Paulu Iwete Ye Urata Ki Yo Iyei Tesalonaika Nga
2
1 Ang di diemam nga,
ang tapmim ngan lomim galanga ye urata kiam yo amyei ye kene yo mala amyang tayepe ye in nga,
ngan le itar kanono dook mata.
2 Inbe lomim galanga nen,
ye kene yo ammala yang tiao,
bong amyepe Pilipai go nga,
ngan tipammoo am ye betanga dook tiap,
inbe tigarung tinimam a amsolo urata moonoo masngana mai san.
Bong ye kene yo ammala pombe pang yang ye in nga,
ngan Maro kiidi tani in ipamede lomam le amraua pang di tooltool alunu yo tiyei ben di koi kiam,
ngan tiap.
Bong amkodo le ammede,
inbe amwetewete pang ye bingi dook mata ke Maro.
3 Nen le ye kene yo amwetewete pang be katara lomim medana pang Yesu ye in nga,
ngan amwete googoomam ye betanga sa,
inbe amyei touo dada yo dook tiap ngan sa,
inbe amkapye be amkaua lungunu yang ye so sa,
ngan tiap.
4 Bong Maro itou am oo,
motong la ye ya taunu lono ngan ikaua urata i pam be nen a amraia bingi dook mata ki pang di tooltool.
Nen le am nga amyeie urata tani i,
a be nen ngan di tooltool ole lodi ponana a tiyitmak emam ye,
ngan tiap.
Bong amyeie urata tani a be nen ngan Maro ole lon ponana ye,
yesoo ya in tool tani yo ikamata lomam i.
5 Ang ngan lomim galanga yam dook nen,
ammala pang yang ngan koomam paweserai ang,
inbe matamam gorengana ye so kiang sa la le amwete betanga dook mata pang nen nga,
ngan tiap.
Ngan Maro lon galanga nen be dada yo amyei ngan dook mata le imot.
6 Inbe am nga amyei urata nen a be nen ngan kayitmak emam,
too di tooltool kapala tiyitmak emam ye,
ngan tiap.
Le moolmool,
am nga amyei aposol ke Kirisi,
le kumata lomam be amwete pang ye so sa be kalonam ye nga,
ngan dook mata.
7 Bong ye kene yo amyang tayepe ye in nga,
ngan am nga lomam iken silene pang,
inbe amyei dada dook mata pang dawa ben kase mitiap yo tinana ipayinu i.
8 Inbe am nga lomam pang mai san,
ngan la le lomam ponana be amkaua bingi dook mata ke Maro pang.
Inbe am nga lapau amkaratam le lomam atu be amrai tinimam be nen a amlonang,
yesoo ang ngan kayei dawa ben ang ngan di tooltool kiam moolmool.
9 Le ang di diemam nga,
lomim tut ye urata mai yo amyei ye baemam ye kene yo amyang tayepe,
inbe amwetewete pang ye bingi dook mata ye i.
Ngan amyei urata mai san ye ke le bong a be nen ngan kalon sokorai am ye kaningi le so be.
10 Ang ngan kakamata dada kiam yo amyei pang ang di tooltool yo katara lomim medana pang Kirisi,
ngan oo.
Inbe Maro lapau,
ya ikata suanga yam ye dada kiam tani.
Ngan amtoo dada dook mata noonoonoo yo ke Maro nga,
inbe amyepe le taukamam busunu ye matana ben di tooltool ki yo ipootoo di panga ya taunu nga.
11 Le ang ngan lomim galanga nen,
amyei ang dook mata dawa ben kase mitiap yo tamana iyei dada dook mata panga i.
12 Ngan nen le am nga amkap betanga dook mata pang ke be ampamede lomim ye,
inbe ampamadit lomim a be nen ngan kakodo le kamede inbe kasolo urata moonoo yo be pombe pang yang nga.
Inbe amwete pang le koomam mede,
a be nen ngan katoo dada dook mata yo Maro lono be katoo nga.
Ngan ya in ikiu ang be lo kagaua ye di tooltool yo matan kala di nga,
a be nen ngan kayepe dook mata ye nunngana.
Di Tesalonaika Tisolo Urata Moonoo Dawa Ben Di Diedi Yo Tiyepe Yudia Nga
13 Kanakana ngan amwete lo ponana kiam pang Maro ye so san mulu lapau.
In nen,
ye kene yo kakaua betanga ke Maro yo amwete pang ye in nga,
ngan le kakauu dawa ben betanga ke di tooltool nga tiap,
bong kakauu dawa ben betanga moolmool ke Maro.
Ngan betanga ki tani in ikaua urata le imede ye ang di tooltool yo katara lomim medana pang Kirisi nga,
ngan lomim.
14 Le ang di diemam nga,
urata moonoo yo pombe pang yang nga,
ngan dawa ben yo pombe pang ye di tooltool ke Yudia yo titara lodi medana pang Yesu Kirisi a tigaua ye bareme ke Maro nga.
Le ang ngan kakaua urata moonoo masngana ye di Tesalonaika dawa ben di tooltool ke Maro yo tiyepe Yudia nga,
ngan tikaua urata moonoo masngana nen ye di diedi yo Yuda ngan baedi nga.
15 Ngan di Yuda tina,
ngan la tiwete a tiraumata Tool Mai Yesu,
inbe di tapdi tiraumata di Maro koonoo a timmata,
inbe di ngan la tingangam lapau nga.
Inbe di ngan tiwala muridi pang dada dook mata ke Maro yo lono panga nga,
inbe tikadon di tooltool nga le imot.
16 Nen le di ngan tikapye be tiwonokala dada yam,
a be nen ngan amwetewete betanga ke Maro pang di tooltool yo tipa ye rara kidi Yuda tiap,
ngan be.
Yesoo bong lodi nen,
be nen a Maro ikap di tooltool tina ngan a ipamulu di be.
Le dada dook tiap ke noonoo yo kanakana ngan tiyei nga,
ngan iloko lo noonoo kidi kapala yo muku ngan tiyei ngan pono,
nen le noonoo kidi alunu le alunu san.
Ngan nen le kate malmal ke Maro la si iken ye di koot i.
Paulu Lono Be Le La Ikamata Di Tesalonaika Mulu
17 Ang di diemam nga,
ye kene yo di tooltool tingangam a amyegang ye lal modono kasin leu nga,
ngan le amkamata matamim mulu pitiap,
bong ye lomam nga,
ngan iken yang.
Ngan nen le lomam mai san be le mala amkamatang pa mulu.
Le amkaua urata mai ye serenge dada yo be ammulu a ammala pang yang ye i.
18 Moolmool,
am nga lomam be ammulu a ammala pang yang,
ngan nen le au tauk Paulu i,
kanakana ngan akaua urata mai san ye serenge dada sa yo be amala ye i,
bong Satan iyakala dada kiam yo be ammala pang yang ye i.
19 Kakamata,
ye kene yo Tool Mai kiidi Yesu Kirisi be imulu a isi a takodo dama ki ye in nga,
ngan ole lomam ponana ye soo so?
Inbe Maro ole iyitmak emam ye soo so?
Inbe ye lal tani nga,
ngan ole amtar matamam pang Maro ye soo balingi be amkauu ye urata kootoonoo kiam i?
So tani in la ang ngan.
20 Le moolmool,
ye punu yo be lomam ponana inbe Maro iyitmak emam ye i,
in ye ang tina ngan.