Yesu In Ene Mai San Le Illoso Mose
3
1 Le ang di diek nga,
ang ngan Maro ipootang panga ya taunu dawa ben ipootam be lo tayepe dook mata ye malala ki nga.
Ngan la kanakana ngan ole lomim tutu Yesu ya taleu yo tawete be tatara lodo medana panga i,
yesoo ya in aposol tani yo Maro iwanga a isi iwetewete betanga ki i,
inbe ya in iyei tool kuto mai ke paroranga so pang Maro.
2 Ngan ya in itara lono le atu moolmool pang Maro be iyei urata ki ngan le dawa ben yo Mose iyei nga.
Ngan Mose tani iyepe kataunu ke di tooltool ke Maro yo tiyei ben rumu ki nga,
inbe iyei urata le itoo Maro lono.
Inbe Yesu in Maro ipootoo be iyei tool kuto mai ke paroranga so nga,
ngan iyei urata le itoo Maro lono dook mata nen le imot.
3 Bong matamim too dook ngan,
kumata le tool atu ke renge rumu be ire rumu le dook mata san nga,
ngan ole tipayiti le ilo ete le illoso rumu tani yo ire i.
Ngan gaongo leu ye Yesu iye Mose,
Yesu in ben tool yo ire rumu i,
e Mose in ben rumu leu,
le dook mata nen be di tooltool tiyitmaka Yesu ene le ilo ete le illoso Mose.
4 Le moolmool,
rumu yo ikodo ngan di tooltool la tire nga,
bong so le imot yo iken ngan Maro la itar di i.
5 Mose itara lono le atu pang Maro a itoo lono,
bong iyei urata ki ben tool ke kapraingi leu,
a ilon di tooltool yo tiyei ben rumu ke Maro nga.
Ngan urata yo iyei nga,
ngan iwete pang di tooltool ye soo so yo be pang dama ni ngan Maro ipatnai le iken mallanga nga.
6 Bong Kirisi in Maro Natunu,
le ya in itara lono le atu panga a itoo lono,
inbe iyei mai pang di tooltool ke Maro a matan kala di.
Ngan idi tooltool yo tatara lodo medana pang Kirisi nga,
ngan la di tooltool ke Maro nga.
Le kumata be tatattadai tiap,
bong takodo le tamede,
inbe tatar matada a tanam ye so dook mata yo be Maro ikauu paidi in nga,
ngan idi nga dawa ben rumu ki.
Kin Kawala Murimim Pang Maro Be
7 Ngan nen le dawa ben tina Maro Amunu Silene iwete a betanga ki iken ye Rau ke Maro nga.
Iwete nen,
“Nookoot katai nga katar talngamim dook,
a kalongo betanga ke Maro yo iwetewete nga.
8 Nen le kin kutomim imede mata a kasak betanga ki ben di sasa kiang tiyei muku nga,
ngan be.
Di ngan,
ye kene yo tiyepe ye ni sorrakene ye in nga,
ngan tiwala muridi pang Maro inbe titoua kaiye.
9 Ngan ye ni tani in ayei mos maimai ye rai sangaul pai,
a di sasa kiang tikamata,
bong di ngan titouotou au le ikenen leu.
10 Ngan ye punu in la le au katek malmal pang di tooltool tina,
le awete nen,
‘Kanakana nga,
di tooltool ngan lodi iken manga mooloo yau,
le tiwala muridi pau,
inbe di ngan titoo dada yo kiau ngan tiap.’
11 Ngan tiyei nen le katek malmal pang di a apamede betanga medana nen,
‘O ke be tilo ye ni yo akauu pang di be lo timaryoo ye i,
in pitiap yege.’ ”a
12 Le ang di diek nga,
kin kakamatang dook leu ye lomim medana yo kataru pang Maro i.
Ole nen ngan ang kapala be lomim yo kataru panga i,
in imede tiap nga,
ngan ole kayei dada dook tiap ke noonoo,
inbe kawala murimim pang Maro yo iyepe nen le taukan matenge i.
13 Nen le ye ke tina le imot yo kanakana nga,
ngan ole kapamedang ang tina ngan atu atu lomim a be kakodo le kamede ye lomim medana yo kataru pang Maro i.
Le nookoot ye ke katai,
i be imot tiao nga,
ngan dook mata be kapamedang,
a be nen ngan ang tina ngan sa o ke be noonoo ikaua lungunu ye a ikanene lono be ilongo betanga ke Maro tiap,
ngan tiap.
14 Muku ngan idi nga tatara lodo medana pang Maro,
le ole idi nga takodo le tamede ye lodo medana tani yo tataru i,
a imede nen le lo tammata.
Ngan kumata le be tayei nen nga,
ngan la be takap so dook mata tina yo ipa ye Kirisi nga.
15 Ngan ben betanga ke Maro yo awete muku a ila koot nga,
ngan iwete nen,
“Nookoot katai nga katar talngamim dook,
a kalongo betanga ke Maro yo iwetewete nga.
Nen le kin kutomim imede mata a kawala murimim panga ben di sasa kiang yo muku ngan tiyei nen,
ngan be.”b
16 Ngan di sema tooltool tilongo betanga ke Maro yo iwete ngan le tiwala muridi panga nga?
O di tooltool le imot la Mose ikap di ke Isip a timan ngan tiap,
too?
17 Inbe di sema tooltool tiyeie Maro a le katen malmal pang di ye rai sangaul pai nga?
O di tooltool tina yo tiyei noonoo,
a le timmata a bobodi sila ikino ye ni sorrakene ngan tiap,
too?
18 Inbe di sema tooltool Maro katen malmal pang di,
a ipamede betanga medana be o ke be tilo ye ni ki yo be lo timaryoo ye i,
in tiap nga?
O di tooltool yo tilongo betanga ki a titoo tiap nga,
too?
19 Ngan nen le idi nga lod galanga nen,
o ke be tilo ye ni ke Maro yo be lo timaryoo ye i,
in tiap,
yesoo di ngan titara lodi medana pang Maro tiap.