PILIMON
Rau Yo Paulu Iwode Pang Pilimon I
Paulu Iye Timoti Tiwete Lo Ponana Kidi Pang Pilimon
1
1 Au Paulu awodo rau naii pong Pilimon.
I au tool tani yo ayei urata ke Yesu Kirisi a titarau lo ayepe rumu dook tiap kidi talnga dikidiki lono in naii.
Au i aye ede san Timoti yo itara lono medana pang Kirisi i,
in amwete lo ponana kiam pong Pilimon,
tool kiam dook mata yo amyong tagaua ye urata ke Maro i.
2 Am nga amyawar lo ponana kiam pang liidi,
Apia,
yo itara lono medana pang Kirisi i,
inbe pang ede san,
Akipus,
yo taye tatoo Maro lono le dawa ben tool ke patokongo yo ilongo betanga ke tool mai ki a itoo i.
Inbe amwete lo ponana kiam pang di tooltool yo titara lodi medana pang Yesu a tigaua rumu kiong nga,
ngan lapau.
3 Nen le ampatarau pang Tamada Maro iye Yesu Kirisi yo Tool Mai kiidi i,
in be yaru lodi pang a tiyei dada dook mata pang inbe tikaua lo silene kidi pang.
Paulu Iwete Lo Ponana Ki Pang Maro Ye Pilimon Inbe Ipatarau Ye
4 Kanakana ngan be apatarau pang Maro kiau nga,
ngan lok tutong le awete lo ponana kiau pang Maro yong.
5 Yesoo,
alongo be ong in kukodo le kumede ye lom medana yo kutaru pang Tool Mai Yesu,
inbe lom pang di tooltool ke Maro mai san nga.
6 Au i apatarau be nen a lom galanga ye so dook mata le imot yo Kirisi iyei paidi nga,
a be nen ngan kuye di diem kapala yo titara lodi medana pang Yesu nga,
ngan kagaua dook mata.
Au i apatarau nen a nen ngan kayeie Kirisi ene le ilo ete ke be di tooltool tipayiti ye.
7 Ngan la tool kiau,
ong in lom pang di tooltool ke Maro mai san,
inbe kupamede lodi le lodi ponana.
Le ye dada yo kuyei nen nga,
ngan kulonau dook mata san le au lapau lok ponana kaiye.
Paulu Itoro Pilimon Be Ilono Onesimus
8 Ngan ye punu yo nen in la le atorong be kulonau.
Au i aposol ke Kirisi le ikap gurana pau le ke be atattadai tiap,
inbe awete pobe pong ye soo so yo be kuyei nga.
9 Bong lok galanga nen,
be ong in lom pang di diem mai san,
ngan la be atorong nga.
Au Paulu,
au i kolman oo,
inbe nookoot nga ayepe rumu dook tiap ke di talnga dikidiki lono ye yo ayei urata ke Yesu Kirisi nga.
10 Ngan la atorong be ole kuyei dada dook mata pang Onesimus.
a Ya in iyei ben au natuk,
yesoo ye kene yo ayepe rumu dook tiap ke di talnga dikidiki lono ye in nga,
ngan aloni le itara lono medana pang Kirisi lapau.
11 Muku ngan ilonong ye urata kiong dook tiap,
b bong yo nookoot nga iyei urata dook mata ke be ilonong inbe ilonau ye lapau.
12 Le au i agaua lok le imot panga,
bong awanga be imulu a imala pang yong.
13 Ngan yo a le ayepe rumu dook tiap ke di talnga dikidiki lono nga,
yesoo awetewete bingi dook mata ke Yesu Kirisi pang di tooltool.
Le kumata be ayei so yo lok be ayei nga,
ngan matin nga le alele Onesimus si amru amyepe nanga,
a be nen ngan ikaua nem a ilonau ye soo so yo lom be kulonau ye nga.
14 Bong au i lok be ayeie so sa mulu ye Onesimus tiap kumata le be kumalum tiap nga.
Ngan kumata le be kugaua lom la yau be kuyeie soo so yo atorong ye in nga,
ngan ole dook mata,
yesoo ong taum lom be kuyeii,
bong ke be awete pong ye be kuyeii tiap.
15 Le moolmool,
lok tar be ye punu yo Onesimus ikoo yong kasin ye i,
in be nen a so nen pombe a be imulu a imala nga,
ngan ole angru kayepe dook le iken so.
16 Inbe kin le lom tar be ya in tool ke poranga leu be.
Moolmool,
iyepe ben tool kiong ke poranga,
bong yo nookoot nga iyei ben em atu yo itara lono medana pang Tool Mai i,
in lapau.
Ngan au i lok panga mai san,
bong ong in ole lom panga le lom panga mai san.
Nen le ole lom panga ye dada ki yo iyei ben tool ke poranga nga,
inbe ole kumata dawa ben ya in em atu yo itara lono medana pang Tool Mai i.
17 Le lom tar be au i aru tagaua ye urata ke Kirisi nga,
ngan ole lom pang Onesimus a kouu a imala yong ye dada gaongo leu ben yo be lom pau a kou au a amala yong nga.
18 Bong kumata le be iyeie dada dook tiap sa pong,
too ikaua so kiong sa le iyei bun panga nga,
ngan ole aloni a araua bun ki tani in.
19 Au Paulu awodo betanga tina nga ye au tauk baek.
Nen le au tauk ole araua bun tani in.
Au i ke be apamaditi lom ye bun kiau yo iken yong nga,
yesoo au la alonong le kutara lom medana pang Kirisi i,
bong lok be atoo dada nen tiap.
20 Le tool kiau,
aru tatara lodo medana pang Tool Mai,
le lok be kuyei so yo atorong ye nga.
Idi nga tooltool ke Kirisi,
le kulonau a be nen ngan lok modoko be.
21 Au i lok galanga yong nen,
be ole kuyei so yo atorong ye nga,
inbe ole kuyei kapala mulu lapau,
ngan la le awodo rau i pong nga.
Paulu Di Diene Kapala Tiyawar Lo Ponana Kidi Pang Pilimon
22 Nen le atorong be ole kulonau ye so san mulu lapau.
Ole kukarata rumu kiong lono atu pau a be nen ngan aken ye.
Awete pong nen,
yesoo atara lok le atu pang Maro be ole ilongo pataraungu kiang le ikarata dada a be adu tana nga,
ngan ole apola akamatang mulu.
23 Epapras,
yo amru amyepe rumu dook tiap kidi talnga dikidiki lono ye yo amraia bingi dook mata ke Yesu Kirisi i,
in iyawara lo ponana ki pong.
24 Inbe di diek yo tisu au ye urata nga,
Maka iye Aristakus inbe Demas inbe Luka,
ngan di lapau tiyawar lo ponana kidi pong.
25 Le apatarau nen be Tool Mai kiidi Yesu Kirisi yo iyepe lomim i,
in lono pang a iyei dada dook mata pang.