Matamim Too Ye Panga Ke Di Isrel
10
1 Ang di diek nga,
au i lok be lomim kalli ye soo so yo pombe pang ye di sasa kiidi tiye Mose yo tiyege Isip a timan,
ngan be.
Ngan ye kene tani in di le imot tiyepe la eng tene yo Maro iyepe ye in parmana,
inbe matan kala di a tipa dook mata le la tisiutu Tiek Kooroonoo a tila ke kapala.
2 Ngan eng tene tani yo tipa parmana i,
inbe tiek yo tipa kataunu ki i,
in dawa ben di le imot ngan tirriu ye.
Le tina timadit a tiyei ben Mose di galiunu inbe titoo.
3-4 Ngan di le imot ngan tikana kaningi ataleu inbe tiyini ran ataleu yo ipa ye Maro Amunu Silene i.
Ngan ran tani yo tiyinu in pombe ye pat yo gurana ke Maro Amunu Silene iken ye inbe ipagege di a tila i.
Ngan pat tani in Kirisi ya taunu.
5 Bong Maro lono dook mata pang di Isrel kapala ye dada kidi yo tiyei,
ngan tiap.
Nen le iyei di le alunu la timmata a bobodi iken nin la nin a sila ikino ye ni sorrakene tani nga.
6 Ngan so tina le imot yo pombe nga,
ngan be iyei ben tarkilanga paidi,
a be nen ngan tayei dada dook tiap ke noonoo yo dawa ben di tiyei nga,
ngan be.
7 Ngan nanga,
kin kasung pang di maro yo kai padodo dawa ben yo muku ngan di Isrel tina ngan kapala tiyei,
ngan be.
Ngan Rau ke Maro iwete nen,
“Di tooltool tiwur a tikan inbe tiyin,
le tina lodi ponana a timadit le tiye di garup tillewe ye dada yo dook tiap nga.”a
8 Nen le idi nga kin tayei dada dook tiap ke bauk dawa ben di Isrel tina ngan kapala tiyei,
ngan be.
Ngan tiyei nen,
le ye ke atu in Maro iraumatamata di tooltool kidi ben 23,000 a timmata.
9 Inbe idi nga kin tatouo gurana ke Tool Mai be.
Ngan di Isrel tina ngan kapala tiyei nen,
ngan le moto dook tiap pompombe a tikan di le timmata.
10 Inbe idi nga kin tapasa mur ye Maro inbe di kuto maimai yo ki,
nga be.
Ngan di Isrel tina ngan kapala tiyei nen,
ngan le Maro iwanga bangabangana ki yo ke garungunu so in si iraumatamata di le timmata.
11 Ngan so tina le imot yo pombe pang ye di sasa kiidi nga,
ngan be nen a iyei ben tarkilanga paidi.
Le di tooltool tiwodo betanga ki ilo ye Rau ke Maro a be nen ngan takamata,
inbe takap tutidi dook,
yesoo nookoot nga tayepe ye lal yo tana i be imot ye i.
12 Nen le kumata ong sei tooltool yo lom tar be ong in kukodo le kumede ye lom medana yo kutaru pang Yesu in nga,
ngan kin kop tutong dook leu.
Ole nen ngan kumol.
13 Ngan touanga le imot yo pombe pang yang nga,
ngan san ye touanga yo kanakana ngan pombe pang ye di tooltool nga le imot ngan tiap.
Bong Maro in itoo betanga ki yo ipamede i,
nen le ke be imalum pang touanga tina ngan sa a illos gurana yo kiang,
ngan tiap lapau.
Le ye kene yo touanga be pombe pang yang nga,
ngan ole ipatnaia dada yo be ilonang ye i,
a be nen ngan kakodo le kamede a kalloso touanga tani in.
Paroranga Ke Kai Padodo, Inbe Kaningi Ke Tool Mai
14 Ang di tooltool kiau yo lok pang mai san nga,
kin kayepe manga mooloo ye sungunu ke di maro yo kai padodo nga.
15 Ngan ang ngan lo galanga kiang dook mata.
Ngan la awete betanga nga pang a be nen ngan ang tapmim matamim too betanga kiau yo awete nga.
16 Ngan ye kene yo takana medana ye in nga,
ngan le tawete lo ponana kiidi pang Maro ye ruku yo ooroo wain surunu iken ye i,
inbe tayinu.
Inbe idi ngan tatara lodo nen be tayinu a taye Kirisi tagaua lodo le atu ye.
Ngan nen le rara ki yo imati ye kai palasingi i,
in dawa ben idi taudu rara kiidi la imati i.
Inbe porong yo tate a takani i,
in idi nga takani ngan le tatara lodo nen be takani a taye Kirisi tagaua lodo le atu ye.
Ngan nen le tinini yo iraii paidi i,
in dawa ben idi taudu tiniidi la taraii i.
17 Le porong yo tate kasin kasin a takani i,
in ataleu dawa ben idi nga.
Idi tooltool alunu,
bong tagaua le tayei ben tool ataleu,
yesoo takana porong tani yo ataleu i.
18 Ole lomim kaua urata dook ye momo kidi tooltool ke Isrel ngan.
Ngan ye kene yo tiyei paroranga nga,
ngan ole tidaun asara yo be tiyei paroranga ye nga,
ngan kapala ye kookoowoo ke paroranga so,
inbe kapala ki ngan tikan.
Ngan dada yo tiyeii nen i,
in be nen a tiye Maro tigaua lodi le atu ye.
19 Kumata be nen nga,
ngan yelei ye di maro yo kai padodo nga,
inbe kaningi yo tiyei paroranga ye pang di nga?
Ngan so moolmool,
too?
20 Tiap!
Di tooltool yo lodi galanga ye Maro tiap nga,
ngan tiyei paroranga pang Maro tiap,
bong tiyei paroranga pang di so sadi.
Nen le au i lok be kaye di so sadi tina ngan kagauagaua be.
21 Le ang ngan ke be kayin wain ye ruku ke Tool Mai,
lo ngan be la kayin wain ye ruku ke di so sadi,
ngan tiap.
Inbe ang ngan ke be kakan kaningi ye kookoowoo ke kaningi so ke Tool Mai,
lo ngan be la kakan kaningi ye kookoowoo kidi so sadi,
ngan tiap lapau.
22 Kumata be idi nga tayei nen nga,
ngan ole tayeie Tool Mai le lono dook tiap paidi,
yesoo ya lono be taye tayepe leu.
Nga yelei,
idi nga gurana kiidi mai le illos gurana yo ki nga,
too?
O tiap!
Kanakana Nga Be Tayitmaka Maro Ene Leu
23 Ang kapala ngan kawete nen,
“Am nga ke be amyei so le imot yo lomam be amyei nga.”
Ngan moolmool,
bong so nga le imot ngan dook mata ke be ilonidi tiap.
Kawete nen,
“Am nga ke be amyei so le imot yo lomam be amyei nga.”
Moolmool,
bong so tina le imot ngan ke be ilonidi a takodo le tamede ye Kirisi tiap.
24 Ngan idi tooltool ke Kirisi nga ke be lod kaua urata mata ye dada yo be talonidi taudu ye leu ngan tiap,
bong be nen ngan lod kaua urata ye dada yo be talon di diede kapala ye ngan lapau.
25 Ngan ang ngan ke be kakan asara medana yo tiyawar ye ni ke yawaringi so nga,
bong kin lomim wetewete ye a kator di ye be.
Ngan ang ngan ke be kakan so nen,
26 yesoo Rau ke Maro iwete nen,
“Tana i ipa ye so le imot yo iken ye nga,
ngan ke Tool Mai.”b
27 Kumata le be tool sa yo itara lono medana pang Yesu tiap i,
in ikiu ong be kula rumu ki la kuye kakan so le lom dook mata be kula nga,
ngan soo so yo itar lo kookoowoo pono pang kaningi nga,
ngan kon leu.
Bong kin lom rru ye so tina a kutor ye be.
28 Bong kumata be tool sa iwete pong nen,
“Ngan so yo nga tiyei paroranga ye pang di maro yo kai padodo nga,”
be iwete pong nen nga,
ngan kin kon be.
Ole nen ngan tool tani yo iwete pong i,
in ole lon tarong ben ong in kuyei dada dook tiap.
29 Moolmool,
ong lom yo iwetewete pong ye dada dook mata be kutoo i,
in iwete kumata be kon asara medana tina nga,
ngan ong in kuyei noonoo,
ngan tiap.
Bong au i awete pong ye tool san in la be lon tarong nen i.
Le nga yelei,
be tool san in ilelau ye so yo au i lok galanga ye be in dook mata pau be ayeii in nga?
30 Kumata be awete lo ponana kiau pang Maro ye kaningi yo be akan nga,
ngan yelei a be tool san ipasa mur yau ye so yo awete lo ponana kiau pang Maro ye koot nga?
31 Ngan nanga,
soo so yo be kayeii i,
too soo so yo be kakan le kayin nga,
ngan kayei pang Maro,
a be nen ngan di tooltool tikamata ben kayeie ene le ilo ete ke be tipayiti.
32 Ngan nen le kin kayei di Yuda,
too di Girik yo tipa ye rara kidi Yuda tiap nga,
too di tooltool yo tigaua ye bareme ke Yesu nga,
ngan le timol a tikapsap ye dada ke noonoo be.
33 Ole kayei dawa ben au.
Au i akapye be ayei di tooltool nga le imot a lodi dook mata pau ye so tina le imot yo ayei nga.
Ngan yo ayei nen nga,
ngan be nen a au tauk alonau ye tiap,
bong be alon di tooltool nga le imot,
a be nen ngan Maro ikap di a ipamulu di ye so dook tiap yo be igarungu di i.