Yepongo Gurunu Inbe Yepongo Paunu
3
1 Ang ngan Maro ipamaditang kaye Kirisi ye ni ke matenge oo.
Nen le katara lomim pang ye so dook mata yo iken ye malala ke Maro i.
Ngan ye ni tani,
in Kirisi iwur ye Maro baene oonoo.
2 Nen le dada dook mata in nen,
ye lal nga le imot ngan lomim kaua urata ye so yo iken ye malala ke Maro,
ngan leu.
Bong kin lomim kaua urata ye so yo ke tana i,
nga be.
3 Ngan awete nen,
yesoo ang ngan lomim gurunu yo ke noonoo in imata oo.
Inbe yepongo kiang in nookoot nga iken sollono ye Kirisi yo iye Maro tiyepe i.
4 Le yepongo kiang tani,
in ipa ye Kirisi.
Nen le ye kene yo be imulu a si pombe mallangana inbe di tooltool tikamata ben ene mai san ke be tipayiti nga,
ngan ang lapau ole kaye kayepe ye nunngana yo mai mata i.
Idi Nga Tayei Ben Tooltool Paunu
5 Ngan nen le dada dook mata in nen,
ole karaumata dada dook tiap ke tana yo iken lomim nga.
Ngan dada dook tiap tina ngan nen;
dada ke bauk,
inbe dada yo giri leu ye Maro matana nga,
inbe dada dook tiap yo tinimim iyolang be kayei nga,
inbe dada dook tiap ke noonoo yo lomim be kayei nga,
inbe dada dook tiap yo be matamim gorengana ye so nga.
Ngan dada yo ke be matamim gorengana ye so i,
in dawa ben dada dook tiap ke sungunu pang di maro yo kai padodo nga.
6 Le kin kayei dada dook tiap yo nen ngan be,
yesoo kate malmal ke Maro ole isi pang ye di tooltool yo tiyei dada dook tiap nen nga.
7 Muku ngan,
ang ngan kapa le kayei dada dook tiap yo nen nga.
8 Bong nookoot nga ole kakatte dada dook tiap le imot yo ben dada ke kate malmal le passakungu,
inbe dada matana matana yo be kakap masngana pang di tooltool kapala,
inbe dada ke be kawete mur ye di diemim,
inbe dada dook tiap yo kawete betanga dook tiap pang di tooltool kapala,
inbe dada dook tiap yo kawetewete betanga yo giri leu nga.
9 Le kin kallung di diemim kapala be,
yesoo kagiri lomim gurunu in le ipa ye dada dook tiap yo ki,
ngan oo.
10 Inbe ang ngan kayei ben tooltool paunu,
yesoo Maro yo iyei so le imot a iyei paunu mulu i,
in iportak lomim le iyei paunu.
Ya in iyei nen le ole lomim galanga ye moolmool,
inbe ole kayepe le dawa ben ya i.
11 Ngan nen le idi tooltool yo tayei paunu koot nga,
ngan idi le imot tayepe gaongo leu.
Le kin tawete be idi nga ke Girik too ke Yuda,
too idi nga tikoro tiniidi too tikoro tiniidi tiap,
too idi nga tool gok,
too idi nga ke malala Siktia,
a too idi nga tool ke poranga too poranga tipa,
ngan be,
yesoo so tina yo nen nga,
ngan so sokorai.
Bong so yo maiyoko i,
in la Kirisi yo iyepe idi atu atu lodo i.
12 Ngan ang ngan Maro lono pang mai san,
inbe ipootang panga,
le kayei ben di tooltool ki ya taunu yo taukadi busunu ye matana nga.
Ngan nen le ole katoo dada dook mata yo nen nga.
Ole lomim pang di diemim a kayei dada yo dook mata ngan pang di,
inbe ole katoo dada yo be karautoo ang le kadu lopo ye di diemim kapala nga,
inbe kayepe le katemim sil dook mata pang di tooltool kapala,
inbe kin katemim malmal tarai pang di tooltool be.
13 Nen le kumata em atu be iyei dada dook tiap sa le be kam betanga sa ye nga,
ngan kin katem malmal ye be,
bong kutoko too katem,
inbe kugiri dada dook tiap ki ke noonoo yo iyei nga.
Ngan Tool Mai igiri noonoo yo kiang ngan oo,
le be nen ngan ole ang lapau kagiri noonoo kidi diemim yo tiyei pang nga.
14 Inbe dada dook mata atu yo be kayeii le ipa ye dada dook mata kapala in nen,
ole lomim mai san pang di tooltool kapala.
Ngan dada dook mata tani in iduk so nga le imot le ang ngan ke be kagaua lomim le atu.
15 Ang ngan,
Kirisi igau ang a kagaua le atu panga,
le ang ngan kayei ben baene le kene inbe soonoo kapala yo ke tinini nga.
Le kumata be nen nga,
ngan kayepe le lo silene ke Kirisi in iyakala lomim ye dada yo be kayei nga,
yesoo ang ngan Maro ipootang be kayepe nen.
Inbe kawete lo ponana kiang panga lapau.
16 Inbe kaparama betanga ke Kirisi le imede ye lomim,
a be nen ngan kayei urata kiang ye.
Ngan nen le ole katoo lo galanga kiang le imot yo Maro ikap pang nga,
inbe kapatomonai di diemim kapala ye dada yo dook mata nga,
inbe kakarata di ye dada dook tiap yo tiyei nga.
Inbe ang ngan kawou woungu yo iken ye Rau ke Woungu nga,
inbe woungu kapala ke lo ponana,
inbe woungu yo Maro Amunu Silene inin pang a iken lomim nga.
Nen le dook mata be kaparama betanga ke Kirisi le imede,
inbe kawou woungu tina le ipa ye lo ponana kiang pang Maro.
17 Inbe soo so yo be kaweta inbe soo so yo be kayei nga,
ngan so tina nga le imot ngan kayei ye Tool Mai Yesu ene.
Inbe ye Tool Mai tani in ene,
ngan kawete lo ponana kiang pang Tamada Maro lapau,
yesoo ya in la ilonidi i.
Noonoongoo Pang Di Tooltool Ke Kirisi
18 Ang di garup yo kerenge nga,
ole karaua pang di nimimtooroo.
Ngan dada yo nen i,
in la dook mata ye Tool Mai matana i.
19 Inbe ang di tamoto yo kerenge nga,
ole lomim mai san pang di rimamim.
E kin katemim malmal tarai pang di be,
bong kayepe le lomim sil dook mata pang di.
20 Inbe ang di kakase,
ole karaua pang di tamamim le di tinamim ye so tina nga le imot.
Ngan dada dook mata yo nen in la Tool Mai lon ponana ye i.
21 Inbe ang di kakase tamadi,
kin kayei di natumim a katedi malmal be.
Ole nen ngan lodi tar be o ke be tiyeie urata sa dook,
ngan tiap.
22 Inbe ang sema yo kayei urata ben di poranga pang di kuto maimai kiang ke tana i nga,
ngan ole kalongo betanga kidi a katoo dook ye so nga le imot.
Le kin kakaua lungunu ye di ben di tooltool kapala tiyei,
nga be.
Di ngan tiyei urata dook mata leu ye kene yo di kuto maimai kidi timan potai a tikamata di nga,
a be nen ngan lodi dook mata pang di.
Bong ang ngan kagaua lomim le atu be kayei urata dook mata ye kene yo kuto mai kiang ikamatang ye i,
inbe ye kene yo iyepe manga mooloo yang,
ngan lapau.
Ngan nanga,
kaporonaia Tool Mai,
inbe kagaua lomim le atu be kayei urata dook.
23 Ngan la soo urata yo be kayei nga,
ngan kagaua lomim le atu ye,
inbe kayei dook le imot.
Yesoo,
urata kiang yo kayei nga,
ngan ben kayei pang di tooltool ke tana i tiap,
bong pang Tool Mai.
24 Ngan nen le lomim tut dook ye so dook mata yo Tool Mai ipoto pang di tooltool ki nga,
ngan ole ikap pang ye urata kootoonoo kiang.
Le tool kuto mai moolmool yo kayei urata panga i,
in la Kirisi i.
25 Bong kumata le ang tina atu be iyei dada dook tiap nga,
ngan ole Maro iyemenaii ye dada dook tiap ki yo ikapsap ye i.
Yesoo,
ye kene yo Maro be ikarata betanga kidi tooltool ye in nga,
ngan ole itoo dada ataleu ye di tooltool nga le imot.