Noonoongoo Pang Di Kakase Tiye Di Tamadi
6
1 Ang di kakase nga,
ang ngan kaye Tool Mai kagaua le atu,
le be nen ngan kalongo di tamamim le tinamim koodi,
yesoo in dada dook mata tani yo be kayeii,
in naii.
2 Le kalongo betanga ke Maro yo iwete nga,
“Kuraua pang tamam le tinam a kulongo betanga kidi.”
Inbe ye ger tani i,
in ger kapala yo Maro iwete muku ye nga,
ngan ipamede ye betanga medana sa yo be iyei dada dook mata pang di tooltool be titoo,
ngan tiap,
bong ger tani i,
in ipa ye betanga medana ki.
Ngan la iwete mulu nen,
3 “Le kumata be kuyei dada dook mata nen nga,
ngan ole yepongo kiong yo ke tana i,
in dook mata le le lo kuyei konga.”a
4 Inbe ang di kakase tamadi nga,
ngan kin kayei di natumim a katedi malmal be.
Bong be nen ngan kakap noonoongoo pang di,
inbe kapatomonai di ye dada yo ke Tool Mai nga.
Noonoongoo Pang Di Tooltool Ke Poranga Tiye Di Kuto Maimai Kidi
5 Ang di tooltool yo ke poranga nga,
ngan ole katattadai di kuto maimai kiang yo ke tana i nga,
inbe katoo dada yo dook mata ngan ye matadi a karaua pang di.
Le kagaua lomim le atu be katoo betanga kidi,
dawa ben yo kalongo betanga ke Kirisi a katoo nga.
6 Ang ole kalongo betanga kidi a karaua pang di ye kene yo kaye di kayepe a tikamata urata yo kayei nga,
inbe ye kene yo tiyepe manga mooloo yang ye in nga,
ngan karaua pang di lapau,
a be nen ngan lodi dook mata pang.
Ngan ang ngan ben di poranga ke Kirisi,
le ole kagaua lomim le atu be kayei urata yo Maro lono be kayei nga.
7 Ngan nen le kagaua lomim le atu moolmool be kayei urata kiang dook,
dawa ben kayei urata pang Tool Mai nga,
bong pang tool ke tana i tiap.
8 Le lomim tut,
di tooltool yo ke poranga,
inbe di tooltool yo ke poranga tiap nga,
ngan kumata le be tiyei urata dook mata,
ngan Tool Mai ole ikap balingi dook mata pang di ye urata kootoonoo kidi yo tiyei nga.
9 Ngan ang di kuto maimai yo ke di poranga nga,
ngan kayei dada gaongo leu pang di poranga yo kiang nga le imot.
Inbe kin kawete katkat pang di be,
yesoo ang ngan lomim galanga nen,
ang kaye di ngan kuto mai kiang ataleu in la Tool Mai yo iyepe ete ye malala ki ni.
Ngan ya ni iyei dada gaongo leu pang di tooltool nga le imot,
le ke be lono dook mata pang tool atu,
inbe lono dook tiap pang tool san,
ngan tiap.
Paulu Iwete Pang Di Tooltool Ke Kirisi Ye Dada Yo Be Tiye Satan Tipatoko Ye I
10 Ngan betanga kiau yo be awete porai pang ngan nen.
Ole kakap gurana ye Tool Mai,
ngan la be guramim nga,
yesoo ya in gurana ki mai le mai san.
11 Le katar so kiang ke patokongo yo Maro ikap pang nga,
ngan ilo tinimim,
a be nen ngan kakodo le kamede,
inbe karautoo tool kuto mai kidi so sadi ye dada ki yo ke kaplungunu nga.
12 Ngan ole tayei nen,
yesoo idi nga taye di tooltool moolmool tapatoko tiap.
Bong taye di so sadi yo gurana kidi maimai a tiyei kuto maimai pang lang le tana,
inbe di so sadi ke yeingi noonoo yo tiyepe todo lono nga,
ngan la taye di tapatoko nga.
13 Ngan nen le katar so ke patokongo yo Maro ikap pang,
ngan ilo tinimim,
inbe kapanat dook ye patokongo,
a be nen ngan ye kene yo be moonoo pombe pang yang ye in nga,
ngan o ke be kamol tiap,
bong ole kakodo le kamede.
14 Le kakodo le kamede,
inbe karaia lomim le imot a katoo betanga yo moolmool i,
yesoo ole iyei ben bittoongoo yo kawittoo lo galimim a iparama wam kiang a be kadada ye patokongo i.
Inbe kayei dada dook mata yo noonoonoo nga le ikenen leu,
yesoo ole iyei ben sousoungu medana yo tool ke patokongo isousou ye a iyakala katene i.
15 Inbe kaparama bingi dook mata yo iwetewete paidi ye dada yo be taye Maro tagaua inbe tayepe ye lo silene yo ki i,
yesoo ole iyei ben loningi ke kemim yo kaparir lo kemim a be kakodo dook ye patokongo nga.
16 Inbe so san mulu in nen,
kaparama lomim medana yo kataru i,
in le imede,
yesoo ole iyei ben sakeke yo katoka be kayottarai dawa yo tool kuto mai kidi so sadi be iso ang ye nga.
17 Inbe kaparama dada tani yo be Maro ikau idi a ipamulidi ye so dook tiap yo be igarung idi i,
in le imede,
yesoo ole iyei ben so medana yo tool ke patokongo ikudu a iyakala kutono ye i.
Inbe kakap betanga ke Maro yo Amunu Silene ikap pang ngan a kaparama le imede,
yesoo ole iyei ben pul kiang ke patokongo.
18 Le kanakana ngan kapatarau ye gurana yo ke Maro Amunu Silene i,
a katoru be ilonang ye so nga le imot.
Inbe ye kene yo be kapatarau ye in nga,
ngan kakamatang dook leu,
inbe kapatarau le ikenen leu a kalon di tooltool yo ke Maro nga le imot.
19 Inbe lomim tutau lapau a kapatarau pang Maro yau,
a nen ngan ye kene yo be ayiti kook be awetewete pang di tooltool ye in nga,
ngan ole ipamedau le atattadai tiap,
inbe ipapos betanga yo be awete ngan pau.
Ngan kumata le be iyei nen nga,
ngan ole apaposo bingi dook mata yo muku ngan iken sollono bong nookoot nga pombe a ise mallangana i.
20 Ngan tina Kirisi iwangau be la awetewete betanga ki pang di tooltool nga,
ngan la le nookoot nga tiparamau a titarau se ayepe rumu dook tiap ke di talnga dikidiki lono ye i.
Le kapatarau a katoro Maro be ipamedau a nen ngan atattadai be,
bong akodo le amede inbe awetewete ye bingi dook mata tani.
Ngan kumata le be kayei nen nga,
ngan la be ayei urata kiau dook nga.
Paulu Itoro Maro Be Iyei Dada Dook Mata Pang Di Tooltool Ke Kirisi
21 Ngan Tikikus yo itara lono moolmool ye urata ke Tool Mai,
inbe lok panga mai san i,
in ole pola iwete pang ye so le imot,
a be nen ngan ang lapau ole lomim galanga nen nga ayepe belei inbe ye soo so yo ayeii i.
22 Le ye punu in la le awanga be ipola pang yang ye i,
a nen ngan pola igasa pang ye yepongo kiam,
inbe ipamede lomim ye betanga sa.
23 Nen le ang di diek nga,
ngan apatarau pang Tamada Maro iye Tool Mai kiidi Yesu Kirisi be yaru tiyei ang le kayepe ye lo silene kidi,
inbe tilonang le lomim pang di diemim mai san,
inbe katara lomim le imede ye Kirisi.
24 Le apatarau nen be Maro ole lono pang a iyei dada dook mata pang ang di tooltool le imot yo lomim mai san pang Tool Mai kiidi Yesu Kirisi le ikenen leu nga.