1 TIMOTI
Rau Yo Paulu Iwode Pang Timoti I, In Atu Ki
1
1 Au Paulu yo aposol ke Yesu Kirisi i,
in la awodo rau naii pong Timoti i.
Ngan ye betanga medana ke Maro,
tool yo be ipamulidi ye so dook tiap yo be igarungidi i,
in iye Yesu Kirisi,
tool yo tatara lodo le atu panga be ilonidi i,
in yaru la titarau be ayei urata i nga.
2 Ngan rau i awode pong Timoti.
Ong in ye lom medana yo kutaru pang Maro i,
in le dawa ben au natuk moolmool nga.
Nen le apatarau pang Tamada Maro iye Yesu Kirisi yo Tool Mai kiidi i,
in be yaru lodi mulumulu yong a tiyei dada dook mata pong,
inbe tikaua lo silene kidi pong.
Di Tooltool Yo Tipatomonai Di Tooltool Ye Betanga Moolmool Tiap Nga
3 Ngan dawa ben tina yo awete pong muku ye kene yo ayegong a be ala pang tana mai Masedonia ye in nga,
ngan le awete pong mulu nen,
be sila kuyepe la malala mai Epeses ngan.
Ngan be sila kuyepe a be nen ngan kuwete le koom mede a kulele di tooltool ke kaplungunu a kin tipatomonai di tooltool ye betanga kidi yo moolmool tiap ngan mulu be.
4 Inbe kuwete a kulele di kin titu ye urata ke bete sokoraingi yo taukan punu,
inbe ye pitingi di rara kidi edi le mooloo mata be.
Betanga yo nen ngan ke be iyei di tooltool a koodi parkap ye leu,
bong ke be ilon di a tiyei urata ke Maro,
ngan tiap.
Ye dada yo be tayei urata ke Maro ye in nen,
be tatara lodo medana panga leu.
5 Ngan ye punu yo a le awete pong be kulele di ye i,
in nen.
Idi tooltool yo tatara lodo medana pang Kirisi nga,
ngan be lodo pang di diede mai san.
Ngan kumata le lodo be tayei so yo dook mata ngan leu,
inbe tatoo dada dook mata yo lod wetewete ye be tatoo nga,
inbe tatara lodo medana moolmool pang Kirisi nga,
ngan ole lodo pang di diedi mai san.
6 Bong di tooltool kapala ke kaplungunu tina ngan tikapsap ye dada dook mata yo nen nga,
inbe la titoo bete sokoraingi yo taukan punu nga.
7 Di ngan lodi be tiyei ben di tooltool ke patomonaingi di tooltool ye ger ke Maro,
bong di tapdi ngan lodi galanga dook ye betanga yo tiwete,
ngan punu tiap.
Inbe ye so tina yo tiwete le koodi mede ye a tipatomonai di tooltool ye nga,
ngan di tapdi lodi galanga dook ye betanga kidi,
ngan tiap lapau.
8 Ngan idi tooltool yo ke Kirisi nga,
ngan lod galanga nen,
ger ke Maro yo ikap pang Mose nga,
ngan ger dook mata.
Le kumata be tool sa ipatomonai di tooltool ye ger tina ngan dook mata ben yo Maro ya taunu lono be ipatomonai di ye nga,
ngan ole ger tina ngan iyei ben so dook mata pang di.
9 Bong idi nga lod galanga lapau nen,
ger ke Maro yo itar nga,
ngan pang di tooltool yo noonoodi,
ngan tiap.
Bong ger tina ngan pang di tooltool yo tisak noonoongoo a tilongo betanga tiap nga,
inbe pang di tooltool yo titoo dada dook mata yo Maro lono be tatoo ngan tiap a tiyei noonoo mata nga,
inbe pang di tooltool yo tiwala muridi pang dada dook mata le imot yo Maro lono be tatoo nga,
inbe pang di tooltool yo lodi tar be sungunu in so sokorai nga,
inbe pang di tooltool yo tiraumata di tamadi too di tinadi a timmata nga,
inbe pang di tooltool yo tiraumata di diedi a timmata nga,
ngan lapau.
10 Inbe ger tina ngan pang di tooltool yo tiyei dada dook tiap ke bauk nga,
inbe pang di tooltool yo tiyei dada dook tiap ben di tooltool ke Sodom le Gomora nga,
inbe pang di tooltool yo tipinoo di tooltool kapala a man tiporo di ye urata nga.
Inbe ger tina ngan pang di tooltool yo tiwete betanga kidi ngan moolmool tiap nga,
inbe pang di tooltool yo tiwetewete ngan tillung a tiwete moolmool le ete be tipamede betanga kidi ye nga,
inbe pang di tooltool yo tiyei dada dook tiap kapala yo be irautoo betanga yo tarantatu nga,
ngan lapau.
11 Ngan betanga tani,
in ipa ye bingi dook mata yo Maro ikauu pau be aweteweta pang di tooltool i.
Inbe bingi dook mata tani i,
in iwetewete ye Maro yo iyei urata dook mata pang di tooltool ki i.
Ngan ya in ene mai san ke be di tooltool tipayiti.
Lo Ponana Ke Paulu
12 Le awete lo ponana kiau pang Yesu Kirisi yo Tool Mai kiidi i,
in ye yo lon tarau ben au tool moolmool a le ipootau inbe ipamedau be ayei urata ke raingi bingi dook mata ki nga.
13 Muku ngan akan paseme Yesu,
inbe akap malmal a arau sokorai di tooltool yo titara lodi medana panga nga.
Bong Tool Mai lon mulumulu yau,
yesoo muku ngan atara lok medana pang Yesu tiap,
le lok galanga ye urata dook tiap yo ayei,
ngan tiap.
14 Ngan la Tool Mai kiidi in lono pau a iyei dada dook mata nen kaiye pau nga.
Ngan ye dada dook mata tani yo Yesu Kirisi iyeii pau i,
in la atara lok medana panga,
inbe lok pang di tooltool kapala mai san,
ngan lapau i.
15 Le betanga yo be aweta pong i,
in betanga moolmool a kouu a kuparama le imede.
Ngan betanga tani in nen;
Yesu Kirisi isi tana be si ikap di tooltool ke noonoo a ipamulu di ye so dook tiap yo be igarung di i.
Ngan di tooltool tina,
ngan atu yo illos di diene le imuku pang di ye yeingi dada dook tiap i,
in la au i.
16 Ngan ye punu yo a le Maro lon mulumulu yau,
au tool dook tiap tani ke noonoo i,
in nen a be nen ngan di tooltool tikamatau ben Yesu Kirisi,
in katen malmal pau tarai tiap.
Le di tooltool tina yo be titara lodi medana panga a be tiyepe ye yepongo dook mata yo taukan motingi in nga,
ngan lodi galanga nen be ole iyei dada gaongo leu nen pang di lapau.
17 Le tayitmaka Maro yo iyei tool kuto mai a matan kalidi le imot i.
Ya in iyepe nen le taukan motingi,
inbe ya in taukan matenge,
inbe o ke be takamata ye matada tiap lapau.
Ya taleu in la Maro i.
Le tayitmaka ene inbe tayei ne,
“Maro,
em mai san ke be di tooltool tipayitong le ikenen leu le taukan motingi.”
Moolmool.
18 Natuk Timoti,
nga be awete a apamedong ye betanga tina yo muku ngan di tooltool tikaua Maro koonoo a tiwetewete yong nga.
Nen le lom tut a kutoo,
inbe kuparama le imede a be nen ngan kupatoko ye patokongo yo dook mata i.
19 Ngan la kuparama lom medana yo kutaru pang Maro i,
in le ipa ye dada dook mata yo lom wetewete ye be kutoo,
in lapau.
Ngan di tooltool kapala lodi pang dada dook mata yo lodi wetewete ye be titoo ngan tiap.
Nen le tigarungu lo medana kidi yo titaru pang Yesu i,
in le dook tiap dawa ben ookoo isauloko a imassoroko le dook tiap ki taunu nga.
20 Le di tooltool tina nga,
ngan di diedi ru la Aimenias iye Aleksanda nga.
Di suru tina ngan asuket di la Satan baene a be tisolo masngana a iso matadi,
a be nen ngan tikan paseme Maro ye betanga dook tiap mulu be.