Maryoongoo Dook Mata Ke Di Tooltool Ke Maro
4
1 Ngan nen le betanga tani yo Maro ipamede pang di tooltool ki be ole tilo ye ni yo ikauu pang di be lo timaryoo ye i,
in ya la ikenen i.
Le kin takawai yidi dook,
ole nen ngan ang tina ngan atu imol ye lono medana yo itaru pang Maro in nga,
ngan ole ikaua maryoongoo tani,
in tiap.
2 Ngan awete nen,
yesoo idi nga lapau,
tiwetewete bingi dook mata paidi dawa ben muku ngan tiwete pang di Isrel ye maryoongoo yo be tikauu in nga.
Ngan betanga tina yo Maro ipamede pang di i,
in tilonga oo,
bong tilongo sokoraii,
inbe titara lodi medana ye tiap,
ngan la le ilon di pitiap yege nga.
3 Bong idi tooltool yo tatara lodo medana pang Kirisi nga,
ngan idi leu ole takaua maryoongoo dook mata tani.
Muku ngan di Isrel tiwala muridi pang Maro,
ngan la le iwete nen,
“Au i katek malmal le awete le apamede betanga moolmool nen,
‘Di ngan o ke be tilo ye ni yo akauu pang di be lo timaryoo ye i,
in pitiap yege.’
 ”a
Ngan Maro iwete nen,
bong ngan maryoongoo tani yo ipa ye i, in iken mukot yege ni ye kene yo iyei porai urata ki a imaryoo ye in nga.
4 Ngan ben tina betanga atu yo tiwode a iken ye Rau ke Maro in iwete nga.
Ngan iwete nen,
“Maro itar so nga le imot ye ke limi be atu,
le ye ke limi be ru ki nga,
ngan imaryoo ye urata ki yo iyei nga.”b
5 Inbe betanga ke Maro yo awete muku a ila koot nga,
ngan iwete nen,
“Di ngan o ke be tilo ye ni yo akauu pang di be lo timaryoo ye i,
in pitiap yege.”
6 Le di tooltool yo kulkulunu ngan tilongo betanga dook mata tani nga,
ngan tilo ye ni ke maryoongoo tiap,
yesoo di ngan tisak noonoongoo ke Maro.
Bong betanga yo Maro ipamede pang di tooltool be ole ikaua maryoongoo pang di,
in la ikenen go i,
le moolmool,
di tooltool tina ngan kapala ole tikaua maryoongoo tani ni.
7 Ngan ye punu in la le itara lal san mulu yo be takaua maryoongoo tani in ye i.
Ngan lod galanga nen lal tani in la katai i,
yesoo rai alunu iman a ila,
motong la Maro iwete pang Dawiti a iwodo betanga ki ilo ye rau ben awete pang muku koot nga.
Ngan iwete nen,
“Nookoot katai nga katar talngamim dook,
a kalongo betanga ke Maro yo iwetewete nga.
Nen le kin kutomim imede mata a kasak betanga ki be.”c
8 Ngan nanga,
ngan yo be Yesua ikap di Isrel dook a tilo ye ni ke maryoongoo yo Maro iweta in nga,
ngan matin nga le Maro iwete pang Dawiti ye lal san mulu tiap.
9 Le maryoongoo yo be di tooltool ke Maro tikauu i,
in ya la ikenen go i.
Ngan maryoongoo tani in ben yo Maro ikaua urata le imot a imaryoo ye ke limi be ru ki i.
10 Ngan nen le sei tool yo be ikaua maryoongoo dook mata yo ipa ye Maro in nga,
ngan ya in iyetai touo urata sa mulu siap,
dawa ben Maro iyei urata ki le imot a ipas le imaryoo leu nga.
11 Le nga ole takapye be le takaua maryoongoo dook mata tani,
a be nen ngan tool kiidi sa be itoo dada yo ben di Isrel tiyei ke sak noonoongoo,
ngan be.
Ole nen ngan imol le ilene.
12 Ngan betanga yo ke Maro i,
in iken nen le taukan motingi,
inbe ya in gurana ki mai le mai san.
Inbe betanga ki tani in ben pul ke patokongo yo matana iken ye gigini di le ru i,
bong matana le matana san le illos pul tina ke patokongo nga.
Ngan ben pul ke patokongo ke be isaputu tool soonoo le turana le iken manga manga ye sekenge ki nga,
ngan betanga ki ke be isopala tool lono le ipapos so yo lon kaua urata ye ben ipa ye Maro Amunu Silene,
too ipa ye ya taunu tinini yo ke tana i.
Inbe ipapos so yo iken tool lono be dook too dook tiap nga.
13 Ngan so le imot yo Maro itar nga,
ngan sa yo iken sollono ye matana,
ngan tiap,
bong so tina ngan iken mallangana panga a lon galanga ye le imot.
Inbe ya in tool tani yo be pang dama ni ngan tarau betanga ki ye soo dada kiidi yo tayei nga.
Yesu In Tool Kuto Mai Ke Paroranga So
14 Ngan idi nga,
tool dook mata ki taunu yo ke be ilonidi i,
in ya la iyepe i.
Tool tani in Yesu yo Maro Natunu i,
inbe ya in tool kuto mai kiidi ke paroranga so yo imulu a ilo ye malala ke Maro i.
Nen le ole taparama lodo medana yo tawetewete pang di tooltool ye i,
in le imede.
15 Ngan awete nen,
yesoo tool kuto mai kiidi ke paroranga so pang Maro,
in lon galanga dook ben idi nga taukada gurada yo be tarautoo noonoo ye i.
Inbe ya in touanga matana matana gaongo leu ben yo pombe pang yidi nga,
ngan pombe pang ye a be nen ngan iyei noonoo,
bong le iyei touo noonoo siap yege.
16 Le katattadaii be,
bong kala potai ye Tool Mai yo matan kalidi i,
yesoo ya in lono paidi a iyei dada dook mata paidi.
Le tala potai ye a be nen ngan soo moonoo be pombe pang yidi le lodo be ilonidi nga,
ngan ole lon mulumulu yidi a iyei dada dook mata paidi yo be ilonidi ye nga.