Kin Tatar Talngada Dook Ye Soo So Yo Maro Iwete Nga
2
1 Nen le idi nga ole lod kalli betanga moolmool yo tiwete paidi koot nga,
ngan be,
bong ole takap inbe tatoo.
Ole nen ngan tayei ben ookoo yo tiwatwatu tiap le idau a ila i.
2 Kakamata,
ger ke Maro yo di bangabangana ki tikap pang di Yuda ngan moolmool,
ngan nen le Maro iyemenai di tooltool kidi le imot yo tiyei so yo ger iwete be tiyei tiap nga.
Inbe di tooltool yo tiwala muridi panga nga,
ngan iyemenai di lapau,
le lo iye dada dook tiap kidi tina ngan kootoonoo.
3 Le kumata be nen nga,
ngan ole yelei yidi?
Ngan kumata le be idi nga tawala muriidi pang betanga yo Maro Natunu ikauu paidi ye dada dook mata yo be ipamulidi ye so dook tiap yo be igarungidi in nga,
ngan ole tasuru kate malmal ke Maro belei?
Ngan betanga tani ye dada yo be Maro ikau idi a ipamulidi ye i,
in kulkulunu ngan Tool Mai ya taunu la iweta i,
motong la di tooltool yo tilongo betanga ki,
ngan tiwete paidi a tipamedidi ye be in moolmool.
4 Inbe Maro ikata suanga ye betanga kidi yo tiwete,
ngan moolmool,
ye mos matana matana yo ipamede di be tiyei nga,
inbe ye urata matana matana maimai yo tiyei ye gurana ki nga.
Inbe so yo Maro Amunu Silene ikap sokorai pang di tooltool ki ye lo ponana ki a irai di ye le itoo Maro lono nga,
ngan iyei tarkilanga pang di nen,
be betanga ngan moolmool.
Yesu Iportak Le Iyei Ben Idi Tooltool Nga
5 Ngan lang le tana paunu yo amwetewete ye be pang dama ni ngan pombe nga,
ngan o ke be Maro itar di bangabangana a tiyei kuto maimai a be matadi kala,
ngan tiap.
6 Bong ye ni atu ngan Rau ke Maro iwete nen,
“Tool Mai,
am nga tooltool belei a be lom tutam mai mata nga?
Inbe tool moolmool kiong in dook mata belei a be matam kala dook mata nga?
7 Ngan ye manga modono kasin leu nga,
a
ngan kurautoo le du iyepe di bangabangana kiong parmadi.
Ngan kuyeii nen,
motong la kuyitmaki le ilo ete,
inbe kuyei ene le ilo ete ke be di tooltool tipayiti ye.
8 Inbe so le imot yo kutar nga,
ngan kuyei di le tiyepe parmana a matan kala di.”
b
Ngan nanga,
so le imot nga Maro itar di a tiyepe parmana a be matan kala di,
le so sa yo be iyege a iken diki,
ngan tiap.
Bong nookoot nga so le imot yo iwete be tiyepe parmana nga, ngan idi nga takamata ben tiraua panga a titoo ya taunu lono tiao.
9 Bong idi nga lod galanga ye Yesu nen,
ya in dada yo be Maro lono paidi a iyei dada dook mata paidi ye i.
Le tina ye manga modono kasin leu nga,
ngan Maro irautoo le du iyepe di bangabangana ki parmadi.
Inbe ye kene tani in Yesu ikaua nede a imata ye noonoo kiidi.
Ngan iyei nen,
ngan la le nookoot nga Maro itaru le ilo ete,
inbe iyeie ene le ilo ete ke be di tooltool tipayiti ye nga.
10 Ngan Maro itar so nga le imot a pompombe,
le so tina yo itar di nga,
ngan ya ki ke be iyei urata ki ye di.
Inbe ya in lono nen,
be ole ikap di natunu a be iye di tiyepe ye nunngana.
Ngan nen le idawan le iyeie Yesu a isolo masngana ye kai palasingi kaini,
yesoo ye dada tani in,
ya in itoo Maro lono le imot le taukan busunu ye matana.
Ngan la le imuku pang di tooltool a ikarata dada yo be Maro ikap di a ipamulu di ye so dook tiap yo be igarung di i.
11 Ngan nanga,
tool tani yo ikarata dada pang di tooltool a be tiyei ben di tooltool ke Maro a tiyepe le taukadi busunu ye Maro matana i,
inbe di tooltool yo ilon di le tiyei ben di tooltool ke Maro koot nga,
ngan tiye tikata le imot be Tamadi ataleu.
Ngan ye punu in la le Yesu ke be moomoonoo be iwete di ye toonoo le taini le lini,
ngan tiap ye i.
12 Le kakamata,
betanga ki yo iwete pang Maro nga,
ngan iken ye Rau ke Maro nen,
“Au i ole awetewete pang di took le taik le lik ye dada dook mata yo kuyei nga.
Inbe ye di tooltool yo tigaua ye bareme kiong,
ngan matadi nga,
ngan ole awou woungu yo be ayitmaka em ye nga.”c
13 Inbe ye ni san in Rau ke Maro iwete nen,
“Au i ole atara lok le imede pang ye Maro.”
d
Inbe Rau ke Maro iwete mulu nen,
“Au naii, aye di tooltool yo Maro ikap di pau ben di natuk ngan amyepe i.”e
14 Yesoo di tooltool tina yo Maro natunu nga,
ngan tinidi ke tana i nga,
ngan la le Yesu lapau iportak a iyei tool moolmool le tinini gaongo leu ben di nga.
Ngan iyei nen nga,
ngan be nen a imata nga,
ngan igarungu tool kuto mai kidi so sadi in le taukan gurana,
yesoo ya in itoko gurana ke matenge.
15 Ngan idi nga,
kanakana ngan tatattadai be ole tammata.
Ngan nen le tattadaingi kiidi tani in iparamidi le tayepe parmana dawa ben idi ngan poranga ki,
inbe iyei ben tool mai paidi.
Bong Yesu ikau idi a be nen ngan tayepe ye tattadaingi yo kiidi in parmana mulu tiap.
16 Le moolmool,
urata yo Yesu iyeii i,
in be nen a ilono bangabangana ke Maro sa ye,
ngan tiap,
bong be ilonidi idi tooltool yo tayei dawa ben di sasa ke Apram nga.
17 Ngan ye punu yo nen i,
in la le Yesu iportak a iyei tool moolmool le tinini gaongo leu ben idi tooltool ki nga.
Ngan nen le isi tana a iyepe ben idi nga,
ngan so le imot yo pombe pang ye di tooltool ke tana i nga,
ngan pombe pang ye nen lapau.
Ngan iyei nen,
a be nen ngan iyei ben tool kuto mai ke paroranga so pang Maro.
Ngan ya in lon mulumulu yidi,
inbe itara lono le atu moolmool pang Maro be iyei urata ki nga,
ngan la le iyei paroranga pang Maro a be nen ngan igiri noonoo kiidi tooltool ye nga.
18 Ngan tina yo isolo masngana matana matana,
inbe touanga pompombe pang ye nga,
ngan la le ya in ke be ilon di sema tooltool yo touanga pombe pang ye di nga.