Melkisedek Iye Apram
7
1 Ngan Melkisedek tani in tool kuto mai yo matan kala tana mai Salem i,
inbe ya in tool ke paroranga so pang Maro tani yo ene mai san le iyepe ete i.
Ngan ye kene yo Apram illos di tooltool kuto maimai kapala ye patokongo a imulu ye in nga,
ngan itauaraia Melkisedek tani,
le Melkisedek ipamede ye betanga dook mata a be nen ngan Maro iyei urata dook mata panga.
2 Motong la Apram ipoto so tina le imot yo ikap ye patokongo nga,
ngan le iken ye budanga sangaul,
inbe ikaua budanga atu pang Melkisedek.
Ngan Melkisedek tani in ene lono ki ru:
atu in nen,
“Tool kuto mai yo itoo dada dook mata noonoonoo i”,
inbe san in nen,
“Tool kuto mai ke malala mai yo ene Salem i.”
Ngan betanga yo Salem i,
in lono ki nen,
lo silene.
Le ya in tool kuto mai ke lo silene.
3 Inbe Melkisedek tani,
in Rau ke Maro iwete touo pa ye tamana,
too ye tinana,
too ye di sasa ki,
ngan pitiap.
Inbe idi nga lod galanga ye ke yo tipasuiu ye i,
too ye ke yo imata ye i,
in pitiap lapau.
Ngan nen le ya in dawa ben Maro Natunu,
le iyei tool ke paroranga so pang Maro,
a iyepe nen le taukan motingi.
4 Inbe matamim too ye dada yo Apram iyeii pang Melkisedek i.
Ngan ya in,
so tina le imot yo ikap ye patokongo nga,
ngan ipoto le iken ye budanga sangaul,
inbe ikaua budanga atu pang Melkisedek tani.
Ngan sasa kiidi yo Apram in tool ene mai lapau,
bong dada yo iyeii pang Melkisedek i,
in ipaposi paidi nen,
Melkisedek in tool ene mai moolmool.
5 Kakamata,
ger ke Maro yo ikap pang Mose,
ngan iwete be di Isrel tipoto so kidi ye budanga sangaul,
lo ngan be tikaua budanga atu pang di diedi kapala yo tipa ye rara ke Liwi a tiyei tooltool ke paroranga so pang Maro nga.
Di ngan,
di leu tiye di Isrel nga rara ataleu,
yesoo di ngan sasa kidi la Apram i,
bong ger ke Maro iwete be di ngan la be tiyeie dada tani in nga.
6 Ngan Melkisedek tani,
in ipa ye rara ke Liwi tiap,
bong le ikap so tina yo Apram ikap ye patokongo a ipoto ye budanga sangaul nga,
ngan budanga atu.
Ngan Apram,
in tool tani yo Maro ipamede betanga medana panga be di sasa ki alunu i,
le ya in ene mai san.
Bong Melkisedek ipamede ye betanga dook mata a be nen ngan Maro iyei urata dook mata panga.
7 Nen le o ke be lod sarere tiap,
bong ole lod galanga nen,
tool yo ene mai le ilo ete ye ene san i,
in ya la ole ipamede ye betanga dook mata a be nen ngan Maro iyei urata dook mata panga i.
8 Ngan di sasa ke Liwi yo tiyei tooltool ke paroranga so pang Maro nga,
ngan tikap so tina kidi Isrel yo tipoto a iken ye budanga sangaul,
ngan budanga atu.
Inbe di ngan tiyeie urata kidi,
lo ngan be timmata a tila inbe di tooltool kapala tikap nedi.
Bong Melkisedek yo ikaua so budanga atu ye so yo Apram ipoto le iken ye budanga sangaul nga,
in dawa ben iyepe nen le taukan matenge,
yesoo Rau ke Maro iwete touo betanga sa ye matenge ki ngan tiap.
9-10 Ngan ye kene tani yo Melkisedek itauaraia Apram a ipoto so ki le iken ye budanga sangaul motong ikaua budanga atu panga nga,
ngan Liwi in pombe pang ye rara ke Apram a tipasuiu tiao.
Nen le ben ya in iyepe rara lono ke sasa ki go.
Ngan nanga,
ye kene yo Apram ikap so tina ngan pang Melkisedek nga,
ngan ben Liwi iye di diene kapala yo tiyei paroranga ye so ngan tiye tiyepe,
inbe tiyei nen.
Le ole idi nga tawete nen,
di tooltool yo kanakana ngan tikap so budanga atu ke so yo di tooltool ke Isrel tipoto le iken ye budanga sangaul nga,
di ngan ye Apram baene ngan ben tikaua so budanga atu pang Melkisedek.
Yesu In Dawa Ben Melkisedek
11 Ngan ger ke Maro yo ikap pang Mose ngan iwete nen,
be Liwi iye di tamoto yo tipa ye rara ki,
ngan di la be tiyei tooltool ke paroranga so pang Maro nga.
Ngan tina itara dada yo nen in nga,
le ger kapala yo Maro ikap pang di tooltool ke Isrel nga,
ngan tikodo lo dada tani in pono.
Bong kumata be Liwi iye di rara ki tina ngan tiyei urata kidi le di tooltool tiyepe le taukadi busunu ye Maro matana nga,
ngan nga yelei a le tool san mulu yo ipa ye rara ke Liwi tiap i,
in pombe be iyei tool ke paroranga so nga?
Ngan tool san tani in dawa ben Aron tiap,
bong ya in dawa ben Melkisedek.
12 Ngan nanga,
kumata be urata ke paroranga so in idik a ila ye tool san nga,
ngan ole ger kapala tina ngan idik lapau.
13 Ngan so tina yo amwetewete ye nga,
ngan ye Tool Mai kiidi,
yo ipa ye rara ke Liwi tiap i.
Inbe di rara ki ngan sa yo muku ngan iyei tool ke paroranga so a iyei urata ye kookoowoo ke paroranga so,
ngan tiap.
14 Yesoo,
idi nga lod galanga nen,
Tool Mai kiidi in ipa ye rara yo ke Yuda i.
Inbe Mose iwete touo betanga sa ye rara ke Yuda be ole atu kidi iyei tool ke paroranga so,
ngan pitiap yege.
15 Ngan betanga tani ye ger ke Maro i,
in idi nga ke be lod galanga ye dook,
yesoo tool san mulu ke paroranga so yo dawa ben Melkisedek i,
in pombe oo.
16 Inbe tool tani,
in ger ke Maro la iwete a iyei tool ke paroranga so,
too ya in ipa ye rara ke Liwi la le iyei tool ke paroranga so,
ngan tiap.
Bong iyei tool ke paroranga so ye gurana mai ki yo iken ye a le iyepe nen le taukan matenge i.
17 Ngan Rau ke Maro iwete nen,
“Ong in tool ke paroranga so inbe ole kuyepe nen le taukam motingi.
Ong in tool ke paroranga so dawa ben Melkisedek.”a
Betanga Medana Yo Gurunu I, Inbe Betanga Medana Yo Paunu I
18 Ngan nen le ger yo muku nga,
ngan nookoot nga ilene oo,
yesoo taukan gurana yo be ilon di tooltool ye nga.
19 Inbe ger tina ngan iyei touo dada sa yo be ilonidi a tayepe le taukada busunu ye Maro matana,
ngan tiap.
Bong Maro itara dada paunu yo illoso dada gurunu ke ger i,
le tina idi nga tatar matada ye dada paunu tani nga,
ngan ke be tala potai ye Maro.
20 Inbe Kirisi,
in Maro ipamede betanga ye ya taunu ene a iwete moolmool le ete be ole iyei tool ke paroranga so.
Bong Liwi iye di tooltool kapala ke paroranga so,
ngan Maro iyei dada nen ye di tiap.
21 Bong kene yo Maro itara Yesu be iyei tool ke paroranga so ye in nga,
ngan ipamede betanga ye ya taunu ene a iwete moolmool le ete panga.
Le Rau ke Maro iwete nen,
“Au Tool Mai kiong i,
in apamede betanga pong ye au tauk ek a awete moolmool le ete nen,
‘Ong in ole kuyei tool ke paroranga so a kuyepe nen le taukam motingi.’
Ngan nen le o ke be apalele lok mulu tiap.”b
22 Ngan dada paunu yo Maro ipamede betanga ki pang Yesu ye i,
in dook mata ki taunu le illoso betanga yo ke muku i.
Inbe dada tani,
in Maro itaru lo Yesu baene,
le idi nga lod galanga nen,
ole iyeii le pombe moolmool.
23 Muku ngan di tooltool alunu la tiyei tooltool ke paroranga so pang Maro nga,
yesoo kapala ole timmata a tiyege urata kidi,
lo ngan be di tooltool tilon di a tiyei urata kidi.
24 Bong Yesu yo iyepe nen le taukan matenge i,
in iyei urata ben tool ke paroranga so nga le iken so nen a ila.
25 Ngan la di tooltool yo titara lodi medana panga nga,
ngan tila potai ye Maro,
a be nen ngan ilon di moolmool,
inbe ipamulu di ye so dook tiap yo be igarung di i.
Ngan ole iyei nen,
yesoo ya in taukan matenge,
le iyepe nen a be nen ngan kanakana ngan ikap koodi,
inbe itoro Maro ye so yo be ilon di ye nga.
26 Le tool kuto mai ke paroranga so yo nen i,
in ke be ilonidi dook mata le imot.
Yesoo,
ya in dawa ben di tooltool ke noonoo,
nga tiap,
bong ya in itoo dada dook mata le imot yo Maro lono be itoo nga,
inbe taukan busunu ye matana,
inbe lono iken galangana dook mata ye matana,
inbe ya in Maro iyitmaka ene le ilo ete san.
27 Le ya in dawa ben di tooltool kuto maimai kapala yo ke paroranga so,
ngan tiap.
Di ngan tiparoro so ke paroranga ye ke kanakana nga le imot.
Inbe di ngan tiyei paroranga ye noonoo kidi muku,
lo ngan be ye noonoo kidi tooltool kapala.
Bong kene yo Yesu iraia lono be ya taunu iyei paroranga ye pang Maro ye noonoo kidi tooltool nga,
ngan le iyei nen pattu leu le imot ki taunu.
28 Le moolmool,
di tooltool kuto maimai ke paroranga so yo ger ipootoo di nga,
ngan di ngan taukadi guradi le timmata.
Bong mur ye ger tina ke Maro yo ikap pang Mose nga,
ngan Maro ipamede betanga ye ya taunu ene a iwete moolmool le ete nen,
be Natunu la be iyei tool kuto mai ke paroranga so i.
Ngan ya in itoo Maro lono le imot,
le taukan busunu ye matana,
inbe ole iyepe le ikenen leu nen le taukan motingi.