Yesu Imadit Mulu Ye Ni Ke Matenge
16
1 Tiyepe ye lal kidi Yuda ke sungunu tani in a imot,
motong la Madia ke malala Makdala in iye Madia san yo Yemis tinana i,
inbe Salume,
ngan tiyimi kai surunu yo kini ki dook mata nga be la tisalini Yesu bobono ye.
2 Motong la muntu bongmai koot ye ke yo Sande in nga,
ngan ke ipiti matana tiao,
inbe di tol timadit a be tila pang ye agoro tani yo titara Yesu bobono ye i.
3 Tipa a tila ngan di tapdi tiwetewete nen,
“Ai,
ole sei tool be ipulu pat a ikoo ye agoro koonoo paidi i?”
4 Bong ngan ye kene yo be matadi gaga ye in nga,
ngan tikamata pat somai tani in tipulu a ikoo ye agoro koonoo oo.
5 Le nga tidewe a be tilo pang agoro tani in lono,
ngan tikamata tamoto koskos atu in iwur ke baedi oonoo.
Inbe isousou ye sousoungu kookoonoo mooloonoo.
Ngan tikamata le nga titattadai.
6 Motong la tool tani in iwete pang di nen,
“Kin katattadai be!
Au i lok galanga be ang ngan kaman be man kasere Yesu ke Nasaret yo tipatota lo kai palasingi kaini a imata i.
Bong ya in iyepe ni tiap.
Ya in imadit mulu ye ni ke matenge oo.
Le kaman man kakamata ni yo titara bobono ye i.
7 Bong kakamata nene,
lo ngan be kamulu a kala la kakaua bingi pang di galiunu,
inbe Pita lapau.
Ngan kawete pang di nen,
‘Yesu imuku a ila pang Galili oo.
Le katoo a kala ngan la be la kakamata nango,
ben tina yo muku ngan iwete pang nga.’ ”
8 Tina yo ngan le di garup tina ngan titattadai a titangarur le dook tiap yege,
inbe tipas a tidu tana le tina tidada a tiyege agoro tani in a tila.
Ngan le tiwete touo pang tool siap,
bong tipa so a tila,
yesoo titattadai.a
Yesu Pombe Pang Ye Madia Yo Ke Makdala I
9 Ye Sande muntu yege ngan Yesu imadit mulu ye ni ke matenge,
inbe la pombe pang ye Madia ke Makdala in muku.
Ngan ya in muku ngan Yesu inganga di so sadi limi be ru ye.
10 Motong la Madia tani in ila be la iwete pang di tooltool tina yo tiye Yesu tipa nga.
Ngan di ngan lodi modoko a nga titangtang ye.
11 Ila le la iwete pang di be Yesu imaur mulu le ikamata ye matana,
bong ngan titara lodi medana ye betanga ki tiap.
Yesu Pombe Pang Ye Di Galiunu Ru
12 Madia iwete pang di nen a imot,
motong la Yesu di galiunu ru tiyege malala mai inbe tipa a tila,
motong la Yesu pombe pang ye di.
Bong ngan tikilala tarai tiap,
yesoo matan palele mulu le dawa ben muku nga tiap.
13 Motong la yaru timulu la tiwete pang di diedi kapala,
bong ngan di diedi tina ngan titara lodi medana ye betanga kidi yaru tiap lapau.
14 Le ye kene san,
ngan di galiunu tina yo sangaul be atu nga,
ngan tigaua a tikanen so,
inbe Yesu ipa le lo pombe pang ye di.
Ngan le ipasak pang di,
yesoo di tooltool tikamata yo imadit mulu nga le la tiwete pang di,
bong ngan kutodi imede mata le lodi be titara lodi medana ye betanga kidi tiap.
15 Motong la iwete pang di nen,
“Nga ole kala kapa ye ni mai i le imot,
inbe kawetewete bingi dook mata kiau pang di tooltool nga le imot.
16 Ngan nen le kumata sei tool be itara lono medana ye a karriuu nga,
ngan Maro ole ikauu a ipamule ye so dook tiap yo be igarungu i.
Bong kumata sei tool be itara lono medana ye tiap nga,
ngan Maro ole ipaposi ye dada dook tiap ki yo iyeii i,
a be nen ngan iyemenaii ye.
17 E di tooltool yo titara lodi medana ye bingi dook mata kiau nga,
ngan ole akap gurana pang di be tiyei mos ye.
Le ye gurana ke au ek,
ngan ole tinganga di so sadi ye di tooltool,
inbe ole tiwetewete ye di malala malala koodi.
18 Inbe kumata le be tikaua moto dook tiap ye baedi,
too tiyin ran yo tigarung ye bar dook tiap nga,
ngan o ke be igarung di tiap yege.
Inbe kumata le be tipaloko baedi lo di tooltool yo matamatenge ikap di ngan podi,
inbe tipatarau pang Maro be ilon di nga,
ngan ole tinidi dook mata mulu.”
Yesu Ilo Pang Malala Ke Maro
19 Tool Mai Yesu iwete pang di nen a imot,
motong la Maro ikauu a ipamule a ilo pang ye malala ki nga,
ngan le lo iwur ye baene oonoo.
20 Motong la di galiunu tina ngan tila la tiwetewete bingi dook mata ki ye ni mai i le imot nga.
Ngan le Tool Mai Yesu iyepe ye di a ilon di ye urata kidi,
inbe ipamede di le tiyei mos matana matana a be nen ngan di tooltool tikamata ngan lodi galanga ben betanga kidi tina ngan moolmool.