Yesu Ikarata Tool Atu Yo Baene Ikap Rama I, ​In Ye Lal Kidi Yuda Ke Sungunu
3
1 Tiyepe le lal kidi Yuda ke sungunu san mulu pombe,
motong la Yesu imulu a ilo rumu kidi Yuda ke sungunu in lono,
ngan tool atu yo baene ikap rama i,
in iyepe.
2 Inbe di tooltool kapala yo tiye tiyepe nga,
ngan tisere dada yo be tikaua Yesu pang ye di kuto maimai ke karatanga betanga a tiweteweta ye urata ki yo iyei nga.
Le nga matadi kenen ye be tikamata,
ole ikarata tool tani yo ikap rama in ye lal kidi Yuda ke sungunu,
too tiap.
3 Le nga Yesu iwete pang tool tani yo baene ikap rama in nen,
“Oi,
kumadit a se kukodo dama kidi tooltool nga.”
4 Motong la itor di tooltool tina nen,
“Ger ke Maro iwete belei ye lal kidi Yuda ke sungunu?
Iwete be tayei dada dook mata pang di tooltool,
too be tayei dada dook tiap pang di?
Too,
iwete be talon di a tiyepe dook mata,
too be tagarung di a timmata?”
Yesu itor nen,
bong tiwete kan betanga siap.
5 Tina tiyei nen nga,
le nga Yesu katen malmal a matan koropalanga pang di.
Inbe lon moo san lapau,
yesoo di ngan kutodi mede dawa ben pat.
Motong la iwete pang tool tani nen,
“Oo,
kupadunu baem in.”
Le nga be ipadunu baene,
ngan baene tani in dook mata mulu.
6 Yeisa be di Paresi tikamata yo iyei nen nga,
ngan tina timadit le tidu tana du tiye di tooltool pattu yo tikata suanga ye Erot nga,
ngan tigaua a tiwetewete ye dada yo be tiraumata Yesu ye i.
Di Tooltool Alunu Kaiye Titoo Yesu
7 Motong la Yesu iye di galiunu tiyege ni tani,
inbe tidu pang ran Galili,
ngan le di tooltool alunu kaiye ke tana mai Galili la titoo di a tidu nga.
8 Inbe ye kene yo di tooltool kapala tilongo betanga ye so le imot yo iyei nga,
ngan le tipa ke malala kidi a timan be man tikamata lapau.
Ngan nen le tipa ke tana mai Yudia le Idumia,
inbe ke Yerusalem,
inbe ke ran Yodan koonoo kapala,
inbe ke malala mai Taia le Saidon a timan.
9 Ngan tina di tooltool alunu kaiye man tigaua nga,
le nga Yesu la iwete pang di galiunu be tisere ookoo atu panga be iyiri ye,
a be nen ngan di tooltool man tigaua a tiparloko le tiloko la pono be.
10 Yesoo ikarata di tooltool alunu kaiye a tinidi dook mata koot nga,
ngan nen le di tooltool kapala yo matamatenge ikap di nga,
ngan tisurpak di diedi a tikapye be la titoka lapau.
11 Inbe di tooltool yo so sadi tiyepe ye di nga,
ngan kanakana be tikamata Yesu nga,
ngan ole timol du tiken dama ki inbe koodi le mai nen,
“Alei,
ong in Maro Natunu.”
12 Bong Yesu ipasak pang di a iwetekala di be kin tipaposi lo mallangana be.
Yesu Ipootoo Di Aposol Sangaul Be Ru
13 Tiyepe le kene san,
motong la Yesu ipa a ilo pang ye kawal atu,
inbe ikiu di tooltool yo lono pang di nga,
ngan be timan pang ye.
Timan pombe,
14 motong la ipootoo di tooltool sangaul be ru be tiyei aposol,
a be nen ngan tiyei ene,
inbe pang dama ni ngan ole iwanga di la tiwetewete betanga ke Maro pang di tooltool.
15 Inbe ole ikap gurana pang di,
a be nen ngan tinganga di so sadi ye di tooltool lapau.
16 Ngan di tooltool sangaul be ru tina yo ipootoo di panga nga,
ngan edi nen:
Simon yo Yesu isu ene san ye Pita i,
17 inbe Sebedi di natunu yo Yemis iye taini Yowan nga.
Di ngan Yesu isu edi paunu ye Boaneges.
Ngan edi tani in punu nen,
Looloo di Natunu.
18 Inbe ipootoo Antares iye Pilip,
ye Batolomiu,
inbe Matiu iye Tomas,
ye Yemis yo Alpias natunu i,
inbe Tadias iye Simon yo tool ke sorringi di Rom ye tana kidi Yuda i,
19 inbe Yuta Iskariot yo pang dama ni ngan ole itara Yesu la di koi ki baedi i,
in lapau.
Yesu Di Koi Ki Tiwete Ya In Iyei Urata Ye Gurana Ke Satan
20 Yesu iye di galiunu timulu a tilo rumu,
inbe di tooltool alunu kaiye timan pang ye di man tiye di tigaua mulu,
le manga sa yo be tikan so ye,
ngan tiap.
21 Inbe ye kene tani in di sokana tilongo ben ikan so tiap nga,
le nga tila be la tikauu,
yesoo di ngan lodi tar be o iyei kapa.
22 Ngan di pannoongoo ke ger ke Maro yo tipa ke Yerusalem a tisi nga,
ngan tiwetewete ye Yesu nen.
Tiyei ne,
“Ai,
tool in Belsebul la iyepe ye i.
Le ya in inganga di so sadi ye gurana yo tool kuto mai kidi so sadi ikauu panga i.”
23 Ngan Yesu ilongo di tina yo tiwete nen nga,
le nga ikiu di a timan pang ye,
motong la ikatte betanga atu pang di nen,
“Nga yelei,
ole Satan iyei koi pang di tooltool ki ya taunu a inin di a tikoo,
too?
Tiap yege!
24 Kumata be di tooltool ke tana mai atu be tiparpoto le tiyepe ye budanga ru,
inbe tipatoko nga,
ngan ole tikodo le timede belei?
25 Inbe kumata be rara atu yo tiyepe ye rumu atu nga,
ngan be tiparpoto le tiyepe ye budanga ru,
inbe di tapdi tipatoko nga,
ngan ole tikodo le timede belei?
26 Ngan gaongo leu ye Satan lapau.
Kumata be di tooltool ki tiyei koi pang di diedi le be tiparpoto a tiyepe ye budanga ru nga,
ngan o ke be Satan tani in ikodo le imede tiap,
yesoo gurana ki ngan imot le ipa so oo.
27 Le kakamata,
tool sa ke be la irookoo rumu ke tool atu yo gurana ki mai mata i,
inbe lo ikap sokorai so yo iken rumu lono ki,
ngan tiap.
Bong kulkulunu ngan ole iparama tool tani yo gurana ki mai mata in muku a ipauu ngan,
lo ngan be lo ikap so ki tina yo iken rumu lono nga.”
28 Motong la Yesu iwete mulu pang di nen,
“Awete pang moolmool nen,
noonoo le imot yo di tooltool tiyei,
ngan ipa ye betanga yo tikan paseme Maro ye nga,
ngan ole igiri.
29 Bong sema tooltool yo tikan paseme Maro Amunu Silene nga,
ngan Maro o ke be igiri noonoo kidi tina ngan tiap,
bong ole iken nen le taukan motingi.”
30 Yesu iwete pang di nen,
yesoo di ngan tiwete be ya in so sadi iyepe ye.
Yesu Tinana Le Di Taini
31 Motong la ye kene tani in Yesu tinana le di taini tipa le man pombe ye rumu yo iyepe ye i,
le nga tikodo ke diki inbe tiwanga panga be isi pang ye di ngan.
32 Ngan di tooltool alunu kaiye la tiwur le tigaliuu nga,
inbe lo tiwete panga nen,
“Ai,
tinam le di taim la man tiyepepe diki nga,
ngan titor yong.”
33 Bong ngan Yesu iraua betanga kidi nen,
“Tinak sei,
inbe di sema taik nga?”
34 Motong la matana pang ye di tooltool tina yo tiwur le tigaliuu nga,
inbe iwete pang di nen,
“Oo,
kakamata,
di tinak le di taik me e nga.
35 Kumata le di sema tooltool yo be titoo Maro lono nga,
ngan di ngan la di tinak le di taik nga.”