Lo Ponana Yo Ipa Ye Maro Amunu Silene Nga
14
1 Kanakana ngan ole katoo dada yo be lomim pang di diemim ye mai san i,
inbe katara lomim le imot ye so yo ipa ye Maro Amunu nga.
Bong dada yo imuku pang san in la be ole kakaua Maro koonoo a be kawetewete betanga ki pang di tooltool ye i.
2 Yesoo,
sei tool yo iwetewete ye malala san koodi yo Maro Amunu Silene ikauu panga i,
in iwetewete pang di tooltool kapala tiap,
bong iwete betanga yo iken sollono ngan pang Maro.
Le di tooltool tilonga,
bong lodi galanga ye betanga ki yo iwete ngan tiap.
3 Bong sei tool yo ikaua Maro koonoo a iwete betanga ki i,
in iwete betanga ki pang di tooltool be ipamede di,
inbe ilon di a be lodi iken dook.
Yesoo,
betanga tina yo iwete ngan tilongo le lodi galanga ye.
4 Le sei tool yo iwetewete ye malala san koodi yo Maro Amunu Silene ikauu panga i,
in ipamede ya taunu leu.
Bong sei tool yo ikaua Maro koonoo a iwete betanga ki i,
in ipamede di tooltool yo tigaua ye bareme ke Yesu nga.
5 Ngan au i lok be ang le imot kawetewete ye malala san koodi yo Maro Amunu Silene be ikauu pang i.
Bong dada yo dook mata san in nen,
be kakaua Maro koonoo a kawetewete betanga ki pang di tooltool,
yesoo tool yo iyei dawa ben di Maro koonoo a iwete betanga ki pang di tooltool i,
in iyei urata dook mata san le illoso urata ke tool yo iwetewete ye malala san koodi i.
Bong kumata le be iportak betanga ki a be nen ngan ipamede di tooltool yo tigaua ye bareme ke Yesu nga,
ngan nen ngan ole dook mata.
Le kumata be iyei nen tiap nga,
ngan tool yo ikaua Maro koonoo a iwetewete betanga ki in illosi,
yesoo iwete betanga yo lodi galanga ye nga,
ngan nen le ipamede di.
6 Ang di diek nga,
ngan kumata be amala pang yang le be awetewete pang ye malala san koodi yo lomim galanga ye tiap in nga,
ngan ole alonang ye belei?
Bong be awetewete pang ye soo so yo Maro ipapos pau nga,
too apatomonai ang ye lo galanga yo ipa ye Maro nga,
too ayei dawa ben Maro koonoo a awete betanga ki pang,
too akap noonoongoo dook mata pang,
ngan la be alonang ye betanga kiau nga.
7 Ngan nen le matamim too ye so yo dawa ben kaur le pari nga,
ngan kumata le be tangini kidi dook tiap nga,
ngan ole di tooltool lodi galanga ye kanga ke woungu belei?
8 Inbe gaongo leu,
kumata be timaia tauru ye patokongo le tangini ki igalanga dook tiap nga,
ngan ole sei tooltool be ikarata dawa ki a ipanat ye patokongo i?
9 Nen le dada gaongo leu ye ang lapau.
Kumata be kawete betanga sa ye malala san koodi yo di tooltool lodi galanga ye tiap nga,
ngan ole lodi galanga ye betanga in punu belei?
Betanga kiang tina ngan ole iyei dawa ben muru koonoo sokorai.
10 Le moolmool,
di tooltool yo tiyepe ye tana i nga,
ngan koodi ki ki la tiwetewete ye nga.
Inbe koodi tina ngan le imot ke be ilon di tooltool yo tilongo inbe lodi galanga ye betanga tina ngan punu nga.
11 Ngan nanga,
kumata be au i lok galanga ye betanga ke tool san yo iwete ngan punu tiap nga,
ngan ya in ole lon tarau ben au i tool ke malala san,
inbe au i ole lok taru ben ya in tool ke malala san lapau.
12 Le dada gaongo leu ye ang lapau.
Ang ngan lomim be le kakap so yo Maro Amunu Silene ikap ye lo ponana ki nga.
Ngan dook mata,
bong be nen ngan kapatarau be kakap so ki tina yo be kapamede di tooltool yo tigaua ye bareme ke Yesu ye nga.
13 Nen le sei tool yo iwetewete ye malala san koodi yo Maro Amunu Silene ikauu panga i,
in be nen ngan ipatarau pang Maro,
a be nen ngan iloni a iportaka betanga ki tani yo iweta in punu.
14 Yesoo,
ye kene yo apatarau ye malala san koodi ye in nga,
ngan Maro Amunu yo iken lok in la ilonau a awete betanga tina nga i.
Bong au i lok galanga ye so yo awetewete ye,
nga tiap.
15 Le ole ayei belei?
Be nen ngan au i ole apatarau ye malala san koodi yo Maro Amunu Silene ikauu pau i,
inbe ole apatarau ye au tauk kook yo lok galanga ye,
in lapau.
Le gaongo leu,
au i ole awou ye malala san koodi yo Maro Amunu Silene ikauu pau i,
inbe ole awou ye au tauk kook yo lok galanga ye,
in lapau.
16 Ngan nen le kumata be Maro Amunu yo iken lomim in be ilonang le kawetewete ye malala san koodi a kayitmaka Maro ene ye,
inbe kumata tool san yo kaye kayepe in lon galanga ye betanga yo kawete ngan tiap nga,
ngan ole ikata suanga ye betanga kiang belei?
Ke be iwete “Moolmool” ye pataraungu kiang yo ke lo ponana in nga?
Tiap yege,
yesoo ya in lon galanga ye betanga yo kawetewete ye ngan tiap.
17 Le moolmool,
ang ngan kapatarau dook mata ye lo ponana kiang pang Maro,
bong betanga kiang tina ngan ke be ipamede tool san in lono tiap.
18 Au i awete lo ponana kiau pang Maro,
yesoo awetewete kaiye ye malala san koodi yo Maro Amunu Silene ikauu pau i,
le allos ang le imot.
19 Bong ye kene yo aye di tooltool yo tigaua ye bareme ke Yesu,
ngan amgaua a be amsung ye in nga,
ngan dook mata be awete betanga limi leu,
inbe apatomonai di tooltool kapala le lodi galanga ye ngan.
Bong be awete kaiye betanga ye malala san koodi le lo so ben tau sangaul,
bong di tooltool lodi galanga ye tiap,
ngan ole dook tiap.
20 Ang di diek nga,
ngan kin lomim kaua urata dawa ben di kakase be.
Ngan moolmool,
so yo dook tiap ngan be lomim galanga ye tiap dawa ben di kakase ngan dook mata.
Bong be so yo dook mata nga,
ngan ole lomim kaua urata ye dook dawa ben di tooltool yo maimai nga.
21 Le betanga yo tiwode lo ye ger ke Maro in iwete nen,
“Tool Mai iwete nen,
‘Ole awanga di tooltool ke malala san yo tiwetewete ye di tapdi koodi nga,
ngan a tikaua kook,
inbe tiwete betanga kiau pang di tooltool kiau.
Bong o lodi be tilongo betanga kiau tiap.’ ”a
22 Ngan nen le betanga yo tawetewete ye malala san koodi yo Maro Amunu Silene ikauu paidi i,
in ben tarkilanga pang di tooltool yo titara lodi medana nga tiap,
bong pang di tooltool yo titara lodi medana tiap nga.
Inbe betanga yo takaua Maro koonoo a tawetewete pang di tooltool ye nga,
ngan ben tarkilanga pang di tooltool yo titara lodi medana nga,
bong pang di tooltool yo titara lodi medana tiap,
nga tiap.
23-24 Nen le kumata be lo kagaua ye bareme ke Yesu,
inbe ang le imot be kawetewete ye malala san koodi yo Maro Amunu Silene ikauu pang i,
inbe di tooltool kapala yo kaye di kagaua ngan be lodi galanga ye so tina yo ipa ye Maro Amunu Silene ngan tiap nga,
ngan ole tiwete be ang ngan kayei kapakapa.
Too,
be di tooltool yo lodi galanga ye Maro tiap ngan sa be tise ye gaongo kiang nga,
ngan ole tiwete be ang ngan o kutomim dada.
Bong kumata be tool atu yo nen in be ise ye gaongo,
inbe ang le imot kakaua Maro koonoo a kawetewete betanga ki nga,
ngan ole lon galanga ye betanga tina ngan punu.
Ngan nen le betanga tina ngan ole iso lono le lon galanga nen,
ya in tool ke noonoo le ole Maro iyemenaii.
25 Inbe dada dook tiap ki yo ipataukala a iken lono nga,
ngan ole pombe se mallangana le imot.
Le ya in ole igun turunu le du damono toko tana,
inbe isung pang Maro a iwete nen,
“Moolmool yege,
Maro la iyepe kataunu yang i.”
Urata Ke Sungunu Nga Ole Ipa Dook Mata Le Imot
26 Le ang di diek nga,
ngan ole tawete belei?
Ye kene yo ang be kagaua ye sungunu ye in nga,
ngan ang le imot ngan ole kayei urata.
Le tool atu in ole iwouo woungu atu.
Inbe tool san in ole ikap noonoongoo dook mata pang.
Inbe san in ole ipatnai so kapala yo Maro ipapos panga nga.
Inbe san in ole iwetewete ye malala san koodi yo Maro Amunu Silene ikauu panga i,
inbe san in ole iportak betanga tina ngan ye koomim a be nen ngan kalongo,
inbe lomim galanga ye.
Bong so tina le imot yo be kayei nga,
ngan kayei a be nen ngan kapamede di tooltool yo tigaua ye bareme ke Yesu nga.
27 Le kumata be di tooltool yo tiyepe ye gaongo ngan be tiwetewete ye koodi san nga,
ngan tooltool ru too tol leu be tiwetewete ngan dook mata.
Inbe ye kene yo be tiwetewete ye in nga,
ngan ke be tiwetewete gaongo tiap.
Bong atu iwete betanga ki le imot,
lo ngan be san.
Inbe tool san in ke be iportak betanga kidi tina le iken mallangana.
28 Bong kumata be kagaua ye bareme ke Yesu,
inbe tool sa ke be iportak betanga tiap nga,
ngan tool yo be iwetewete ye malala san koodi i,
in ole iwetewete tiap,
bong iwur,
inbe ipalongo leu.
Inbe iyepe a ya taunu lon wetewete ye malala san koodi a ipatarau pang Maro ye.
29 Le gaongo leu ye di tooltool yo tikaua Maro koonoo inbe tiwetewete betanga ki nga.
Ngan tooltool ru too tol leu la be tiwetewete nga,
inbe di tooltool kapala ngan ole titar talngadi a tipalongo,
inbe matadi too betanga tina yo tiwete ngan,
ole itoo dada dook mata ke Maro,
too tiap.
30 Ngan kumata be tool atu iwetewete go le Maro ipapos betanga ki sa pang di tooltool yo tiwurur ngan atu nga,
ngan ole tool yo iwetewete muku in itar manga panga,
inbe ipalongo.
31 Ngan nen le ang atu atu le imot yo be kakaua Maro koonoo inbe kawetewete betanga ki nga,
ngan ole katoo dada dook mata yo nen i.
Le tool atu iwete betanga ki a imot,
lo ngan be san iwete,
a be nen ngan kapatomonai di tooltool tina le imot ye betanga tina,
inbe kapamede di ye.
32 Inbe di tooltool yo Maro Amunu Silene ilon di a tikaua koonoo,
inbe tiwetewete betanga ki nga,
ngan ole di tapdi tikaptut di dook ye urata yo tiyei nga.
33 Yesoo,
Maro lono be urata yo ke sungunu in be idada belebele tiap,
bong be idada dook a be nen ngan lo silene yo ikauu paidi i,
in ole iken yidi.
Ngan nen le ang ngan katoo dada yo di diemim kapala yo Maro ipootoo di panga ya taunu ngan tiyei ye kene yo tigaua a tisung ye i.
34 Ngan nanga,
di garup ngan ole tipas le tiwur,
inbe tipalongo leu ye ni ke gaongo.
Yesoo,
di ngan timalum pang di be tiwetewete tiap,
bong be tiraua pang di,
inbe tiyepe leu dawa ben tina ger kidi Yuda iwete nga.
35 Nen le kumata be torungu kidi sa nga,
ngan ole timulu a tila rumu kidi,
lo ngan be titor di niditooroo ye.
Yesoo,
kumata garup atu be iwetewete ye kene yo di tooltool lo tigaua ye bareme ke Yesu nga,
ngan ya in ipammoo ni.
36 Nga yelei,
betanga ke Maro in pombe pang yang muku,
motong la ila pang ye di malala kapala nga,
too?
Nga yelei,
ang leu nga la kakap betanga ke Maro tina nga,
too?
Tiap yege!
37 Kumata be ang ngan atu lon tar be ya in iyei Maro koonoo,
too iwete be Maro Amunu Silene iloni be iyei urata ki nga,
ngan ole lon galanga ye soo betanga yo awodo pang nga,
ngan noonoongoo ke Tool Mai.
38 Bong kumata tool atu be iwala murini pang betanga kiau nga,
ngan ole kawala murimim panga lapau.
39 Nen le ang di diek nga,
ngan katara lomim le imot ye dada yo ke be kakaua Maro koonoo,
inbe kawetewete betanga ki pang di tooltool ye i.
Inbe kin kagunkala di tooltool yo tiwetewete ye malala san koodi yo Maro Amunu Silene ikap pang di ngan be.
40 Bong so le imot yo be kayei nga,
ngan kayei le katoo dadana dook.