Tiniidi Paunu Yo Iken Ye Malala Ke Maro Nga
5
1 Ngan idi nga lod galanga nen,
tiniidi yo ke tana i nga,
ngan dawa ben badabada yo nookoot ngan be tayepekala ye nga.
Le kumata be di tooltool tigarung tiniidi tina nga,
ngan idi nga rumu moolmool yo Maro ikarata paidi nga,
ngan la iken ye malala ki ngo.
Inbe rumu tina,
ngan di tooltool tire tiap,
bong Maro la ire ye ya taunu baene i,
le ole iken nen le taukan motingi.
2 Ngan nookoot nga idi nga tamooroon tiap,
inbe lodo be le tayepekala ye rumu paunu yo iken ye malala ke Maro ngo,
le iyei ben sousoungu paunu kiidi nga.
3 Nen le kumata be idi nga tayege tiniidi yo ke tana i,
inbe tasousou ye tiniidi paunu nga,
ngan la be ole takamatidi ben idi nga taukada tiniidi tiap nga.
4 Le moolmool,
ye kene yo idi nga tayepekala ye badabada tina yo ke tana i go nga,
ngan atoo,
idi nga tamooroon tiap,
inbe lod massingi dook.
Yesoo,
idi nga lodo be tiniidi yo ke tana i nga,
ngan imata ngan taukada tiniidi be,
bong tasousou ye tiniidi paunu yo iken malala ke Maro ngo,
a be nen ngan tiniidi paunu tina yo taukan motingi nga,
ngan ikaltoo tiniidi yo be imata nga.
5 Ngan Maro yo ikaratidi i,
in lono be takap tiniidi paunu.
Inbe ya la ikaua Amunu Silene paidi muku ben itarkalidi,
le ye dada tani i,
in ipamedidi ye so yo be pang dama ni ngan ikap paidi moolmool le imot nga.
6 Nen le ye punu tani i,
in la le kanakana ngan idi nga tatara lodo le atu ye so tani in nga.
Inbe lod galanga nen,
ye kene yo idi nga tayepe ye tiniidi yo ke tana i nga,
ngan o ke be taye Tool Mai tayepe gaongo ye malala yo ki in tiap.
7 Le nookoot nga takamata moolmool ye matada pitiao,
bong dada yo tatoo in nen,
tatara lodo medana panga leu.
8 Le ben tina awete koot nga,
idi nga tatara lodo le atu ye so tani.
Ngan nen le idi nga lodo dook mata nen be ole tayege tiniidi yo ke tana i,
inbe talo taye Tool Mai tayepe dook ye malala yo ki i.
9 Nen le kumata be idi nga tayepe ye tiniidi yo ke tana i,
too be tayege tiniidi tina inbe talo taye Tool Mai tayepe nga,
ngan ole takapye be tayei dada yo be lon ponana paidi ye nga.
10 Ole nen,
yesoo ye lal yo Maro itaru be ikarata betanga kiidi ye in nga,
ngan idi le imot ole lo takodo dama ke kookoowoo ke Kirisi ye ni ke karatanga betanga.
Inbe ye kene tani ngan ole ikamata dada kiidi yo tayepe ye tana i ngan tayei nga,
ngan be dook mata too dook tiap nga.
Lo ngan be ole iyemenai idi ye,
too ikap balingi paidi ye,
le lo iye dada kiidi tina yo tayei nga.
Paulu Lono Be Iyei Di Tooltool A Tiye Maro Tigaua Le Atu
11 Ngan tina am nga amtattadaia Maro be iyemenai di tooltool nga,
ngan ye punu in la le amkapye be ampamadit di tooltool kapala lodi a be nen ngan titoo Maro lono.
Am nga,
Maro lon galanga yam dook mata san,
nen le dada kiam iken mallangana panga.
Inbe au i atara lok nen be ang ngan lomim galanga yam lapau,
le dada kiam yo amyei a be amlonang ye nga,
ngan iken mallangana pang lapau.
12 Le kin lomim taram ben am nga amkapye be am tapmam amyitmakam mulu be.
Bong au i awete nin am nen nga,
ngan be nen a lomim ponana yam,
inbe alonang a be nen ngan karau betanga ke di tooltool kapala.
Di ngan lodi ponana ye so yo tikamata ye matadi leu nga,
bong lodi kaua urata ye so yo iken di tooltool lodi,
ngan be dook mata too dook tiap,
ngan tiap.
13 Ngan nen le kumata di tooltool tina yo tiwete be am nga kutomam kaua urata dook tiap,
ngan dook mata.
Bong urata ke Maro yo amyei nga,
ngan be amyitmaka ene ye.
Inbe kumata le be kutomam kaua urata dook nga,
ngan be amlonang ye.
14 Le Kirisi yo lono paidi mai san i,
in ya la ipamadit lomam be amyei urata ki i.
Inbe am nga lomam galanga nen,
tool ataleu la ikaua nede a imata paidi nga le imot i.
Ngan nen le idi nga dawa ben taye tammata gaongo.
15 Ngan Kirisi imata pang di tooltool nga le imot,
a be nen ngan di tooltool yo be tikaua yepongo dook mata yo taukan motingi in nga,
ngan ke be titoo di tapdi lodi ye yepongo kidi,
ngan tiap,
bong ke be titoo tool tani yo imata ye di,
motong imadit mulu ye ni ke matenge i,
in lono.
16 Le nookoot nga inbe pang dama ni a ilo nga,
ngan kumata be am nga lomam kaua urata ye di tooltool ben di ngan dook mata too dook tiap nga,
ngan ole lomam kaua urata ye di dawa ben yo di tooltool ke tana i be tiyei,
ngan tiap.
Moolmool,
muku ngan lomam kaua urata ye Kirisi ye dada yo nen nga,
bong nookoot nga ke be amyei dada yo nen ngan ye mulu tiap.
17 Nen le kumata sei tool be iman pang ye Kirisi a iye tigaua le atu nga,
ngan ole Maro iyeii le iyei ben tool paunu mulu.
Le yepongo ki yo gurunu i,
in imot oo,
inbe paunu pombe.
18 Ngan dada tina le imot yo ke yepongo paunu nga,
ngan Maro la iyei paidi i.
Ya in ipamulidi le man taye tagaua le atu ye urata yo Kirisi iyeii paidi i,
inbe ikaua urata tani in paidi be la tawetewete betanga ki pang di tooltool,
inbe tayei di le man tiye tigaua le atu lapau.
19 Le betanga kiau yo aweta in nen,
ye urata yo Kirisi iyeii i,
in Maro lono be iyei di tooltool le imot ke tana i a be man tiye tagaua le atu.
Le di tooltool yo timan ye nga,
ngan ke be lon tut noonoo yo kidi ngan mulu tiap.
Inbe ikaua urata pam be la amwetewete pang di tooltool ye dada yo be tiye tigaua le atu ye i.
20 Nen le am nga la di tooltool tina yo Kirisi iwangam be la amwetewete betanga ki pang di tooltool nga.
Inbe ye kene yo amla amwetewete pang di ye in nga,
ngan ben Maro ya taunu betanga ki la ipas ye koomam nga.
Le amkaua Kirisi koonoo a amwetewete le koomam mede ye betanga pang nen,
kaportak lomim pang Maro,
inbe kaman kaye kagaua le atu.
21 Kakamata,
Maro iyeie Kirisi yo taukan noonoo,
in le isolo noonoo kiidi nga le imot,
a be nen ngan ye urata yo Kirisi tani in iyeii i,
in iyei idi le tayei tooltool noonoonoo ye Maro matana.