Saolo Iportaka Lono
9
1 Ye kene tani in Saolo isootoo betebetanga pang di tooltool yo tiyei Tool Mai di galiunu nga,
be ole iraumatamata di a timmata.
Le nga ila pang ye tool kuto mai ke paroranga so pang Maro,
2 a la itoru be iwodo rau pang di kuto maimai ke di rumu kidi Yuda ke gaongo yo tiken ye malala mai Damaskas nga.
Le nga tool kuto mai tani in iwodo rau tina,
motong la ikap pang Saolo.
Ngan ye rau tina ngan betanga ki iwete nen,
“Kumata le be Saolo ipuske di tooltool tamoto too garup be itoo Dada yo ke Yesu nga,
ngan ole iparama di ben di tooltool talnga dikidiki nga,
inbe ikap di a timan pang Yerusalem.”
3 Motong la Saolo tani in imadit a iyege Yerusalem,
inbe ila pang Damaskas.
Ngan ye kene yo ipa a ila potai pang Damaskas ye in nga,
ngan le pattu leu in be so ben sul nunngana ilolo ye malala ke Maro a isi pang ye,
le si iwakaii.
4 Motong la imol du tana,
inbe ilongo tool atu kalngana iwete panga nen,
“Saolo,
Saolo,
nga yelei a be kugarungau nga?”
5 Saolo ilongo tool tani in kalngana iwete panga nen nga,
motong la iyei ne,
“Tool Mai,
ngan in ong sei?”
Motong la se tool tani iyei ne,
“I au Yesu tani yo be kugarungau i,
in naii.
6 Le nookoot nga kumadit a kupa le la pombe ye malala mai.
Ngan la be ole tool atu iwete pong ye so yo be kuyeii i.”
7 Di tooltool tina yo tiye Saolo tila nga,
ngan tilongo tool kalngana yo iwetewete nga,
bong tikamata touo tool sa kanono tiap,
le sila tikodo be koodi danganga leu.
8 Motong la Saolo imadit lo ikodo a be matan rere,
bong ngan matan todotodo le ke be ikamata ni ye tiap.
Motong la di tooltool ki yo iye di tipa nga,
ngan titoko baene inbe tirara a tila le la pombe Damaskas nga.
9 Ngan ila iyepe Damaskas nga,
ngan matana tina ngan todotodo go le iyepe nen ye ke tol,
inbe ikan so le iyin ran tiap lapau.
10 Ngan Yesu galiunu atu yo ene Annias i,
in iyepe la Damaskas ngo.
Le nga ye mianga ki ngan ilongo Tool Mai be ipootoo ene,
inbe koonoo panga nen,
“Annias.”
Ngan se Annias tani in iraua betanga ki nen,
“Tool Mai,
au naii.”
11 Motong la Tool Mai tani in iwete panga nen,
“Kumadit a kutoo dada yo tiwete ene ye Dada Dundunngana i a kula pang rumu ke Yuta.
Ngan kupa le la pombe ye rumu ki nga,
ngan kutor ye tool atu ke malala mai Tasas,
yo ene Saolo i. Nookoot nga ya la ipatarau a iyepe ni.
12 Ngan Saolo tani in ye mianga ki nga,
ngan ikamata tool atu yo ene Annias i,
in ya la be iman a ilo ye rumu lono lo itara baene lo pono,
a be nen ngan ikamata ni mulu i.”
13 Ngan Annias tani in Tool Mai iwete panga nen ye mianga,
motong la iraua betanga ki nen,
“Atoo,
Tool Mai,
di tooltool alunu kaiye la tiwete pau ye tool tani,
inbe ye dada dook tiap ki matana matana yo iyei pang di tooltool kiong yo tiyepe Yerusalem nga.
14 Inbe alongo betanga san mulu nen,
be di tooltool maimai ke paroranga so pang Maro ngan timalum panga be iman nanga,
a be nen ngan man iparama di tooltool le imot yo tisung inbe tipatarau ye em a tiyepe ni nga.”
15 Bong ngan Tool Mai iwete panga nen,
“Tiap!
Ole kula la kuyei so yo ben awete pong ye nga,
yesoo tool tani ni apootoo be iyei urata kiau,
a be nen ngan ikaua betanga kiau la iweteweta pang di tooltool yo tipa ye rara kidi Yuda tiap nga,
ngan tiye di tooltool kuto maimai kidi yo matadi kala di nga,
inbe pang di tooltool yo ke Isrel nga,
ngan lapau.
16 Inbe urata moonoo masngana alunu yo be isolo ye au ek nga,
ngan au tauk ole apatnai panga.”
17 Tool Mai iwete panga nen,
motong la Annias imadit a ila pang ye rumu yo Saolo tani in iyepe ye,
ngan le ipa so le ilo rumu lono lo ipuske.
Motong la ipaloko baene lo Saolo pono,
inbe iwete panga nen,
“Ai,
took Saolo!
Tool Mai Yesu yo kaman dada ngan pombe pang yong i,
in ya la iwangau a aman pang yong i,
a be nen ngan kumata ni mulu,
inbe ole Maro Amunu Silene ipaponong.”
18 Annias tani in iwete pang Saolo nen a imot,
le tina pattu leu inbe so ben soko kooloonoo nga igoolook ye Saolo matana a imol du tana,
inbe ikamata ni mulu.
Motong la imadit tina ngan le tirriuu ye ran,
19 inbe ikan so a tinini gurana mulu nga.
Saolo Iwetewete Bingi Dook Mata Pang Di Tooltool Ke Damaskas
Saolo tani in iye Yesu di galiunu tiyepe ye ke alunu la Damaskas ngo.
20 Motong la imadit tina ngan le ilo rumu kidi Yuda ke gaongo tina atu atu nga,
ngan lono,
lo ikodo dama kidi,
inbe iwete pang di nen,
“Yesu in Maro Natunu.”
21 Ngan Saolo tani in iwete nen,
le di tooltool le imot yo tilongo betanga ki nga,
ngan titakrai.
Inbe tiyei ne,
“Ona,
ni tool tani yo igarung di tooltool ke Yerusalem yo tisung inbe tipatarau ye Yesu ene i,
in nani,
too?
Ngan ya in iman ni nga,
ngan be man iparama di tooltool tina ben di talnga dikidiki nga,
inbe ikap di a tila pang ye di tooltool maimai ke paroranga so pang Maro,
too?”
22 Di ngan tiwete nen,
bong ngan Maro ipamede Saolo le gurana ki ise le mai san.
Ngan nen le iwete a ipagalanga di Yuda yo tiyepe Damaskas ngan lodi dook nen,
be Yesu in Kirisi,
tool tani yo Maro ipootoo be si ikap di tooltool ki a ipamulu di i.
Ngan nen le di Yuda yo tilongo betanga ke Saolo nga,
ngan tisere betanga yo be tiweta panga i.
Di Yuda Tiraua Betanga Be Tiraumata Saolo A Imata
23 Tiyepe le nga ke alunu iman a ila,
motong la di Yuda tina tigaua a tiraua betanga be ole tiraumata Saolo a imata.
24 Bong ngan Saolo tani in ilongo betanga ben di Yuda tina,
ngan tikodokala dada ke koongoo ke malala mai tani in ye ke le bong yo kanakana nga,
a nen ngan be tikamata ngan tiraumate le imata.
25 Le nga Saolo di galiunu pattu,
ngan bong,
motong la tikauu a tilo ye koongoo mai yo tikauu le iwakaia malala mai i,
in gumono atu.
Motong la tiwete panga a iwur ye karei mai atu yo tikooi ye koro in lono,
inbe tiwatu ye ooroo a tipadua ye koongoo gumono tani le idu ke diki ke malala mai tani in.
Saolo Ilo Iyepe Yerusalem
26 Saolo idu ke diki,
motong la ipa le lo pombe Yerusalem,
le nga ikapye be la iwetewete pang Yesu di galiunu a nen ngan iye di tigauagaua.
Bong ngan di tooltool tina ngan titara lodi medana ye be ya in iyei Yesu galiunu moolmool tiap,
le nga titattadaii.
27 Motong la Banabas ikaua Saolo a yaru tila pang ye di aposol tina ke Yesu nga.
Ngan tila,
motong la Banabas tani in igasa pang di ye Saolo yo itoo dada a be ila pang Damaskas nga,
ngan le Tool Mai pombe pang ye,
inbe iwetewete panga.
Inbe igasa pang di aposol tina ye Saolo yo itattadai di tooltool tiap,
bong iwetewete le koon mede a iraia bingi dook mata ye Yesu ene pang di tooltool ke Damaskas nga.
28 Ngan nen le Saolo tani in sila iye di aposol tiyepe Yerusalem,
inbe iye di tigauagaua dook mata.
Inbe ya in itattadai tiap,
bong ipa be iwetewete le koon mede a iraia bingi dook mata ke Tool Mai ene pang di tooltool.
29 Inbe ila ye di Yuda yo tilongo di Girik koodi nga,
ngan la iye di tiwetewete a tiparsu ye betebetanga lapau.
Bong ngan le di tooltool tina ngan tikapye be tisere dada yo be tiraumate ye a imata i.
30 Le nga ye kene yo Saolo tani in di diene tilongo betanga yo tikapye be tirauu nga,
motong la tikauu a tiye tidu malala mai Sisaria du titaru,
a be nen ngan idu pang malala mai Tasas.
31 Ngan nen le di tooltool yo tigaua ye bareme ke Yesu a tiyepe ye tana mai Yudia le Galili inbe Samaria nga,
ngan di le imot tiyepe ye lo silene dook mata.
Le tool sa yo be igarung di mulu,
nga tiap,
inbe Maro Amunu Silene ipamede di,
le titoo dada dook mata yo ke be tiyepe la Tool Mai parmana nga.
Inbe Maro Amunu Silene iyei di tooltool kapala mulu a titara lodi medana le se tiye di tigaua le kinkatingi kidi ilo pang ete.
Pita Ikarata Aingas Le Tinini Dook Mata Mulu
32 Pita ipa ye ni mai i le imot ye tana mai tani in,
le nga kene atu in ipa le du pombe ye malala mai yo ene Lida i.
Ngan idu be du matan so di tooltool ke Maro yo tiyepe ye malala mai tani in nga.
33 Ngan le ikamata tool atu yo ene Aingas i.
Ya in kene ikap rama le ke be ipa tiap,
bong ipas le iken mie pono ki leu ye rai limi be tol oo.
34 Pita ikamata,
motong la iwete panga nen,
“Aingas,
nookoot nga ole Yesu Kirisi ikaratong le tinim dook mata mulu.
Le kumadit a kuloyo mie kiong i.”
Ngan Pita iwete nen,
le tina pattu leu inbe Aingas tani in imadit.
35 Ngan yeisa be di tooltool yo tiyepe ye malala Lida le Saron nga,
ngan tikamata Aingas yo tinini gurana mulu a ipa nga,
ngan le di alunu kaiye la tiportak lodi mulu,
inbe titara lodi medana pang Tool Mai nga.
Pita Ipamaditi Tabita Le Imadit Mulu
36 Garup atu yo iyei Yesu galiunu koot a iyepe ye malala mai Yopa i,
in ene la Tabita i.
(Ngan Tabita tani in be taportaka ene ye di Girik koodi,
ngan ole taweta ye Dokas).
Ya in kanakana ngan iyei dada dook mata,
inbe ilon di tooltool yo ballingadi tiap nga.
37 Motong la ye kene tani yo Pita iyepe Lida ye in nga,
ngan matamatenge mai ikaua Tabita tani le nga imata.
Motong la tirriui bobono,
inbe tikauu lo titaru a iken ye rumu sokalana atu yo iken ke ete i.
38 Ngan malala Lida tani,
in iken potai pang ye malala Yopa lapau,
le nga Yesu di galiunu tina tilongo betanga ben Pita la man iyepe Lida i.
Motong la tiwanga di tooltool ru be la tiwete pang Pita a tipakaikaii nen,
“Tool mai,
kunam be,
bong kupa tarai a kuman pang yam ngan.”
39 Ngan Pita ilongo yo tiwete nen nga,
le nga imadit tina le iye di timulu a tila.
Tila pombe,
ngan tikauu a tipa so le tilo ye rumu lono ke ete yo garup tani in bobono iken ye i.
Motong la di garup tap nga,
ngan di le imot timan tikodo le tigaliui Pita a titang,
inbe tipatnai sousoungu mooloo mooloo ipa ye sousoungu matolene kapala yo Dokas tani,
in isai a ikap pang di ye kene yo iye di tiyepe ye in nga,
ngan pang Pita be ikamata.
40 Motong la Pita inganga di tooltool tina yo tiyepe rumu lono ngan le imot a tidu tana.
Motong la igun turunu,
inbe ipatarau.
Motong la iportak le matana pang ye garup tani in bobono,
inbe iyei ne,
“Tabita,
kumadit!”
Le nga Tabita tani,
in be matan rere ngan ikamata Pita,
motong la imadit le se iwur.
41 Le nga Pita itoko baene,
inbe ipamaditi le lo ikodo.
Motong la Pita koonoo pang di tooltool yo titara lodi medana pang Yesu nga,
ngan tiye di garup tap tina ngan be se ipatnaia Tabita tani in pang di ye yo imaur mulu nga.
42 Ngan mos tani yo Pita iyeii i,
in bingi ki idada le di tooltool le imot yo ke malala mai Yopa nga,
ngan tilonga.
Ngan nen le di tooltool alunu kaiye la titara lodi medana pang Tool Mai nga.
43 Motong la Pita in sila iyepe nango la Yopa ngo ye ke alunu.
Ngan le iye tool atu yo ene Simon in yaru tiyepe.
Ngan tool tani in urata ki ke be ikap asara kulini a be iyei so kapala ye.