2 KORIN
Rau Yo Paulu Iwode Pang Di Korin I, In Ru Ki
1
1 Au Paulu awodo rau naii.
Ngan Maro itoo ya taunu lono a itarau be ayei aposol ke Yesu Kirisi.
Le aye ede san Timoti,
yo itara lon medana pang Yesu i,
in amru amgaua inbe amyawara rau i pang ang di tooltool ke Maro yo kagaua ye bareme ke Yesu a kayepe malala mai Korin nga,
inbe pang di tooltool ke Maro le imot yo tiyepe nin la nin ye tana mai Akaia ngan lapau.
2 Nen le ampatarau pang Tamada Maro iye Tool Mai Yesu Kirisi be lodi pang a tiyei dada dook mata pang,
inbe tikaua lo silene kidi pang.
Maro In Tool Ke Loningi
3 Idi nga ole tayitmaka Maro yo Tool Mai kiidi Yesu Kirisi Tamana i,
in ene.
Yesoo,
ya in Tamada tani yo kanakana ngan lon mulumulu yidi tooltool ki,
inbe ya in Maro yo ilonidi le lodo iken dook mata mulu i.
4 Moolmool,
kanakana ngan ye kene yo urata moonoo pombe pang yidi nga,
ngan ilonidi le lodo iken dook mata mulu.
Ngan tina yo ilonidi nen nga,
le ye dada gaongo leu la be idi nga ke be talon di diede ye urata moonoo yo pombe pang ye di nga,
a be nen ngan lodi iken dook mata mulu lapau.
5 Ngan ke be talon di nen,
yesoo Kirisi isolo moonoo mai san,
le idi yo taye tagaua le atu nga,
ngan ole tasolo moonoo lapau.
Inbe dawa ben Kirisi ikaua loningi mai ye Maro nga,
nen le idi nga ole takap loningi mai ye Kirisi lapau.
6 Ngan urata moonoo yo pombe pang yang nga,
ngan dawa ben yo pombe pang yam,
ngan lapau.
Ngan la ye kene yo amsolo moonoo ye in nga,
ngan be nen a Maro ilonang le ke be lomim iken dook mata mulu,
inbe ikau ang a ipamulang ye so dook tiap yo be igarungang i.
Inbe ye kene yo be ilonam a lomam iken dook ye in nga,
ngan be nen a amlonang a lomim iken dook mata lapau,
inbe kakodo le tutube a kasolo urata moonoo tina nga.
7 Le am nga amtara lomam le atu nen,
be ang ngan ole kakodo le kamede ye Kirisi.
Yesoo,
lomam galanga nen,
kumata le be kasolo moonoo dawa ben am nga,
ngan ole kakap loningi dawa ben am nga lapau.
8 Ang di diemam nga,
ngan am nga lomam be ampamadit lomim ye urata moonoo yo pombe pang yam ye tana mai Esia nga.
Ngan moonoo tina ngan maimai le irautoo gurana yo kiam nga,
le ke be am tapmam amkodo le tutube a amsolo tiap.
Nen le iyei am le amkanamai am ngan ke be amyepe mauremam mulu tiap.
9 Le moolmool,
ye kene tani in lomam tar be ole ammata.
Bong dada dook tiap tina yo nen nga,
ngan pombe pang yam,
a be nen ngan amtarla ye gurana kiam am tapmam tiap,
bong be amtarla ye Maro yo gurana ki mai san ke be ipamadit di matenge a timadit mulu i.
10-11 Ngan ya in tool tani yo ilonam a ipamulam ye urata moonoo tina yo kasin leu be iraumatamatam nga.
Inbe pang dama ni ngan ole ilonam a ipamulam nen mulu.
Ngan amwete nen,
yesoo amtara lomam le atu ye nen,
be kumata le kalonam ye pataraungu kiang,
ngan la be ya ilonam a ipamulam nen le ikenen leu nga.
Ngan be nen a di tooltool alunu ole tiwete lo ponana kidi pang Maro ye yo ilongo pataraungu kidi ngan le lono pam a iyei dada dook mata pam nga.
Paulu Ipalele Lal Ki Ke Panga Mulu
12 Ngan so maiyoko yo am nga lomam ponana ye in nen,
so le imot yo amyei nga,
ngan amtoo lo galanga ke di tooltool ke tana i a amyei urata kiam ye,
nga tiap,
bong amtoo dada dook mata yo Maro lono pang di tooltool a iyei dada dook mata pang di ye i.
Inbe ya in ilonam,
le tina amgaua lomam le atu be amyei urata yo dook mata ngan mallangana ye di tooltool matadi.
Le am nga amtoo dada yo nen in pang di tooltool le imot yo ke tana i nga,
inbe ye kene yo amyang tayepe ye in nga,
ngan amtoo dada tani in dook mata kaiye.
Ngan betanga tani,
in moolmool,
ngan nen le lomam yo iwetewete betanga moolmool pam ye dada dook mata yo be amtoo nga,
ngan ikata suanga yam.
13-14 Ngan nen le rau kiam yo amwode pang i,
in amwodo betanga sa yo be kakinkat ngan lomim galanga ye tiap,
ngan tiap.
Bong ang ngan o lomim galanga yam dook tiao.
Ngan nen le am nga amtara lomam le atu nen,
be pang dama ni nga,
ngan ole lomim galanga yam dook,
a be nen ngan ye kene yo be Tool Mai kiidi Yesu imulu a isi ye in nga,
ngan ole kapayitam dawa ben yo am nga ampayitang nga.
15-16 Ngan la au i atara lok le atu nen,
be ang ngan ole lomim dook mata yam,
le tina awete be ole amala matak so ang muku,
lo ngan be ayegang sila kayepe,
inbe alo pang tana mai Masedonia.
Inbe ye kene yo be amulu ke Masedonia a asi ye in nga,
ngan ole si matak so ang mulu,
inbe kalonau ye panga kiau san yo pang Yudia i.
Ngan ye dada yo nen i,
in Maro ole ipamedang ye betanga dook mata le paru.
17 Moolmool,
au i atoo lok ye panga kiau yo lok kaua urata ye in tiap.
Bong ang ngan kakamatau belei,
be akarata lok dook tiap la apalele betanga kiau nen nga,
too?
Too,
nga yelei,
atoo dada ke di tooltool ke tana i la atoo au tauk lok leu a awete sokorai nen,
“E,
au i ole amala”,
lo ngan be apalele mulu inbe awete nen,
“Tiap,
au i o amala tiap”,
too?
18 Ngan Maro i Maro moolmool,
le betanga ki yo iwete nga,
ngan itoo le imot.
Le am nga lapau ke be ampalele betanga kiam a amwete pang nen,
“E”,
lo ngan be ampalele mulu a awete pang nen,
“Tiap”,
ngan tiap.
19 Yesoo,
Maro Natunu Yesu Kirisi yo aye Selas ye Timoti amwetewete bingi dook mata ki kataunu yang i,
in ipalele lono tiap.
Ngan kumata be iwete nen,
“E,
ole ayeie so i,”
ngan o ke be ipalele lono mulu pitiap yege.
Bong ya in kanakana ngan iwete “E” le iken leu.
20 Inbe so le imot yo Maro ipamede betanga medana ye nga,
ngan itar kanono moolmool ye urata yo Yesu Kirisi iyeii i.
Le ya in iwete “E” ye betanga medana le imot yo Maro iwete koot nga.
Ngan ye punu yo nen i,
in la kanakana ngan tawete “Moolmool” ye urata yo Yesu Kirisi iyeii i,
a be nen ngan tayeie Maro ene le ilo ete ke be di tooltool tipayiti ye.
21 Ngan Maro la ipamedam amyang a le takodo le tamede ye lodo medana yo tataru pang Kirisi i.
Inbe ya in ipootidi ye urata kiidi,
22 le tarkilanga ki iken yidi ben idi nga ya ki ya taunu,
inbe itara Amunu Silene ilo lodo lapau.
Ngan Amunu tani in ole iyei idi le lod galanga ye so yo ipamede betanga medana ye be ikap paidi nga,
ngan ole ikap paidi moolmool le imot.
23 Le nookoot nga awete betanga moolmool ye Maro yo lon galanga ye lok le imot in matana nen.
Ye punu yo a le amulu tarai a amala Korin ye tiap in nga,
yesoo au i lok be apaloko urata moonoo san mulu lo pomim tiap.
24 Ngan am nga o ke be amdada pomim a amwete pang ye dada yo be ang ngan katara lomim medana pang Kirisi ye i,
in tiap,
yesoo lomam galanga nen,
ang ngan kakodo le kamede ye lomim medana yo kataru,
in oo.
Nen le lomam be amyang takaua urata gaongo,
ngan ye dada yo nen i,
in ole amlonang le lomim ponana.