Ole Di Tooltool Tiwala Muridi Pang Maro
3
1 Timoti,
au i lok be lom galanga nen,
ye ke tina yo nookoot tayepe ye nga le ilo ye lal yo be Yesu imulu a isi ye in nga,
ngan ole urata moonoo dook tiap la be pombe i.
2 Yesoo,
ye kene tani in ngan ole di tooltool lodi mai san pang di tapdi leu,
inbe lodi mai san pang pat ke yimoongoo so,
inbe lodi tar be di ngan edi maimai le di tapdi tiyitmak edi,
inbe tiwete betanga dook tiap pang di tooltool kapala,
inbe tilongo betanga kidi tamadi le tinadi a titoo tiap,
inbe tiwete lo ponana kidi pang di tooltool yo tilon di ngan tiap,
inbe titoo dada dook mata yo Maro lono be tatoo ngan tiap lapau.
3 Inbe ole di tooltool lodi mai san pang di tooltool kapala pitiap yege,
inbe lodi be tiye di diede tikarata betanga a tigauagaua tiap,
inbe tiwete mur ye di diedi,
inbe tikaptut di dook ye yepongo kidi tiap,
inbe tikap masngana pang di tooltool kapala,
inbe lodi pang dada dook mata yo noonoonoo ngan tiap lapau.
4 Inbe ole tikap di diedi a titar di la di koi kidi baedi,
inbe katedi ro ye so yo tiyei nga,
inbe lodi tar nen be di ngan edi maimai le tooltool kapala tiyepe parmadi,
inbe lodi mai san pang so yo tiyei a lodi ponana ye nga le lodi mai san pang Maro tiap.
5 Inbe ole tiyei ben di tooltool yo titoo dada dook mata le imot yo Maro lono be tatoo nga,
bong di ngan tiwala muridi pang gurana ke Maro yo be iportak di a titoo dada dook mata le imot yo Maro lono be tatoo nga.
Le Timoti,
kuyepe manga mooloo ye di tooltool yo nen nga.
6 Yesoo,
di tooltool tina ngan ole tila koodi paweserai di garup yo taukadi lo galanga nga,
a tilo rumu lono kidi,
inbe tikap lungunu ye di.
Ngan di garup tina ngan tisolo urata moonoo ye noonoo kidi yo tiyei nga.
Inbe dada dook tiap matana matana yo lodi be tiyei nga,
ngan ole iyolo di le la tiyei noonoo.
7 Nen le kanakana ngan di garup tina lodi be tilongo betanga yo matana matana ngan leu,
bong ke be lodi galanga ye betanga yo moolmool ngan tiap.
8 Di tooltool ke kaplungunu tina ngan dawa ben Yanes iye Yambares yo muku ngan tikapye be tirautoo urata ke Mose nga.
Ngan dada gaongo leu,
tikapye be tirautoo betanga moolmool.
Di ngan kutodi lono ikau urata dook tiap le lodi kap gogo dada dook tiap.
Inbe di ngan tikapsap ye dada dook mata yo tatara lodo medana pang Kirisi ye i.
9 Bong di tooltool ke kaplungunu tina o ke be tikap lungunu ye di tooltool le mooloo mata ngan tiap,
yesoo di tooltool ole lodi galanga ye di be ngan tiyei kapa dawa ben muku ngan Yanes iye Yambares tiyei kapa nga.
Kuparama Betanga Ke Maro Le Imede
10 Bong Timoti,
ong in lom galanga dook ye patomonaingi kiau,
inbe ye yepongo kiau,
inbe ye so yo lok kap be ayei nga,
inbe ye lok medana yo ataru i.
Inbe lom galanga yau nen au i ke be katek malmal tarai tiap,
bong lok pang di tooltool mai san,
inbe akodo le tutube a asolo urata moonoo yo pombe pang yau nga.
11 Inbe lom galanga yau nen,
di tooltool tiyei dada dook tiap a tigarungau ye yo atoo Kirisi nga,
le lom galanga ye masngana dook tiap yo pombe pang yau i.
Inbe lom galanga ye masngana tina ngan pombe pang yau la Antiok le Aikoniam le Listara nga.
Ngan di tooltool tiyei dada dook tiap a tigarungau ye yo atoo Kirisi nga,
bong Tool Mai la ilonau a ipamulau ye urata dook tiap tina yo tiyei pau nga.
12 Bong awete pong nen,
di tooltool le imot yo lodi be titoo dada dook mata le imot yo Maro lono be tatoo nga,
inbe titara lodi medana pang Yesu Kirisi nga,
ngan ole di tooltool tiyei dada dook tiap nen a tigarung di ye lapau.
13 Bong di tooltool yo dook tiap ngan tiye di tooltool ke kaplungunu ole tiyei dada dook tiap le dook tiap ki taunu.
Ole tillung di tooltool,
inbe di tooltool kapala ole tillung di lapau.
14 Bong Timoti,
ong in lom galanga ye di tooltool yo tipatomonai ong ngan nen,
be di ngan tiwete betanga moolmool.
Le kutoo betanga yo tipatomonai ong ye nga,
inbe kutara lom medana ye le ikenen leu.
15 Yesoo,
ye kene yo ong kase ye in nga,
ngan ong in lom galanga ye rau mison ke Maro.
Ngan rau tani in la ipagalanga lom nen be Maro ipamulong ye so dook tiap yo be igarungong in ye lom medana yo kutaru pang Yesu Kirisi i.
16 Betanga le imot yo tiwodo lo ye Rau ke Maro nga,
ngan ipa ye Amunu.
Nen le betanga tina ngan dook mata ke be ilonidi a tapatomonai di tooltool ye,
inbe tawete pang di a talele di ye dada dook tiap yo tiyei nga,
inbe tapadun di ye panga kidi,
inbe tapatomonai di ye dada dook mata noonoonoo ke Maro.
17 Inbe Rau ke Maro tani in ke be ipamede di tooltool ki a be nen ngan tiyei urata matana matana yo dook mata nga le imot.