Dada Dook Mata Yo Be Kupatomonai Di Tooltool Ye Nga
2
1 Bong Titi,
kin le kupatomonai di tooltool a titoo dada dook mata yo ipa ye betanga moolmool ke Maro nga.
2 Nen le kupatomonai di tamoto yo maimai nga,
a kuwete pang di a tikan le tiyin mata be,
bong be titoo dada yo dook mata ngan ye di tooltool matadi,
inbe tikaptut di dook ye yepongo kidi,
inbe titara lodi medana pang Maro le ikenen leu,
inbe lodi pang di diedi mai san,
inbe tikodo le timede be tisolo urata yo moonoo nga.
3 Le gaongo leu,
kupatomonai di garup yo maimai nga,
a kuwete pang di be tiyepe dawa ben di tooltool yo tiraua pang Maro nga.
Nen le kuwete pang di a tillung pang di diedi a tigarung edi be,
inbe titoo lodi yo ke yinungu ooroo wain surunu in mata be,
bong ole tipatomonai di tooltool ye dada yo dook mata nga.
4 Le kuwete pang di nen a be nen ngan di garup tina yo maimai nga,
ngan di la be tipatomonai di garup kakase paunu ngan ye dada dook mata yo be titoo nga.
A be nen ngan lodi pang di niditooroo le di natudi mai san,
5 inbe tikaptut di dook ye yepongo kidi,
inbe matadi pang ye di niditooroo leu,
inbe tiyei urata ke be matadi kala rumu kidi le di niditooroo le di natudi,
inbe tiyei dada dook mata yo ke kamatanga di tooltool nga,
inbe tiraua pang di niditooroo.
Le kumata be titoo patomonaingi dook mata i nga,
ngan la be di tooltool yo ke Kirisi tiap,
ngan o ke be tipili betanga yo ke Maro in tiap nga.
6 Ngan gaongo leu,
kuwete pang di tamoto kakase yo paunu nga,
a kupamede lodi a be nen ngan tikaptut di dook ye yepongo kidi.
7 Inbe ong taum ye so le imot yo be kuyei nga,
ngan kutoo dada dook mata a be nen ngan tikamatong ngan titoo ong ye dada dook mata yo kuyei nga.
Le be kupatomonai di tooltool nga,
ngan kugaua lom le atu moolmool be kulon di,
inbe kukarata betanga le dook muku ngan,
lo ngan be kupatomonai di ye kooti.
8 Inbe kupatomonai di ye betanga yo tarantatu ke be di tooltool tipili tiap nga,
a be nen ngan di koi kiidi,
ngan moomoodi,
yesoo tipuske touo betanga dook tiap sa yo be tiwete paidi ye ngan tiap.
9 Inbe kupatomonai di tooltool yo tiyei urata ben di poranga nga lapau,
a kuwete pang di be tiraua pang di kuto maimai kidi ye so nga le imot.
Nen le kuwete pang di a tiyei urata le tinidi bese,
a be nen ngan di kuto maimai kidi lodi ponana ye di.
Inbe kuwete pang di a tirau betanga kidi kuto maimai kidi ye betanga sa yo dook tiap ngan be,
10 inbe kin titarkoo so ke di kuto maimai kidi a tipinoo be,
bong be tiyei urata kidi dook mata a be nen ngan di kuto maimai kidi tiwete di be di ngan tooltool moolmool.
Le kumata be titoo koom a tiyei urata kidi dook mata le imot nga,
ngan ole iyei di tooltool le tipayiti patomonaingi ke Maro.
Ya in tool tani yo be ipamulidi i.
11 Le kupatomonai di tooltool yo titara lodi medana pang Yesu nga,
ngan nen,
yesoo Maro lono paidi a iyei dada dook mata paidi.
Ngan la le iyeie dada dook mata yo be ipamulidi le imot ye so dook tiap yo be igarungidi i.
Ngan dada dook mata tani yo iyeii paidi i,
in se pombe mallangana.
12 Ngan betanga ke dada dook mata tani,
in ipatomonai idi a be nen ngan tayege dada le imot yo Maro lono be tatoo tiap nga,
inbe tawala muridi pang so ke tana yo ikap matada mata nga.
Inbe ipatomonai idi be takaptutidi dook ye yepongo kiidi,
inbe tayei dada dook mata yo tarantatu ngan pang di tooltool,
inbe tatoo dada le imot yo Maro lono be tatoo nga.
Le nookoot tayepe nga,
ngan tatoo patomonaingi tani,
13 yesoo tatara lodo le atu inbe tanama so dook mata yo be pombe i.
Ngan so tani in lal yo Yesu Kirisi be ipa ye nunngana a si pombe mallangana ye i.
Ya in Maro kiidi yo ene mai,
inbe tool tani yo be ipamulidi i.
14 Ngan Kirisi tani in ya taunu iraia tinini a tiraumate a be nen ngan ipamulidi ye noonoo le imot yo iparamidi nga.
Inbe iyei nen a be nen ngan igiri noonoo kiidi a tayepe dawa ben di tooltool ki ya taunu inbe tinid bese be tayei urata yo dook mata ngan leu.
15 Ngan nanga,
ole kupatomonai di tooltool ye betanga nga.
Inbe kupamede lodi a be titoo patomonaingi yo dook mata nga,
inbe kuwete le koom mede a kulele di ye dada dook tiap yo tiyei nga.
Maro itarong be kuyei urata tina nga,
le ke be di tooltool titarong kudu lopo inbe tiwil betanga kiong,
ngan tiap.