Yesu In Tool Kuto Mai Ke Paroranga So Pang Maro
8
1 Ngan betanga mai yo am nga amwetewete ye in nen:
Idi nga,
tool kuto mai kiidi ke paroranga so yo dook mata nen i,
in iyepe.
Inbe ya in ilo ye malala ke Maro le lo iwur ye Maro,
yo ene mai san i,
in baene oonoo.
Le nookoot nga,
ya in iyepe potai ye kookoowoo ke burungu yo Maro iwur ye a matan kala so nga le imot ye i,
2 inbe ya in iyei urata nango ye ni mison ke Maro ngo.
Ngan ni mison tani,
in badabada ke sungunu pang Maro yo moolmool i.
Inbe badabada tani,
in di tooltool la tipatokode ye baedi,
ngan tiap,
bong Tool Mai ya taunu la ipatokode i.
3 Ngan di tooltool kuto maimai le imot ke paroranga so nga,
ngan tipootoo di be tikap so yo di tooltool tikap ye lo ponana kidi nga,
ngan pang Maro.
Inbe tiyei paroranga ye so yo di tooltool tikap be tiparoro pang Maro ye noonoo kidi nga.
Ngan nen le Kirisi,
yo tool kuto mai kiidi ke paroranga so i,
in iyeie paroranga pang Maro ye so lapau.
4 Ngan kumata le be iyepe ye tana i nga,
ngan ke be iyei urata yo ben tool ke paroranga so,
in tiap.
Yesoo,
di tooltool ke paroranga so la tiyepe ni nga,
inbe di ngan tiyei urata ke paroranga so pang Maro ben ger ki yo ikap pang Mose a iwodo nga.
5 Di ngan tiyei urata pang Maro ye badabada ke sungunu yo iken tana i leu.
Ngan badabada tani in dawa ben badabada moolmool yo iken ye malala ke Maro,
in kanningana.
Ngan nen le ye kene yo Mose be ipatokodo badabada ke sungunu pang Maro ye in nga,
ngan Maro ikap noonoongoo panga inbe iwete nen,
“Kin kure ngan kuyei so nga le imot le lo itarke momo ki ben yo apatnai pong kawal Sinai in nga.”a
6 Bong urata maiyoko yo Maro itaru la Yesu baene a iyeii i,
in dook mata san le illoso urata kidi tooltool ke paroranga so yo tiyei tana i nga.
Le moolmool,
Yesu tani in iyepe kataunu ke di tooltool inbe Maro,
a ikarata dada paunu yo be idi nga ke be tala potai ye Maro inbe taye tagaua le atu mulu ye i.
Inbe dada paunu tani yo be tala taye Maro tagaua mulu ye i,
in illoso dada yo gurunu i,
yesoo betanga medana yo paunu i,
in dook mata san le illoso betanga medana yo gurunu i.
7 Kumata yo be betanga medana yo gurunu i,
in taukan busunu nga,
ngan matin nga le Maro ipamede betanga medana yo paunu in tiap.
8 Bong Maro ipuske busunu kidi tooltool,
le iwete nen,
“Au Tool Mai awete nen,
au i atara lal a iken oo.
Ngan kene yo be pombe ye in nga,
ngan la be au i ole apamede betanga medana paunu pang di tooltool ke Isrel,
inbe pang di tooltool ke Yuda.
9 Ngan betanga medana paunu yo be apamede pang di i,
in o gaongo ben yo muku ngan apamede pang di sasa kidi,
in tiap.
Ngan ye kene yo apamede betanga medana gurunu pang di ye in nga,
ngan au i akap di ke Isip,
inbe atoko baedi dawa ben kase mitiap tamana itoko baene nga,
inbe arara di a timan.
Bong lodi be titoo betanga tani yo apamede pang di,
in le iken so,
ngan tiap,
ngan la le awala murik pang di nga.
10 Le au Tool Mai awete nen,
ye kene yo be lal ki tani in iman le pombe koot nga,
ngan la be apamede betanga medana paunu pang di tooltool ke Isrel nga.
Ngan i betanga medana paunu tani,
in naii:
Au i ole atar ger yo kiau nga lo iken kutodi lono,
inbe ole awodo lo iken lodi.
Inbe au i ole ayei ben Maro kidi,
inbe di ngan ole tiyei ben di tooltool kiau.
11 Ngan nen le ye kene tani,
in tool sa o ikaua urata ke be ipatomonai di diene yo tiyepe potai ye,
ngan ye Tool Mai tiap.
Inbe tool sa o ke be iwete pang di rara ki nen,
‘Alei,
kumata be ang nga lomim galanga ye Tool Mai,
ngan la be dook mata,’
ngan tiap.
Yesoo,
di tooltool le imot ngan lodi galanga yau oo.
Moolmool,
di tooltool yo edi maimai tiap le ilo ye di tooltool yo edi maimai nga,
ngan di le imot ole lodi galanga yau.
12 Yesoo,
au i ole agiri dada dook tiap kidi yo tiyei nga,
inbe o ke be lok tut noonoo yo kidi ngan mulu tiap.”b
13 Ngan tina Maro iwete nen,
“I betanga medana paunu tani,
in naii”,
ngan nen le iyeie betanga medana yo gurunu i le taukan urata.
Inbe so yo taukan urata a iken sokorai i,
in ole pattu leu be ilene.