nen le be tikap sokorai masngana pang ye nga,
ngan nanga,
ole kakodo le kamede inbe kasolo masngana yo nen nga,
a be nen ngan Maro ole lon ponana yang.
20 Ngan kumata le be kayei dada dook tiap le tirau ang a kasolo urata moonoo ye nga,
ngan ole yelei,
Maro ole lon ponana yang?
Tiap yege!
Bong kumata le be kayei dada yo dook mata nga,
inbe tirau sokorai ang a kasolo urata moonoo ye nga,
ngan in dada tani yo be Maro lon ponana ye i.
21 Le Maro ikiu ang be ole katoo dada dook mata yo nen nga,
yesoo Kirisi lapau isolo masngana a be ilonang ye.
Ngan ya in ipatnaia dada pang oo,
le ole katoo kene nene ye dada ki tani yo iyeii i.
22 “Ya in iyei touo dada dook tiap yo ke noonoo ngan siap.
Inbe betanga ke kaplungunu sa ipas ye koonoo,
ngan tiap lapau.”e
23 Ngan ye kene yo di tooltool tiwete betanga dook tiap panga a be tigarungu ye in nga,
ngan ya in iwete touo betanga sa yo dook tiap ngan be irau betanga kidi ye,
ngan tiap.
Inbe ye kene yo isolo masngana ye in nga,
ngan iwete touo betanga sa yo be ole iyeie dada dook tiap sa pang di ye,
ngan tiap lapau.
Bong ya taunu itaru lo Maro baene.
Ngan Maro in tool tani yo itoo dada dook mata tarantatu be ikarata betanga ke di tooltool i.
24 Ngan Kirisi ikap noonoo yo kiidi nga le imot a isolo ye kene yo imata lo kai palasingi kaini ye i.
Ngan iyei nen,
a be nen ngan tayege dada dook tiap ke noonoo.
Inbe iyei nen,
a be nen ngan tayepe ngan tatoo dada dook mata noonoonoo yo Maro lono be tatoo nga.
Ngan moonoongoo yo iken ye tinini nga,
ngan be nen a iyei ang le kayepe dook mata mulu.
25 Muku nga ang ngan dawa ben di sipsip yo tila a la tiyududu nga,
bong nookoot nga kamulu a kaman ye tool yo matan kala di sipsip i,
a be nen ngan man matan kalang ye yepongo kiang.