Paulu Ipa Pang Tana Mai Masedonia Le Giris
20
1 Ye kene tani in di tooltool tina ngan oorootang a imot,
motong la Paulu iwanga pang Yesu di galiunu yo tiyepe ye malala tani in nga,
ngan man tiye tigaua,
inbe ikap betanga pang di a ipamede lodi be tikodo le timede ye dada yo dook mata nga.
Motong la iparau di a sila tiyepe,
inbe ipa a idu pang Masedonia nga.
2 Ngan idu nga,
ngan le ipa ye malala tina le imot yo iken ye tana mai tani in nga,
inbe iwetewete kaiye betanga pang di tooltool yo titara lodi medana nga,
a nen ngan be ipamede lodi be tikodo le timede.
Ngan iyei nen,
inbe ipa le le la pombe ye tana mai Giris,a
3 ngan le la iyepe nango ye taudu tol.
Motong la Paulu tani in lon kaua urata be ikaua ookoo sa a imulu a idi pang Siria.
Bong ngan ilongo betanga ben di Yuda tiraua betanga be ole tiraumate a imata.
Ngan nen le ipalele lono mulu,
inbe iwete be ipa tana ke Masedonia a idi.
4 Ngan be imulu ngan le di tooltool alunu la tiyei ene a tiye tipa nga.
Di tooltool tina ngan edi nen:
Sopata yo Pirus ke malala mai Beria,
in natunu;
inbe Aristakus iye Sekundus ke malala mai Tesalonaika;
inbe Gaius ke malala mai Debe;
inbe Timoti iye di tooltool ru ke tana mai Esia,
yo edi Tikikus ye Toropimus nga.
5 Ngan di tooltool tina nga,
ngan tipa a timuku le di tinamam la malala mai Toroas ngo.
6 E am ngan si amyepe nanga la Pilipai nga,
le lal ke kaningi porong yo taukan so yo be iyeii a isung i,
b in imot,
motong la amyiri ye ookoo atu la Pilipai nga.
Inbe amkooi ye ke limi,
motong la amdi pombe pang ye di diemam tina ngan Toroas nga.
Motong la amye di amgaua,
inbe am le imot amyepe la Toroas ngo ye ke limi be ru nga.
Paulu Ipamaditi Yutikas La Toroas Nga
7-8 Amyepe Toroas le nga Sande rrai,
motong la amye di tooltool yo titara lodi medana pang Yesu nga,
ngan lo amgaua ye rumu sokalana atu yo iken ke ete i,
a be amkana medana.
Inbe Paulu iwetewete pang di tooltool tina ye bingi dook mata ke Yesu,
yesoo bongbongini ki nga,
ngan ole iyege di sila tiyepe inbe ipa mulu.
Ngan nen le iyolo betanga le le lo bong kataunu.
Ngan rumu sokalana tani yo lo amgaua ye i,
in sul ki yo be tilanga a ilangaraia rumu lono nga,
ngan alunu kaiye.
9 Inbe tamoto kase atu yo ene Yutikas i,
in lo iwur ye dada ke kaungu muru ke rumu tani in.
Inbe itar talngana pang Paulu tani yo isudungu betebetanga le taukan maryoongoo i.
Le nga Yutikas tani in matan gei a iken mata le iken kalli,
le tina imol ye rumu tani in lono yo iken ke ete yege ni,
in pang diki a ipa so le du pumbe tana,
le nga be tidada a tidu be du tikauu,
ngan imata oo.
10 Motong la Paulu itoo di lapau a idu tana,
motong la du iloko lo tamoto kase tani in pono a iwookoo.
Inbe iwete pang di tooltool tina ngan nen,
“Kin lomim gurrungu be.
Nga imaur.”
11 Paulu tani in iwete nen,
motong la imulu a ilo pang ye rumu sokalana tani lo iye di tooltool tina ngan tigaua a tikana medana,
inbe tikan so gaongo lapau.
Motong la Paulu imadit a isudungu betebetanga pang di mulu le le du muntu mai le ni galanga,
motong la iyege di tooltool tina ngan sila tiyepe,
inbe ipa mulu nga.
12 Inbe di tooltool tina ngan tikaua tamoto kase tani yo imaur mulu i,
in a tila pang ni kidi.
Ngan le di tooltool tina ngan lodi ponana welewele.
Paulu Iyege Toroas Inbe Idi Pang Malala Mai Miletus
13 Amye Paulu amkarata betanga be amyiri ye ookoo atu,
inbe amkooi ye a ammuku pang malala mai Asos le di amnamu nango.
Inbe ya in ole ipa tana le ilong,
ngan la be amye amkooi ye ookoo nga.
14 Ye kene tani in Paulu ipa le long pombe pang yam Asos,
motong la ampayira lapau,
inbe amye amkooi a amla pang ye motmot yo ene Mitilini i.
15 Amla amyepe Mitilini,
motong la bongbongini ki nga,
ngan amkooi mulu le la pombe potai pang ye motmot Kios.
Ngan le ke tani in iman a ila,
motong la ye ke san mulu ngan amkooi le di amsolo ye motmot Samos nga.
Le nga ke tani in iman a ila,
motong la ye ke san mulu in nga,
ngan amkooi le di pombe ye malala mai Miletus nga.
16 Ngan Paulu tani in lon kaua urata be ikooi le ikapusu Epeses,
yesoo lono be di iyepe kaiye mata ye tana mai Esia tiap.
Ngan ya in ipakaikai be idi a ilo tarai pang Yerusalem,
a nen ngan be igoro lal maiyoko kidi Yuda ke kaningi so matana yo tiwete ene ye Pendekos i,
in be pombe nga,
ngan ole ikamata nango la Yerusalem ngo.
Paulu Iwanga Pang Di Kuto Maimai Ke Epeses
17 Ngan Paulu idi pombe Miletus,
motong la iwanga pang di kuto maimai kidi tooltool yo tigaua ye bareme ke Yesu a tiyepe Epeses nga,
ngan be timan pang ye be man tiye tiwetewete ngan.
18 Ngan tina nen nga,
le di kuto maimai tina ngan timan pombe,
motong la iwete pang di nen,
“Ai,
kulkulunu yege,
ye kene yo apola pombe ye tana mai Esia ye in le se nookoot nga,
ngan ang tapmim ngan lomim galanga ye dada kiau yo ayei pang ye ke tina le imot yo ayang tayepe ye,
ngan oo.
19 Le ang nga lomim galanga nen,
ye ke alunu san la di Yuda tina tiraua betanga a be tigarungau ye nga.
Ngan ye dada kidi yo tiyeii nen i,
in le tikaua lo modoko inbe touanga mai pau le atang kaiye san.
Bong ngan au tauk i atarau le adu lopo ni,
inbe ayei urata tani ke Tool Mai i.
20 Inbe ang ngan lomim galanga lapau nen,
au i awetewete pang ye betanga ke Maro nga,
ngan atarkoo betanga dook mata moolmool yo be alonang ye ngan sa,
nga tiap.
Bong apatomonai ang mallangana ye ni ke gaongo,
inbe ye rumu tina yo kiang atu atu nga,
ngan lapau.
21 Kanakana ngan awetewete betanga medana pang di Yuda le di Girik be tiportak lodi pang Maro ye dada dook tiap kidi yo tiyei nga,
inbe di le imot be titara lodi medana pang Tool Mai kiidi yo Yesu i.
22 “Le kalongo.
Maro Amunu Silene ila lok,
inbe ya taunu ipasongosongau be nookoot nga adi a alo pang Yerusalem.
Ngan au i lok galanga ye soo so yo be alo Yerusalem ngan pombe pang yau,
in tiap.
23 Bong au i lok galanga nen,
ye malala maimai tina le imot yo apa pang ye nga,
ngan Maro Amunu Silene iwete pau nen,
be rumu dook tiap kidi talnga dikidiki yo be di tooltool titarau a alo lono nga,
inbe urata moonoo masngana yo be di tooltool tiyei pau nga,
ngan alunu san la inamau a ikenen ngo.
24 Bong ngan au i ke be akamata yepongo kiau ben so dook mata pau,
ngan tiap.
Yesoo,
au i lok mede be atoo dada yo apa ye koot i,
a nen ayei poraia urata yo Tool Mai Yesu ikauu pau i,
in le imot ngan.
Ngan urata tani i,
in ke be awetewete pang di tooltool ye bingi dook mata ke Maro yo be lono pang di a iyei dada dook mata pang di nga.
25 “Muku ngan ayang tayepe,
inbe awetewete pang ye dada yo Maro be matan kala di tooltool ki ye i.
Bong nookoot nga lok galanga nen,
pang dama ni nga,
ngan ang tina nga le imot ngan sa o ke be ikamata matak mulu tiap.
26 Ngan nen le nookoot nga be awete betanga galangana pang nen.
Kumata le be ang tina ngan atu be ilene nga,
ngan in au busunu kiau tiap,
27 yesoo au i awetewete pang nga,
ngan atarkoo betanga sa yang ye dada le imot yo Maro lono be katoo,
ngan tiap.
28 Le be nen nga,
ngan kin ang tapmim kakawai yang dook leu,
inbe kakawai ye di tooltool le imot yo tigaua ye bareme ke Maro nga.
Di ngan di tooltool tina yo ya taunu iyimi di ye rara ke Natunu nga,
ngan nen le tiyei ben di sipsip ki.
Ngan nen le Maro Amunu Silene ipootang be kayei kuto maimai pang di,
le matamim kala di sipsip ke Maro tina ngan dook.
29 Ngan au i lok galanga nen,
ye kene yo be ayegang ye in nga,
ngan ole di gaunu gok dook tiap la be timan a man tiyepe kataunu yang,
a nen ngan man tigarung di sipsip tina nga.
30 Inbe ang tapmim lapau,
di tooltool kiang kapala ole timadit a tikap lungunu yang,
inbe tipalele betanga yo moolmool i,
a be nen ngan di tooltool yo ke Maro nga,
ngan titara lodi medana ye betanga kidi a la titoo di ben di galiudi.
31 Le kin kakawai yang dook leu!
Inbe lomim tut ye rai kerana tol yo ayang tayepe ye nga,
ngan ye ke le bong tina yo kanakana nga,
ngan au i matak surun du yang,
ngan nen le amaryoo ye kaungu noonoongoo pang ang atu atu,
ngan tiap.
32 “Ngan nen le nookoot nga,
atarang la Maro baene,
inbe lok be lomim tut betanga ke Maro ye dada dook mata yo be iyei pang nga.
Ngan betanga ke Maro tina ngan la be ipamedang,
inbe ikap so dook mata yo Maro lono be ikap pang di tooltool ki le imot yo ipootoo di panga ya taunu nga.
33 Ye kene yo ayang tayepe ye in nga,
ngan au i matak gorengana ye pat gol le silba,
too wam le so ke tool siap.
34 Ang tapmim nga lomim galanga yau ben ye au tauk baek ngan ayei urata ye so yo be ilonau ye yepongo kiau nga,
inbe ayei urata ye so yo be alon di tooltool yo aye di amyepe,
ngan lapau.
35 Inbe ye so tina le imot yo ayei nga,
ngan be apatnaia dada pang nen;
kumata le be idi nga tayei urata le gurada nga,
ngan la be talon di tooltool yo ke be di tapdi tilon di tiap nga.
Ngan nen le ole lod tut betanga ke Tool Mai Yesu yo ya taunu iwete nga.
Ngan Yesu tani in iwete nen,
‘Lo ponana ke tool yo ikap so pang ene i,
in ole illoso lo ponana ke tool yo ikap so i.’ ”
36 Paulu iwete pang di nen a imot,
motong la iye di kuto maimai tina ngan tigun turudi,
inbe ipatarau.
37 Ipatarau a imot,
motong la di le imot titang,
inbe tiwookoo Paulu a tisomo pangana.
38 Ngan di le imot lodi modoko dook tiap,
yesoo bong Paulu iwete pang di be o ke be tikamata matana mulu tiap.
Motong la tikaua Paulu a du titaru ookoo pono nga.