1 TESALONAIKA
Rau Yo Paulu Iwode Pang Di Tesalonaika I, In Atu Ki
1
1 Au Paulu aye Selas inbe Timoti amyawar lo ponana kiam pang ang di tooltool yo kagaua ye bareme ke Yesu a kayepe ye malala mai Tesalonaika nga.
Ang ngan di tooltool ke Tamada Maro iye Tool Mai kiidi yo Yesu Kirisi i.
Nen le ampatarau pang Maro be lono pang a iyei dada dook mata pang,
inbe ikaua lo silene ki pang.
Paulu Lon Ponana Ye Yo Di Tesalonaika Titara Lodi Medana Pang Kirisi Nga
2 Am nga,
ye ke kanakana ngan amwete lo ponana kiam pang Maro yang le imot.
Inbe ye kene yo be ampatarau ye in nga,
ngan ole amtarang kalo ye pataraungu kiam lapau.
3 Le ye kene yo be ampatarau pang Tamada Maro yang nga,
ngan ole lomam tutang ye dada dook mata yo katoo i.
Ngan ang ngan katara lomim medana pang Maro le kayei urata yo ki nga,
inbe lomim pang di diemim kapala mai san nen le kalon di.
Inbe ang ngan katar matamim ye Tool Mai Yesu Kirisi,
inbe kanamu be imulu a isi,
ngan la le kakodo le kamede,
inbe kayei urata yo ki nga.
4 Nen le ang di diemam nga,
Maro lono pang mai san,
inbe am nga lomam galanga nen,
ya taunu la ipootang panga i.
5 Le amwete pang nen,
yesoo ye bingi dook mata tani yo amweteweta pang i,
in mala pombe pang yang dawa ben betanga sokorai ngan tiap,
bong ipa ye gurana ke Maro Amunu Silene.
Inbe am nga amtara lomam le imede nen be bingi dook mata tani yo amweteweta pang i,
in moolmool le imot.
Le dada kiam yo amyei a amlonang ye nga,
ngan kakamata a lomim galanga ye oo.
6 Inbe lomam galanga lapau nen,
be Maro ipootang panga,
yesoo ang ngan lomim ponana be kakap betanga yo kiam nga.
Le moolmool,
urata moonoo dook tiap alunu la pombe pang yang nga,
bong Maro Amunu Silene ilonang le lomim dook mata be kasolo.
Le dada tani yo kayeii nen i,
in katoo am amye Tool Mai ye dada kiam yo amyei nga lapau.
7 Ngan dada dook mata tani yo kayeii i,
in di tooltool le imot yo titara lodi medana pang Kirisi a tiyepe ye tana mai Masedonia le Akaia nga,
ngan tilongo gasanga ki.
Nen le ang ngan kapatnaia dada dook mata pang di a be titoo lapau.
8 Le betanga ke Tool Mai in ipa yang a idada a ila dawa ben tauru yo tamaii ngan itang a kalngana ipa le ila ni mooloo mata i.
Ngan nen le betanga tani in ila iken ye tana ke Masedonia le Akaia leu tiap,
bong ye malala tina le imot nga,
ngan tilongo bingi kiang ye yo katara lomim medana pang Maro nga.
Nen le am nga taukamam urata yo be amwete pang di ye mulu nga.
9 Bong di tooltool tapdi tiwete pam ye kene yo ammala yang nga,
ngan kakau am a kayei dada dook mata pam nga.
Inbe tiwete pam nen lapau be ang ngan kawala murimim pang di maro yo kai padodo nga,
inbe kaportak lomim pang ye Maro moolmool yo iyepe nen le taukan motingi i.
10 Inbe tigasa pam ye yo kanama Maro Natunu yo be ipa ye malala ke Maro a isi i.
In Natunu tani yo muku ngan imata,
motong ipamaditi mulu ye ni ke matenge i.
Ya in Yesu,
inbe ya la be ikau idi a ipamulidi ye kate malmal ke Maro yo be pang dama ni ngan pombe i.