Yesu In Tool Dook Mata Ke Be Matan Kala Di Sipsip
10
1 Motong la Yesu iseke betanga ki mulu a iwete pang di nen,
“Awete pang moolmool nen,
tool yo be ilo pang ye di sipsip,
ngan ipa ye dada ke koongoo tiap,
bong irookoo sokorai ye ni san a ilo pang koongoo lono i,
in tool ke pinnau inbe tool ke garungunu so kidi tooltool kapala.
2 Bong tool yo ipa ye dada ke koongoo a ilo pang koongoo lono i,
in tool yo be matan kala di sipsip i.
3 Ngan nen le tool yo ikodokala dada ke koongoo i,
in ole iso dada panga.
Lo ngan be ikiu di sipsip ki tina ngan atu atu edi nga,
ngan ole tilongo kalngana le titoo,
inbe irara di a tidu pang tana.
4 Inbe ye kene yo be irara di sipsip ki ya taunu tina ngan a tidu tana le imot nga,
ngan ole ipa le imuku,
inbe titoo,
yesoo lodi galanga ye kalngana oo.
5 Ngan di sipsip tina ke be titoo sokorai tool san tiap.
Kumata be tool san ikiu di nga,
ngan ole tikoo,
yesoo di ngan lodi galanga ye kalngana tiap.”
6 Yesu iwete le ikatte betanga pang di Paresi nen,
bong ngan lodi galanga ye betanga yo iwetewete pang di ye nga,
ngan punu tiap.
7 Le tina iwete pang di mulu nen,
“Awete pang moolmool nen.
Au tauk i la dada ke koongoo yo be di sipsip tipa ye i.
8 Ngan di tooltool le imot yo timuku a timan pang ye di sipsip nga,
ngan di tooltool ke pinnau,
inbe di tooltool ke garungunu so kidi tooltool kapala,
bong di sipsip tina tilongo kalngadi tiap.
9 Ngan au tauk i la dada ke koongoo i.
Ngan nen le kumata sei tool be iman yau a be nen ngan ilo pang koongoo lono nga,
ngan ole apamule ye so dook tiap yo be igarungu i.
Inbe ole ipa a ilo be isi,
a be nen ngan ikap kaningi yo be ikan a itoka i.
10 Ngan tool yo ke pinnau i,
in iman be man ipinoo di sipsip,
inbe iraumata di a be igarung di leu.
Bong au i asi nga,
ngan be si akaua yepongo yo dook mata le dook mata ki taunu i,
in pang di.
11 “Au i la tool dook mata ke be matak kala di sipsip i.
Ngan tool dook mata ke be matan kala di sipsip i,
in ole ya taunu iraia tinini be ilon di sipsip ki ye.
12 Bong kumata le tikaua tool atu a titaru be matan kala di sipsip tina,
a be nen ngan ikap pat ye urata kootoonoo ki leu nga,
ngan ya in dawa ben di sipsip tina ngan taudi moolmool,
in tiap.
Le ye kene yo be ikamata gaunu gok be iman pang ye di nga,
ngan ole iyege di sipsip tina sila tikino,
inbe ikoo welewele a ila.
Lo ngan be gaunu gok tani in ole iman a man ikan di,
inbe inin di a timagirigiri a tikoo.
13 Ngan tool tani in ole ikoo a ila,
yesoo ya in iyei urata be ikap pat ye leu,
le lon rru mata ye di sipsip tina,
ngan tiap.
14 “Au i la tool dook mata ke be matak kala di sipsip i.
Le lok galanga ye di sipsip kiau,
inbe di lodi galanga yau,
15 dawa ben yo Tamak lon galanga yau,
inbe au lok galanga ye nga.
Inbe ole araia tinik be alon di sipsip tina ngan ye nga.
16 Ngan au i di sipsip kiau kapala lapau,
bong di ngan tiyepe ye koongoo i tiap.
Le ole akap di a timan lapau,
a nen ngan ole tilongo kook,
inbe man agaua di tiye di sipsip kiau kapala nga le tiyepe ye budanga atu,
inbe tool ataleu la be matan kala di i.
17 Le ye punu i la le Tamak in lono pau mai san ye i,
yesoo au i ole araia tinik a amata,
lo ngan be amadit le se amaur mulu.
18 Ngan tool sa ke be iraumatau a amata le apa so,
nga tiap,
bong atoo au tauk lok la le ayei nen nga.
Ngan au i gurana kiau ke be araia tinik a amata,
inbe gurana kiau ke be amadit mulu le se amaur,
yesoo atoo betanga yo Tamak ikap pau nga.”
19 Yesu iwete nen a di Yuda tina ngan tilongo,
le nga tiparpoto mulu.
20 Ngan nen le di alunu la tiyei ne,
“Ai,
nga yelei a kalongo tool in koonoo nga?
Ya in so sadi idiwidiwoo le ngan iyei kapakapa.”
21 Bong ngan di diedi kapala tiyei ne,
“Ngan betanga nga ke be tool yo so sadi idiwidiwoo i,
in iwetewete ye,
nga tiap.
Ngan lomim belei,
so sadi in ke be iyeie tool yo matan kis in le matan rere,
too?”
Yesu Iwete Be Iye Tamana Nga Ataleu
22 Ngan gaongo maiyoko ke sungunu yo be di Yuda lodi tut ye kene yo di sasa kidi tiso dada ke bareme ke sungunu ye i,
in pombe Yerusalem.
Ngan lal tani in pombe ngan igoro mou lapau.
23 Le nga Yesu ilo bareme mai ke sungunu lono,
lo ipa ye ni yo tiwete ene ye Kookoowoo ke Solomon i.
24 Inbe di Yuda timan le man tigaua a tigaliu,
inbe tiwete panga nen,
“Ai,
tayepe kaiye mata oo,
ole nge lo kupapos pam a nen ngan lomam galanga yong?
Kumata be ong i Kirisi nga,
ngan kuwete pobe pam.”
25 Motong la Yesu iraua betanga kidi nen,
“Au i awete pang oo,
bong ngan katara lomim medana pau tiap.
Ngan mos yo ayei ye Tamak ene nga,
ngan be ipaposau pang a kakamata.
26 Bong ngan katara lomim medana pau tiap,
yesoo ang nga di sipsip kiau tiap.
27 Di sipsip kiau nga tilongo kalngak a titoo au.
Au i lok galanga ye di,
28 inbe ole akaua yepongo dook mata yo taukan motingi i,
in pang di.
Ngan nen le ke be timmata a tilledi,
ngan tiap.
Inbe tool sa o ke be man ipasnak di ye baek tiap lapau.
29 Yesoo,
Tamak la ikap di pau i.
Ya in gurana ki mai san le illos so nga le imot,
le tool sa ke be man ipasnak di sipsip nga ye Tamak baene,
ngan tiap.
30 Ngan au i aye Tamak nga ataleu.”
31 Di Yuda tilongo tina yo Yesu iwete nen nga,
le nga katedi malmal a tikap pat be tikatmate ye a mata,
32 bong ngan iwete pang di nen.
Iyei ne,
“Au i apatnai mos maimai alunu ke Tamak a kakamata oo.
E nga mos nangai kakamata ngan lomim dook tiap ye a le kakap pat be kakatmatau ye i?”
33 Motong la di Yuda tina ngan tiwete panga nen,
“Am nga be amkatmatong ye urata dook mata yo kuyei nga,
ngan tiap.
Bong kon paseme Maro,
yesoo ong i tool sokorai,
bong kuwete be ong taum in Maro.
Le ye punu in la le amkap pat be amkatmatong ye i.”
34 Motong la Yesu iraua betanga kidi nen,
“Betanga yo tiwodo lo ye ger kiang,
ngan iwete nen,
‘Au i awete nen,
ang nga maro.’ a
35 Muku ngan Maro iwete betanga ki pang di tooltool,
ngan le iwete be di ngan maro.
Le betanga tina ngan tiwodo lo ye rau ki oo,
le ke be tayege sa a idu tana,
nga tiap.
36 Ngan au i,
Tamak ya taunu la ipootau,
inbe iwangau a le asi tana i.
Bong ngan yelei a awete be Au i Maro Natunu nga,
ngan kawete be akan paseme Maro nga?
37 Kumata le be ayei urata ke Tamak tiap nga,
ngan kin katara lomim medana ye betanga kiau be.
38 Bong au i ayei urata ke Tamak.
Ngan nen le kumata be katara lomim medana ye betanga kiau tiap nga,
ngan katara lomim medana ye urata yo ayei nga,
a nen ngan lomim galanga nen,
au i Tamak iyepe yau,
inbe au i ayepe ye Tamak.”
39 Yesu iwete nen,
le nga di Yuda tina ngan tikapye be tikauu mulu a tiparama,
bong ngan ilungmai di,
inbe ikoo a ila.
40 Motong la Yesu imulu a ila ngan le la ikesiutu ran Yodan le ila pombe ye ni yo muku ngan Yowan irriu di tooltool ye i.
Le nga sila iyepe ye ni tani,
41 inbe di tooltool alunu la timan pang ye nga.
Ngan timan,
motong la di tapdi tiwetewete nen,
“Ai,
Yowan in iyei touo mos sa be iyei tarkilanga panga,
ngan tiap,
bong betanga le imot yo Yowan iwetewete ye tool i nga,
ngan moolmool sa.”
42 Le ye kene tani in di tooltool yo tiyepe ye ni tani nga,
ngan alunu la titara lodi medana pang Yesu nga.