Kuwetewete Bingi Dook Mata Ke Maro
4
1 Timoti,
au lok be awete betanga medana pong ye Maro iye Yesu Kirisi matadi.
Ngan Yesu in tool tani yo be ikarata betanga kidi tooltool yo tiyepe matadi rerene nga,
inbe di tooltool yo timmata koot nga,
ngan lapau.
Inbe ya in tool tani yo be isi pombe mallangana a be matan kala di tooltool ki i.
Nen le ye Maro iye Yesu Kirisi matadi ngan awete betanga medana tani pong nen,
2 kin kuwetewete bingi dook mata ke Maro pang di tooltool.
Le be di tooltool lodi be tilonga too tilonga tiap nga,
ngan dook mata,
bong ong in kukaratong dook a kuwetewete bingi dook mata tani in pang di.
Nen le kupadun di ye panga kidi,
inbe kuwete le koom mede a kulele di ye dada dook tiap kidi yo tiyei nga,
inbe kupamede lodi lapau.
Le ye kene yo be kuyei so yo nga,
ngan kin katem malmal tarai pang di be,
bong kupatomonai di dook.
3 Ngan kuyei so yo nga,
yesoo pang dama ni nga,
ngan ole di tooltool lodi be titar talngadi a tilongo betanga yo tarantatu,
ngan tiap.
Bong ye di tapdi lodi ngan be tikap di tooltool alunu be man tipatomonai di ye betanga yo tiwete pang di a tilongo,
ngan talngadi gorengana ye nga.
4 Di tooltool tina ole lodi be titar talngadi a tilongo betanga yo moolmool in tiap,
bong titar talngadi pang betanga sokorai yo taukan punu nga.
5 Bong Timoti,
ong taum kin koptutong dook ye lal nga le imot a nen ngan kukodo le tutube a kusolo urata moonoo yo be pombe pang yong nga,
inbe kuraia bingi dook mata pang di tooltool yo lodi galanga ye Maro tiap nga,
inbe kuyei urata ye so le imot yo Maro ikap pong be kuyei nga.
Paulu Ikanamaii Ngan Potai Be Imata
6 Ngan ye yo awete pong nen nga,
yesoo lal kiau yo be ayege tana ye in iman potai oo.
Nen le rara kiau i dawa ben ooroo wain surunu yo di tooltool ke paroranga so titioo be tiyei paroranga pang Maro ye i.
7 Au i apatoko ye patokongo yo dook mata i,
inbe adada ye ni ke parsukungu a aman pombe ye ker oo,
inbe bingi dook mata ke Maro yo idi nga tatara lodo medana ye i,
in aparama le imede.
8 Le nookoot nga balingi kiau la iken a inamau ye malala ke Maro ngo.
Ngan balingi tani in nen ole Tool Mai ipootau be au i tool noonoonoo.
Le ye lal yo be Tool Mai imulu a isi be si ikarata betanga kidi tooltool ye dada ki yo noonoonoo in nga,
ngan ole ikauu pau.
Bong o ke be ikauu pau au taleu tiap.
Ole ikap pang di tooltool le imot yo lodi be tikamata imulu a isi pombe mallangana nga,
ngan lapau.
Timoti Be Ipa Tarai A Iman Pang Ye Paulu
9 Timoti,
au i lok be kusere dada sa yo be kuman pang yau palbe leu ye i.
10 Yesoo,
Demas in lono mai san pang so yo ke tana i nga le iyegau a ila pang malala mai Tesalonaika oo.
Inbe Keresen in ila pang tana mai Galesia,
inbe Titi in ila pang Dalmatia.
11 Le Luka ya taleu la amru amyepe i.
Ngan la kene yo be kuman ye in nga,
ngan kouo Maka a angru kaman.
Yesoo,
ya in tool dook mata ke be ilonau ye urata kiau.
12 Ngan Tikikus in la awanga a imala pang malala mai Epeses oo.
13 Inbe ye kene yo be kuman ye in nga,
ngan kouo sousoungu kiau matolene yo ayege a iken Toroas ye rumu ke Kapus in a kuman.
Inbe kop rau lulungu kiau,
inbe kin lom kalli be a kop rau lulungu kapala yo tikarata ye asara kulidi ngan a kuman lapau.
14 Aleksanda tool yo ikarata tutui i,
in iyei dada dook tiap pau mai mata.
Nen le Tool Mai ole iraua dada dook tiap ki tani yo iyeii pau,
in kootoonoo.
15 Le ong lapau,
kin kukawai yong dook ye.
Yesoo,
ya in ikapye be le irautoo betanga yo kiidi nga.
16 Ye kulkulunu kiau lo akodo dama ke tool ke karatanga betanga inbe arau betanga ki nga,
ngan tool atu sa be man ikata suanga yau,
ngan tiap.
Bong di le imot tiyegau.
Ngan tiyei dada nen pau,
bong apatarau pang Maro be kin lon tutu dada dook tiap kidi,
in be.
17 Ngan tiyei nen,
bong Tool Mai si ikodo gigik,
inbe ipamedau ke be awetewete bingi dook mata be nen a di tooltool yo tipa ye rara kidi Yuda tiap nga,
ngan tilonga.
Le dawa ben ikau au ye asara gok yo ene laion in koonoo a asi tana.
18 Ngan nanga,
Tool Mai ole ikau au a ilonau ye so dook tiap le imot yo be igarungau nga.
Inbe ole ikau au dook mata le alo ye di tooltool ki yo be matan kala di ye malala ke Maro nga.
Ya in ene mai san ke be di tooltool tipayiti le ikenen leu le taukan motingi.
Moolmool.
19 Timoti,
kuwete lo ponana kiau pang Pirisila iye Akuila inbe pang di tooltool le imot yo tiyepe rumu ke Onesiporas ngan lapau.
20 Erastus in la iyepe malala mai Korin ni.
Inbe Toropimus in la matamatenge kauu a ayege sila iyepe malala mai Miletus ni.
21 Ngan la Timoti au lok be kusere dada sa yo be kuman pang yau ye i,
lo ngan be talo ye lal ke mou kooti.
Le Ibulus iye Puden ye Linus ye Kolodia,
inbe di diede yo titara lodi medana a aye di amyepe ni nga,
ngan tiyawar lo ponana kidi pong.
22 Le apatarau pang Tool Mai nen,
be iyepe yong,
inbe Maro ole lono pang a iyei dada dook mata pang.