Yesu Lo Pombe Yerusalem Ngan Di Tooltool Tiyitmaka Ene ​Ben Ya In Tool Kuto Mai Atu
11
1 Yesu iye di galiunu tipa a tilo potai pang Yerusalem,
ngan le tilo pombe ye malala Betpage inbe Betani yo iken kawal Olip madini nga.
Motong la Yesu iwanga di galiunu tina ngan ru,
2 inbe iwete pang di nen,
“Angru kamuku a kalo ye malala yo iken pang dama i.
Ngan kumata be kapa le lo pombe nga,
ngan ole kakamata asara ke solanga di tooltool yo ene donki i,
in kase paunu atu yo tiwatu i.
Ngan donki tani in tool sa iwur pono a idada ye pitiao.
Lo ngan be angru karu ooroo ki,
inbe kadede a kasi.
3 Le kumata be tool sa ikamatang le itorang nen,
‘Ai,
nga yelei a kayei nen nga?’
ngan kawete panga nen,
‘Tool Mai be iyei urata ki ye,
lo ngan be ole palbe leu be ipamule a ise.’ ”
4 Motong la di galiunu ru tina ngan tipa le lo pombe,
ngan tikamata donki kase paunu tani in tiwatu ke diki potai pang ye dada ke rumu atu.
Motong la be tiru ooroo ki,
5 ngan di tooltool pattu yo tikododo ye ni tani in nga,
ngan titor di.
Tiyei ne,
“Ai,
angru ngan in soo so kayeii i?
Nga yelei a be karu donki in nga?”
6 Ngan tiraua betanga kidi ye betanga yo Yesu iwete pang di nga.
Motong la di tooltool tina ngan timalum pang di be tikaua donki tani in a tidu.
7 Yaru tikauu a tidu ye Yesu,
motong la tidur sousoungu matolene kidi ngan a tiyoo lo donki tani in pono,
inbe Yesu lo iwur ye.
8 Inbe di tooltool malala mai yo tiye di tipa nga,
ngan tidur sousoungu matolene kidi a tiyoo du dada katene,
inbe di kapala ngan tila karam lono la tisaput kai baene baene man titar du dada katene lapau.
9 Inbe di tooltool kapala yo tipa le timuku,
inbe di kapala yo tikimur nga,
ngan koodi le mai.
Tiyei ne,
“Tayitmaka Maro ene!
Maro ole iyei urata dook mata pang tool yo isi ye Tool Mai ene i.
10 Maro ole iyei urata dook mata pang tool yo isi be si iyei tool kuto mai a matan kalam i,
in dawa ben sasa kiidi yo Dawiti i.
Tayitmaka Maro ene le ilo ete!”
11 Ngan Yesu lo pombe Yerusalem,
motong la ipa so le ilo koongoo lono ke bareme mai ke sungunu lo ikodo inbe matan kapsanin so tina le imot yo iken bareme lono nga.
Bong ngan ke idu a be bong,
le nga ipas a iye di galiunu yo sangaul be ru nga,
ngan tiyege Yerusalem inbe timulu a tidu pang Betani.
Yesu Iwetetoo Kai Yo Ene Pik I, In Le Iwor
12 Tidu tiken a muntu,
motong la tiyege Betani a be timulu a tilo pang Yerusalem,
ngan Yesu pitola.
13 Le nga be matan la ngan ikamata kai pik atu in ikodo manga mooloo kasin in raunu iwutu welewele.
Motong la ipa le ila potai a nen ngan matan sarai too,
kanono sa lapau,
too tiap.
Bong ngan ikamata touo kanono siap,
raunu leu,
yesoo in lal yo be kai pik ipu ye,
in tiap.
14 Motong la Yesu iwete pang kai pik tani nen,
“Nookoot katai nga a ilo,
ngan o ke be kupu a nen ngan di tooltool tikan puam mulu,
ngan tiap.”
Ngan le di galiunu tilongo tina yo iwete nen nga.
15 Yesu iye di galiunu tipa le lo pombe Yerusalem,
motong la ipa so le ilo koongoo lono ke bareme mai ke sungunu lo inganga di tooltool yo man tigaua a tiyawar so kidi inbe di diedi tiyimi nga.
Inbe ipaturtur kookoowoo ke palokanga so kidi tooltool yo tiraukol pat nga,
a inbe kookoowoo ke burungu kidi tooltool yo tiyawar bal utu pang paroranga,
ngan lapau
16 Inbe igunkala di tooltool tina be kin tikap so yo nen nga mulu inbe tipa a tilo be tisi koongoo lono ke bareme mai ke sungunu be.
17 Motong la ipatomonai di ngan iwete pang di nen,
“Betanga yo Maro iwete a tiwodo lo iken ye rau ki ngan nen.
‘Rumu kiau i,
ole tiweta ye rumu ke pataraungu kidi tooltool ke tana maimai nga le imot.’
b Bong ang nga kayeii le iyei ben ‘ni kidi tooltool ke pinnau be tiko ye.’c  ”
18 Di tooltool maimai ke paroranga so pang Maro,
tiye di pannoongoo ke ger ke Maro ngan tilongo betanga yo Yesu iwete nga,
le nga timadit a tisere dada yo be tiraumate ye i.
Yesoo,
tikamata di tooltool malala mai tilongo patomonaingi ki,
ngan le titakrai ye a titoo nga,
ngan nen le titattadaia Yesu.
19 Ye kene tani in Yesu iye di galiunu ngan tiyepe le du rrai,
motong la tiyege malala mai tani in a tila.
Kai Pik Yo Iwor I
20 Yesu iye di galiunu tina ngan tiken bong le du muntu,
motong la be tipa a tila,
ngan tikamata kai pik tani in iwor a ipa so le idu ye ramini.
21 Motong la Pita lon tut le nga iwete pang Yesu nen,
“Pannoongoo,
kumata!
Kai pik tani yo kuwetetoo i,
in iwor oo.”
22 Le nga Yesu iraua betanga ki nen,
“Katara lomim medana pang Maro.
23 Awete pang moolmool nen,
kumata tool atu be iwete pang kawal i nen,
‘Kugamong taum a katte ong le kudu meneng tiek lono ni,’
ngan kumata tool tani in be lono rru tiap,
bong itara lono medana be so tani in ole pombe nga,
ngan Maro ole iyeii le pombe moolmool ben tina yo iwete nga.
24 Ngan nen le awete pang nen,
kumata be kapatarau a katoro Maro ye soo so be ikap pang,
inbe katara lomim medana panga be ikap pang moolmool nga,
ngan ole ikap pang le imot.
25-26 Inbe ye kene yo be lo kakodo a kapatarau ye in nga,
ngan kumata le be lomim tut dada dook tiap ke noonoo yo tool atu iyei pang nga,
ngan kagiri dada dook tiap ki tina ngan.
Ngan la be Tamamim Maro yo iyepe ye malala ki ete i,
in ole igiri noonoo kiang nga.”d
Di Kuto Maimai Titoro Yesu Be Sei Ikaua Gurana Panga I
27 Yesu iye di galiunu tipa le lo pombe mulu Yerusalem,
motong la ye kene yo ilo a lo ipa koongoo lono ke bareme mai ke sungunu ye in nga,
ngan di tooltool maimai ke paroranga so pang Maro,
tiye di pannoongoo ke ger ke Maro,
inbe di kuto maimai ke di Yuda nga,
ngan timan pang ye.
28 Le nga man titoru nen,
“Ai,
sei itarong a le kuyei urata nen i?
Inbe sei ikaua gurana pong be kuyei urata nen ye i?”
29 Motong la Yesu iraua betanga kidi nen,
“Dook mata,
bong nga be atorang ye torungu kiau atu ngan.
Kumata be karauu nga,
ngan la be awete pang ye sei tool yo ikaua gurana pau a le ayei urata i nga.
30 Oo,
kawete!
Yowan yo irriu di tooltool i,
in sei ikaua gurana panga a le iyei urata ki nga?
Gurana tani in ipa ye Maro yo iyepe ye malala ki ete ni,
too ipa ye di tooltool leu?”
31 Motong la di tooltool tina ngan sila di tapdi tiwetewete nen,
“Ona!
Kumata le tawete be Maro yo iyepe ye malala ki ete ni,
in la ikaua gurana pang Yowan in nga,
ngan ole itoridi nen.
Iyei ne,
‘Ngan nga yelei a le katara lomim medana ye betanga ki tiap nga?’
32 Bong kumata le tawete be di tooltool ke tana i leu la tikaua gurana pang Yowan nga,
ngan o dook mata tiap lapau.”
Ngan ye yo tiwete nen nga,
ngan titattadai,
yesoo di tooltool le imot tiwete be Yowan in Maro koonoo atu moolmool.
33 Ngan nen le tiraua betanga ke Yesu nen,
“Am nga lomam galanga tiap sa.”
Motong la Yesu iyei ne,
“Nen ngan au lapau,
o ke be awete pang ye sei tool yo ikaua gurana pau a le ayei urata nen ye i,
in tiap.”