Yesu Ikarata Tool Atu Yo Tinin Sarer I, In Ye Lal Kidi Yuda Ke Sungunu
14
1 Ye kene atu in lal kidi Yuda ke sungunu in pombe,
le nga Yesu ilo be lo ikan so ye rumu ke tool kuto mai atu kidi Paresi nga,
ngan di tooltool matadi ikenen ye be tikamata ole iyeie so sa lapau,
too tiap.
2 Ngan tool atu yo tinin sarer i,
in iyepe potai pang ye Yesu lapau.
3 Le nga Yesu ikamata tool tani,
motong la itor di kuto maimai ke ger ke Maro tiye di Paresi nen,
“Ai,
nga be atorang.
Ger ke Maro iwete belei,
be takarata di tooltool yo matamatenge ikap di nga,
ngan ye lal kidi Yuda ke sungunu lapau,
too tiap?”
4 Bong ngan tiwete touo betanga siap.
Tipas le tipalongo leu.
Le nga Yesu ipaloko baene lo ye tool tani in a ikarata ye matamatenge ki le tinini dook mata mulu,
motong la iwete panga be ila pang ni ki nga.
5 Motong la Yesu iwete pang di mulu nen,
“Kumata le ang tina ngan atu be natunu,
too asara ki yo bulumakau,
in be imol du ran kelingi atu lono ye lal kidi Yuda ke sungunu nga,
ngan ole yelei,
palbe leu be le kayit taraii a ise ete mulu,
too?”
6 Ngan le tirau touo betanga ki pitiap yege.
Ong Taum Kuyitmakong Be
7 Ye kene tani in Yesu ikamata di tooltool yo tikiu di a tise rumu lono ye mailang tani in nga,
ngan lodi be lo tiwur ye kookoowoo yo be di tooltool edi maimai ngan tiwur ye nga.
Le nga ikatte betanga atu pang di nen,
8 “Kumata be tool atu ikiu ong a kula ye mailang ke kerenge nga,
ngan kin katem ro lo kuwur ye kookoowoo kidi tooltool yo edi maimai nga,
ngan be.
Yesoo,
ole nen ngan be mailang taunu tani in ipootoo tool san yo ene mai le illosong i,
in ya la be lo iwur ye kookoowoo tani i.
9 Le kumata be kuyei nen nga,
ngan mailang taunu yo ikiu ang angru i,
in ole man iwete pong nen,
‘Tool kiau,
kumadit ye kookoowoo in a kouu pang tool i a iwur ye.’
Ngan ole moomoom a kumadit le kukoo du kuwur meneng mur yege ni.
10 Ngan nanga,
kumata be tool atu ikiu ong be kula ye mailang ki nga,
ngan kulo le lo kuwur ye kookoowoo yo ke mur nga,
a be nen ngan tool tani yo ikiu ong i,
in iman le be man ikamatong nga,
ngan ole iwete pong nen.
Iyei ne,
‘Atoo,
tool kiau,
kumadit a kulo le lo kuwur ye kookoowoo dook mata meneng ke dama ngo atu.’
Ngan kumata le be iyei nen pong nga,
ngan ole iyitmaka em la di diem kapala yo kuye di kalo ye mailang tani nga,
ngan matadi.
11 Awete pang nen,
yesoo sei tool yo ya taunu iyitmaki le ilo ete i,
in ole Maro itaru le idu lopo ni.
Bong sei tool yo ya taunu itaru le idu lopo i,
in ole Maro iyitmaki le ilo ete ni.”
12 Motong la Yesu iwete pang Paresi tani yo ikiuu be man ikan so rumu ki i,
in nen,
“Be kukiu di tooltool a be kuye di kakan so kemai,
too rrai nga,
ngan kin kukiu di tooltool kiong,
too di taim le toom,
too di rara kiong kapala,
too di tooltool ballingadi yo tiyepe potai yong,
ngan be.
Yesoo,
kumata le be kuyei nen nga,
ngan pang dama ni nga,
ngan ole di lapau tikiui ong ye kaningi kidi,
inbe tirau kaningi kiong tina.
13 Bong be kuyeie kaningi kiong atu nga,
ngan kukiu di tooltool yo ballingadi tiap nga,
inbe di tooltool yo turadi ikalel nga,
inbe di tooltool yo kedi dook tiap nga,
inbe di tooltool yo matadi kisis nga.
14 Di ngan o ke be tiyeie kaningi sa be tirau so kiong ye,
ngan tiap.
Bong Maro ole iyei urata dook mata pong,
yesoo pang dama ni nga,
ngan ye kene yo Maro be ipamadit di tooltool noonoodi yo timmata koot ngan le timadit mulu ye ni ke matenge nga,
ngan ole iraukol so kiong tina ngan pong.”
Kattenge Betanga Ke Mailang Maiyoko Atu
15 Di tooltool tina yo tiye Yesu tiwur le tiwakaia kookoowoo ke kaningi so nga,
ngan atu ilongo tina yo Yesu iwete nen nga,
le nga iwete panga nen,
“Di tooltool yo tilo be lo tigaua ye di tooltool yo Maro be matan kala di nga,
inbe tiye di tiwur be tikana mailang tani nga,
ngan Maro ole iyei urata dook mata pang di le lodi ponana.”
16 Bong ngan Yesu iraua betanga ki nen,
“Tool atu in iyeie mailang maiyoko,
motong la ikiu di tooltool alunu la timan be man tikana mailang ki tani in nga.
17 Ye kene yo ikarata kaningi ke mailang tani in a imot,
motong la iwanga kapraingi ki be la iwete pang di tooltool yo ikiu di be man tikana mailang tani ngan nen,
‘Ai,
kaman a tala la kakan so.
Kaningi ngo,
amkarata a imot oo.’
18 “Bong di tooltool tina ngan di le imot lodi be tila ye mailang tani in tiap,
le nga di atu atu tiwete lodi pang kapraingi tani.
Le nga tool yo ila ye muku in iwete panga nen,
‘Au i nookoot yege sa ayimi tana atu nga,
le nga be ala akamata.
Le asorai ong nen,
o amala ye mailang in tiap.’
19 “Inbe tool san in iwete panga nen,
‘Au i nookoot yege sa ayimi asara yo ene bulumakau ngan sangaul atu nga,
le nga be ala la ayei touo urata ye di.
Le asorai ong nen,
o amala ye mailang in tiap.’
20 “Inbe tool san mulu in iyei ne,
‘Au i nookoot yege sa akere paunu nga,
le o ke be amala ye mailang in tiap.’
21 “Motong la kapraingi tani in ikap betanga kidi tooltool tina,
ngan a imulu la iwete pang tool mai ki a ilongo,
le katen malmal,
le nga iwete pang kapraingi ki tani in nen.
Iyei ne,
‘Oo,
palbe kula la kutoo dada maimai inbe dada kapala ke malala mai i,
le be kupuske di tooltool yo ballingadi tiap nga,
inbe di tooltool yo turadi ikalel nga,
inbe di tooltool yo matadi kisis nga,
inbe di tooltool yo kedi dook tiap nga,
ngan kop di a timan rumu man tikana mailang kiau i.’
22 “Ngan kapraingi tani in itoo tool mai ki koonoo,
inbe la ikap di tooltool tina a timan rumu.
Bong ikamata rumu ngan ipon tiap,
le nga la iwete pang tool mai ki tani in nen,
‘Tool mai,
kumata nga,
atoo koom be akap di tooltool tina a tise rumu,
bong rumu lono mai la iken sokorai go i.’
23 “Motong la tool mai tani in iwete pang kapraingi ki nen,
‘Kupa le kukapusu malala mai i,
inbe kudu kutoo dada kakase ngo,
inbe la kudada koongoo ke kumu le be kumata di tooltool sa nga,
ngan kuwete le koom mede pang di a tise,
a be nen ngan rumu kiau i ipon dook ye di tooltool yo be tikana mailang i nga.
24 Awete pong nen,
di tooltool yo akiu di muku be tise ye mailang kiau ngan le tise tiap nga,
ngan o ke be tikan touo kaningi naunu ke mailang i pitiap yege.’ ”
Matam Too Ong Dook, Lo Ngan Be Kutoo Yesu
25 Di tooltool malala mai san la titoo Yesu a tiye tipa nga.
Le nga iportak be iwete pang di nen,
26 “Kumata tool atu lono be man itoo au,
bong lono yo itaru pang tamana le tinana,
inbe rimana le di natunu,
inbe di lini le taini,
inbe ya taunu yepongo ki in mai mata le illoso lono yo itaru pau in nga,
ngan o ke be iyei au galiuk tiap.
27 Inbe sei tool yo lono be isolo urata moonoo ben kai palasingi ki,
a itoo au tiap i,
in o ke be iyei au galiuk tiap lapau.
28 “Ngan kumata tool atu lono be ire rumu mooloo atu pang di tooltool yo itar di be matadi kala kumu ki nga,
ngan ole iwur inbe lon kaua urata dook ye pat pi yo be iyimi renge ke rumu tani in ye nga.
A nen ngan matan too,
ole pat ki tina ngan iye renge ke rumu tina yo iyimi ngan be ire ye le imot,
too tiap.
29 Kumata le iyei nen tiap,
inbe ikel saua a ipatokodo leu,
inbe rumu tani in kanono o ke be ire le imot tiap nga,
ngan ole di tooltool tikamata urata ki nen,
le tiyei sere ye a tingeleraii.
30 Inbe ole tiwete nen,
‘Atoo,
kakamata tool ni too,
katen ro ye renge rumu ki ngan iyeisa ole ire le imot.’
31 “Ngan gaongo leu,
kumata tool kuto mai yo matan kala tana mai atu i,
in lono be la iye tool kuto mai san tipatoko nga,
ngan o ke be imadit tina le ila la yaru tipatoko tiap.
Bong kulkulunu ngan ole iwur,
inbe lon kaua urata dook ngan,
yesoo ya taunu in tooltool ki ke patokongo ngan kinkatingi kidi ben 10,000 leu.
E tool kuto mai san yo be man ipamaditi patokongo i,
in di tooltool ki ke patokongo ngan kinkatingi kidi ben 20,000.
Ngan nen le tool kuto mai tani in ole lon wete nen,
‘Ai,
be amadit ye patokongo nga,
ngan ole gurak le alloso kuto mai san ni ye patokongo i,
too tiap?’
32 Ngan kumata be tool kuto mai tani in lon kaua urata le lon tar be o ke be illosi tiap nga,
ngan ye kene yo kuto mai san tani in iyepe manga mooloo go nga,
ngan ole iwanga di tooltool pattu a tila be la tiwete silli kuto mai tani,
a be nen ngan lon sil inbe tikarata betanga ke patokongo tani le imot.
33 Ngan gaongo leu,
kumata ang tina ngan atu be iwala murini pang so ki ke tana nga le imot tiap nga,
ngan o ke be iyei au galiuk tiap lapau.”
Kattenge Betanga Ke Tiek Yo Taukan Gurana I
34 Motong la Yesu iseke betanga ki mulu nen,
“Tiek in so dook mata,
bong kumata be gurana ki imot nga,
ngan ole kuyeie tiek tani in belei be iyei tiek mulu nga?
35 Ngan tiek yo taukan gurana nen i,
in dook mata ke be tatar lo ye asara tedi yo tigaun pang penge so,
nga tiap,
inbe o ke be iyeie tana le gurana tiap lapau.
Bong be nen ngan takatte.
Sei tool be talngana ke longono betanga nga,
ngan itar talngana dook a ilongo betanga kiau nga.”