Paulu Iwetewete Bingi Dook Mata Pang Di Tooltool Yo Tipa Ye Rara Kidi Yuda Tiap Nga
3
1 Au,
Paulu i,
ayepe rumu dook tiap ke di talnga dikidiki lono nga,
yesoo ayei urata ke Yesu Kirisi a be nen ngan alonang ang di tooltool yo kapa ye rara ke di Yuda tiap nga.
2 Nen le ang ngan o kalongo betanga ye urata tani yo Maro ikauu pau i.
Ngan ya in iyei dada dook mata pau a ikaua urata pau nen,
be awetewete bingi dook mata pang ye dada ki yo be lono pang mai san a iyei dada dook mata pang ye i.
3 Ngan dada ki tani yo lon taru a iken sollono i,
in ipaposi pau,
le nookoot nga awodo betanga ki kasin a ilo ye rau i pang koot nga.
4 Le ye kene yo be kakinkat betanga tina nga,
ngan ole lomim galanga nen,
au i lok galanga dook ye dada yo Maro lon taru ye Kirisi a iken sollono i.
5 Ngan mukot ye kene yo Yesu isi tiao nga,
ngan Maro ipaposo dada ki tani in pang tooltool siap.
Bong yo nookoot nga Amunu Silene ipaposi pang di aposol le di Maro koonoo tina yo ipootoo di panga ya taunu nga.
6 Ngan dada ki tani yo iken sollono i,
in nen:
Bingi dook mata in dada yo be ang di tooltool yo Yuda tiap nga,
ngan ole kakap so dook mata gaongo leu ben yo Maro ipamede betanga ye be ole ikap pang di tooltool ki yo di Yuda nga.
7 Ngan au i,
Maro iyei dada dook mata pau a ipamedau ye gurana ki,
a be nen ngan ayei ben kapraingi ki,
inbe awetewete pang di tooltool ye bingi dook mata tani i.
8 Moolmool,
au i akamatau ben tool kase le apa mur yege ye di diek kapala le imot yo ke Maro nga.
Bong Maro lono pau a iyei dada dook mata pau nga,
ngan be nen a awetewete pang di tooltool yo Yuda tiap ngan ye so dook mata yo be Kirisi ikap pang di nga.
Inbe so tina yo be ikap pang di nga,
ngan ben balingi yo dook mata le dook mata ki taunu nga.
9 Inbe Maro ipootau be apagalanga di tooltool le imot ye dada ke Maro yo lon taru a iken sollono i.
Kulkulunu ngan Maro tani yo itar so nga le imot i,
in ipaposo dada ki tani pang tooltool siap,
10 bong nookoot nga ipaposi a ise mallangana oo.
Le tina iyei di le tigaua le atu ye bareme ke Yesu nga,
ngan be nen a be di so sadi yo gurana kidi maimai nga,
inbe di so sadi yo tiyei kuto maimai pang lang le tana nga,
ngan ole tikamata ben lo galanga ke Maro in dook mata le imot.
11 Nen le dada tani yo mukot ngan Maro lon taru ye kene yo itara tana tiao i,
in la le nookoot nga itoo le kanono pombe ye urata yo Tool Mai kiidi Yesu Kirisi iyeii i.
12 Le idi tooltool yo tatara lodo medana pang Kirisi a taye tagaua lodo le atu nga,
ngan o ke be tatattadaia Maro mulu tiap.
Yesoo,
Kirisi la iso dada paidi be tapa le tala potai ye Maro i.
13 Le au i atorang be kin lomim dook tiap ye yo asolo moonoo ye urata yo ayei be alonang ye,
nga be,
bong lomim ponana ye.
Paulu Ipatarau Ye Di Epeses
14 Ngan yesoo Maro in iyei so tina le imot pang,
ngan la le agun turuk le du damok toko tana ke dama ke Tamada Maro,
inbe apatarau panga yang.
15 Ngan Maro ikarata so le imot yo ke malala ki ngan ipa ye ke tana i.
Nen le di tooltool le imot yo nookoot nga tiyepe ye malala ki inbe di tooltool yo tiyepepe go ye tana i nga,
ngan Tamadi la ya i.
16 Inbe dada ki le imot yo iyei pang nga,
ngan dook mata ki taunu.
Nen le au i apatarau panga be itoo dada dook mata ki tani a ipamede lomim ye gurana ke Amunu Silene a be nen ngan kakodo le kamede,
17 inbe katara lomim le imede moolmool pang Kirisi,
a be nen ngan iyepe le imede lomim in.
Inbe apatarau be dada dook mata tani yo be Maro lono pang ye mai san i,
in ole ipamedang a be nen ngan kakodo le kamede ye dawa ben kai yo ramini itorobono tana le idu lopo i,
inbe dawa ben rumu yo tire lo ye sawa medana pono i.
18-19 Ngan nen le ang ngan kaye di tooltool ke Maro le imot nga,
ngan ole lomim galanga dook ye Kirisi lono yo paidi i,
in mai belei nga.
Ngan lono yo paidi i,
in mai le mai san a ipa le ilo ete inbe idu lopo inbe ingaua ni mai i le imot,
le tool sa ke be lon galanga ye pitiap yege.
Bong au i apatarau nen,
be iyei ang le kayepe le dawa ben ya ni.
20 Le tayitmaka Maro ene,
yesoo gurana ke Amunu Silene yo iken lodo i,
in iyei urata mai le mai san.
Nen le so le imot yo tatoru ye,
inbe so yo lod kaua urata ye be ilonidi ye nga,
ngan ole iyei le imot ipa ye so kapala mulu lapau.
21 Le tayitmaka ene le ilo ete ke be di tooltool tipayiti ye urata yo iyei kataunu ye di tooltool yo tigaua ye bareme ke Yesu ngan tiye Yesu Kirisi nga.
Le tayitmaka ene nookoot nga inbe pang dama ni ngan le ikenen nen le taukan motingi.
Moolmool.