Di Tooltool Kapala Ole Tillung Di Tooltool Ye Patomonaingi Kidi
4
1 Maro Amunu Silene iwete betanga galangana nen be ke tina yo nookoot tayepe ye nga le ilo ye lal yo be Yesu imulu a isi ye in nga,
ngan ole di tooltool kapala tiwala muridi pang Maro a tiyege lodi medana yo titaru panga i.
Inbe la titar talngadi ye betanga le patomonaingi ke di so sadi yo ke kaplungunu nga,
a la titoo betanga tina yo di tooltool ke kaplungunu ngan tipatomonai di ye nga.
2 Patomonaingi yo nen nga,
ngan ipa ye di tooltool ke kaplungunu yo tiwete pang di tooltool,
ngan medi ru ye betanga kidi a tillung di ye nga.
Ngan di tooltool yo nen nga,
ngan lodi matamata le ke be lodi galanga a tiyetai ye yo tikapsap ye dada dook mata yo lod wetewete be tatoo,
ngan tiap.
3 Nen le di tooltool ke kaplungunu tina,
ngan tigunkala di tooltool ye kerenge,
inbe tigunkala di lapau ye so kapala yo ke kaningi nga.
Bong so tina nga,
ngan Maro itar paidi,
idi tooltool yo tatara lodo medana pang Yesu inbe lod galanga ye betanga moolmool ki nga,
ngan be takap inbe tawete lo ponana kiidi panga ye.
4 Ngan nanga,
so le imot yo Maro itar nga,
ngan dook mata.
Le kumata be takap inbe tawete lo ponana kiidi panga ye nga,
ngan ke be tawili sa a ila diki,
ngan tiap.
5 Yesoo,
betanga ke Maro iwete be so yo nen ngan dook mata le imot.
Inbe pataraungu kiidi ngan iyei le dook mata lapau.
Noonoongoo Dook Mata Pang Timoti
6 Le kuwete a kupamadit di diede kapala yo titara lodi medana pang Yesu ngan lodi ye noonoongoo tina yo akap pong nga.
Kumata le be kuyei nen nga,
ngan ole kuyei ben ong in kapraingi dook mata ke Yesu Kirisi.
Inbe Maro ole ipamedong ye betanga moolmool yo tatara lodo medana ye i,
inbe ye patomonaingi dook mata yo kutoo nga.
7 Nen le lok be kuwala murim pang bete sokoraingi yo taukan punu nga.
Betanga yo nen nga,
ngan itoo dada dook mata yo Maro lono be tatoo,
ngan tiap.
Bong kutouotou ong ye dada dook mata le imot yo lono be tatoo nga.
8 Ngan yo a le awete pong be ong taum kutouotou ong ye nga,
yesoo lom galanga ye dada yo be idi taudu tatouotou idi ye urata yo ke tana i,
in so ke be ilonidi ye yepongo kidi ke tana i leu.
Bong be idi taudu tatouotou idi ye dada dook mata yo Maro lono be tatoo i,
in la dada dook mata ke be ilonidi ye yepongo kiidi yo nookoot tayepe ye katai i,
inbe ye yepongo kiidi yo ke pang dama ni,
in lapau.
9 Ngan betanga tani,
in betanga moolmool le ke be di tooltool tikauu a tiparama le imede.
10 Ngan la le idi nga tayei urata mai san be tatoo betanga tani,
yesoo tatara lodo le atu pang Maro yo iyepe nen le taukan matenge i.
Ngan Maro in tool tani yo iyei dada dook mata pang di tooltool le imot i.
Bong di tooltool yo titara lodi medana panga moolmool nga,
ngan di leu la be ikap di a ipamulu di nga.
11 Ngan la kuwete le koom mede ye betanga tina ngan pang di tooltool,
inbe kupatomonai di ye.
12 Bong Timoti,
ole di tooltool tikamatong ngan matadi ru ong,
yesoo ong in tool kase paunu mata.
Bong be nen ngan ole koptutong dook ye di tooltool yo titara lodi medana pang Yesu nga a be tikamatong,
ngan titoo ong ye betebetanga le ye yepongo kiong,
le ye lom yo mai san pang di tooltool le imot i,
le ye lom medana yo kutaru pang Maro i,
inbe ye dada yo kuyepe le taukam busunu ye Maro matana i.
13 Nen le ye kene yo be amala pang yong tarai tiap nga,
ngan kuraia lom le imot inbe kuyei urata kiong ke kinkatingi betanga ke Maro yo iken ye rau nga,
ngan pang di tooltool a kuwetewete bingi dook mata ki pang di,
inbe kupatomonai di ye.
14 Le kin kotte so dook mata yo Maro ikauu pong ye lo ponana ki,
in be.
Ngan so tani in di kuto maimai ke di tooltool yo tigaua ye bareme ke Yesu nga,
ngan tikaua Maro koonoo a tiweta pong ye kene yo tipaloko baedi lo kutom a tipatarau yong ye i.
15 Le ong taum kuraia lom le imot a kutoo betanga tina yo nga,
a be nen ngan di tooltool le imot tikamatong ben nookoot nga kutara lom le imede,
inbe kusootoo yeingi urata yo Maro lono be kuyei nga.
16 Kin koptutong dook ye yepongo kiong inbe ye betanga kiong yo kupatomonai di tooltool ye nga.
Nen le kuyei urata tina yo nga le ikenen leu,
yesoo kumata le be kuyei nen nga,
ngan ole Maro ipamulong kuye di tooltool yo titar talngadi a tilongo betanga kiong nga ye so dook tiap yo be igarungang i.