Yesu Ikatte Betanga Ye Tool Atu Yo Igiri Dingding Patunu Lo Kumu Ki I
13
1 Motong la ye ke tani in Yesu ipas a iyege rumu tani,
inbe ipa mulu le du iwur ran koonoo ke Galili.
2 Ngan di tooltool alunu la tidu pompombe pang ye a tigaliuu le ni mangana siap.
Le nga ipas lo ookoo lono,
a lo iwur,
inbe di tooltool tina ngan tikodo ke tana.
3 Motong la iwete pang di ye so alunu ngan ikatte betanga ye.
Nen le iwete pang di nen,
“Ye kene atu ngan tool ke kapkingi atu in ikap dingding patunu ke kaningi be la igiri kumu ki.
4 Ngan kene yo igiri ye in nga,
ngan kapala imol du dada katene.
Ngan nen le di man tikamata le man tikan.
5 Inbe dingding patunu kapala ngan imol du ye tana yo ke lopo ki in bongarngar le tana dook mata ke ete ngan mai mata tiap nga.
Ngan nen le palbe leu be tisup,
6 bong ye kene yo ke ise a isini katkat ye in nga,
ngan iyesnai dingding supana tina le timallai a tiwor,
yesoo ramini idu lopo mata tiap.
7 Inbe dingding patunu kapala ngan imol du ooroo kaudangdang lono.
Ngan nen le tisup pa ye kaudangdang le ooroo kaudangdang tani in iturai di le tisup dook tiap.
8 Bong dingding patunu kapala yo imaruru du ye tana dook mata nga,
ngan tisupsup dook mata le tipu welewele.
Ngan kaini kapala ngan tipu ngan puadi ben 100,
inbe kaini kapala ngan puadi 60,
inbe kaini kapala ngan puadi 30.
9 Le sei tool be talngana nga,
ngan itar talngana dook a ilongo betanga kiau nga.”
Yesu Iwete Nini Kattenge Betanga Ke Tool Yo Igiri Dingding Patunu I
10 Motong la di galiunu timan man titoru.
Tiyei ne,
“Ai,
nga yelei be kuwete betanga pang di tooltool ngan kotte betanga pang di nen nga?”
11 Ngan Yesu iraua betanga kidi nen,
“Muku ngan dada yo Maro be matan kala di tooltool ki ye i,
in iken sollono,
bong nookoot nga ya in lon ponana be ipaposi pang a lomim galanga ye dook.
Bong di tooltool kapala,
ngan tiap.
12 Kumata le sei tool be lon galanga ye betanga ke Maro a itoo nga,
ngan ole Maro ipagalanga lono ye betanga ki sa mulu le lo galanga ki ilo ete.
Bong sei tool yo lon galanga ye betanga ki kasin,
bong itoo tiap i,
in Maro ole igutak lo galanga kasin yo iken ye ngan le iyepe sokorai.
13 Ngan ye punu i la le be awete pang di tooltool,
ngan akatte betanga ye i,
yesoo di ngan tikamata urata ke Maro,
bong o ke be tikilala tiap.
Inbe di ngan tilongo betanga ke Maro,
bong o ke be tilonga ngan lodi galanga ye punu nga tiap.
14 Di ngan tiyei nen,
le tiyeie betanga ke Maro koonoo yo Esai iweta i,
in le kanono pombe moolmool.
Ngan Esai ikaua Maro koonoo inbe iwete nen,
‘Kanakana ngan ole kalongo betanga yo Maro iwete nga,
bong o ke be lomim galanga ye tiap.
Inbe kanakana ngan ole kakamata so yo Maro iyei nga,
bong o ke be kakilala tiap.
15 Yesoo,
di tooltool tina ngan lodi parkat le betanga ke Maro ilo lodi tiap,
inbe tidikidiki talngadi le ke be tilongo betanga ye tiap,
inbe matadi kilikili le ke be tikamata ni ye tiap.
Ngan yo be tiyei nen tiap nga,
ngan matin le tikamata so ye matadi,
inbe tilongo betanga ye talngadi,
inbe lodi galanga ye,
a be nen ngan tiportak lodi a timulu pang yau man akarata di le dook mata.’a
16 Bong ang nga lomim ponana,
yesoo Maro iyei dada dook mata pang le matamim galanga a kakamata so,
inbe talngamim nga gumono ke longono betanga.
17 Awete pang moolmool nen,
muku ngan di Maro koonoo inbe di tooltool yo noonoodi ngan alunu la lodi be tikamata so yo nookoot kakamata nga,
bong le tikamata touo siap.
Inbe lodi be tilongo betanga ben yo nookoot kalongo nga,
bong le tilongo touo siap lapau.
18 “Kapalongo a awete nini kattenge betanga ke tool yo igiri dingding patunu lo kumu lono ki,
in punu pang.
19 Di tooltool yo tilongo bingi dook mata ke Maro ye dada yo be matan kala di tooltool ki ye i,
bong lodi galanga ye tiap nga,
ngan di ngan ben dingding patunu yo imaruru du dada katene nga.
Di ngan betanga ke Maro ilo lodi,
bong isup tiao,
inbe tool dook tiap Satan iman tina ngan le igutak betanga ke Maro yo iken lodi nga.
20 Inbe dingding patunu yo imol du ye tana yo ke lopo ki in bongarngar nga,
ngan ben di tooltool yo tilongo betanga ke Maro ngan tikauu palbe leu a lodi ponana ye nga.
21 Bong tina taukadi ramidi yo be idu pang lopo nga,
le ke be tiyepe le mooloo tiap.
Ngan kumata be moonoo sa pombe pang ye di,
too di tooltool tikamata di ben titoo betanga ke Maro le be tigarung di nga,
ngan ole palbe leu inbe tiyege lodi medana yo titaru i,
inbe tiwala muridi pang Maro.
22 Inbe dingding patunu kapala yo imol du ooroo kaudangdang lono nga,
ngan ben di tooltool yo tilongo betanga ke Maro,
bong lodi rru mai san ye yepongo kidi ke tana i,
inbe balingi matana matana ke tana pono ikap matadi mai san.
Ngan so tina ngan ikap matadi nen,
le iduku betanga ke Maro yo iken lodi i,
le betanga tani in itara kanono tiap.
23 Bong dingding patunu yo imol du ye tana dook mata nga,
ngan ben di tooltool yo tilongo betanga ke Maro ngan tikauu a lodi galanga ye nga.
Ngan nen le di ngan titar kanodi alunu dook mata dawa ben dingding patunu yo tipu ngan kaini kapala titar kanodi ben 100,
inbe kaini kapala ngan kanodi 60,
inbe kaini kapala ngan kanodi 30 nga.”
Dingding Dook Tiap Ipa Ye Dingding Dook Mata Ke Kaningi
24 Motong la Yesu iwete le ikatte betanga san mulu pang di nen,
“Dada yo Maro be matan kala di tooltool ki ye i,
in dawa ben tool atu yo igiri dingding patunu ke kaningi lo kumu lono ki i.
25 Bong yeisa be bong a di tooltool tikenen mata le imot,
motong koi ki iman a lo igiri dingding dook tiap patunu lo ikatbon yo dook mata nga,
inbe ikoo a ila.
26 Le ye kene yo dingding dook mata patunu be tisupsup nga,
ngan dingding dook tiap patunu lapau tiye di tisupsup.
27 “Motong la di kapraingi ke kumu taunu tani la tiwete panga nen.
Tiyei ne,
‘Tool mai,
ong i kugiri dingding dook mata patunu idu ye kumu kiong,
e dingding dook tiap patunu ngo ipa ngai a se tisupsup ye kumu kiong lapau nga?’
28 “Ngan kumu taunu iraua betanga kidi nen,
‘Ona,
o koi kiau sa la iyei dada nen pau i.’
“Motong la di kapraingi ki titoru.
Tiyei ne,
‘Le nga lom belei,
be la amlama dingding dook tiap ngo,
too?’
29 “Ngan iyei ne,
‘Tiap.
Yesoo,
kumata be la kalama di nga,
ngan ole kalama le ipa ye dingding yo dook mata nga lapau.
30 Le kin kalama be,
bong sila tiken nen a tidada gaongo a tilo le lo ye lal yo ke saputungu dingding ngan.
Ngan ye lal tani in ole awete pang di tooltool ke saputungu dingding be tilama dingding yo dook tiap ngan muku a tiliki ye ooroo,
inbe tikatte lo ei ikan.
Lo ngan be tisaput dingding yo dook mata ngan a tikap kanono lo tigaun para lono kiau.’ ”
Yesu Ikatte Betanga Ngan Inanpootoo Ye Kai Mastet Patunu
31 Motong la Yesu iwete le ikatte betanga san mulu pang di tooltool tina nen,
“Dada yo Maro be matan kala di tooltool ki ye i,
in dawa ben kai mastet patunu yo tool atu ikauu a ipe du kumu lono ki i.
32 Ngan kai patunu kapala yo be kupe nga maimai,
bong mastet in mitiap.
Bong kumata be isup a ise le mai nga,
ngan ole illos so le imot yo kupe du kumu lono nga.
Le di man yo tiro lang katene nga,
ngan ole timan man tire giniu kidi ye baene a tiyepe ye.”
33 Motong la Yesu ikatte betanga san mulu pang di nen.
Iyei ne,
“Dada yo Maro be matan kala di tooltool ki ye i,
in dawa ben yis yo tataru lo ye porong ngan iyeii a isung i.
Garup atu ikaua so mai tiap tani a itaru ilo ye porong tina maiyoko in a ipargarungraii ye,
ngan le iyeie porong tani a isung le imot.”
34 Ngan betanga le imot yo Yesu iwete pang di tooltool budanga mai yo man tigaua nga,
ngan iwete le ikatte betanga ye leu.
Inbe betanga sa yo be iweta ngan punu iken mallangana pang di ngan tiap,
bong ikatte betanga leu pang di.
35 Ngan tina iyei nen nga,
le iyeie betanga ke Maro koonoo atu yo iweta in le kanono moolmool.
Ngan Maro koonoo tani iwete nen,
“Au i be awete pang di,
ngan ole akatte betanga leu.
Inbe so le imot yo iken sollono ye kene yo Maro itar lang le tana ye in nga,
ngan ole awete pang di ye.”b
Betanga Punu Ke Dingding Dook Mata Inbe Dingding Dook Tiap
36 Yesu iwetewete pang di a imot,
motong la iyege di,
inbe idewe a ilo pang rumu lono.
Ngan di galiunu titoo a tilo ye rumu lono a lo titoru.
Tiyei ne,
“Ai,
lomam be kupagalanga betanga lono ke dingding dook tiap yo isupsup kumu lono in pam dook a lomam galanga ye.”
37 Motong la iraua betanga kidi nen,
“Tool yo ananpootoo ye kumu taunu be igiri dingding patunu dook mata lo kumu ki i,
in Tool Moolmool ke Maro.
38 E kumu in tana mai i le imot.
Inbe dingding dook mata patunu nga,
ngan di tooltool yo Maro igaua di panga be matan kala di nga.
Inbe dingding dook tiap,
ngan di tooltool yo tool dook tiap,
Satan,
iyei mai pang di nga.
39 Inbe koi ke kumu taunu yo igiri dingding dook tiap patunu lo kumu lono i,
in tool kuto mai kidi so sadi.
Inbe lal ke saputungu dingding,
in lal yo be tana i imot ye i.
E di kapraingi ke kumu taunu nga,
ngan di bangabangana ke Maro.
40 Ngan dingding dook tiap yo tilama a be tidaun ye ei nga,
ngan ye lal yo Maro itaru be tana i imot ye in nga,
ngan ole di bangabangana ki tiyei nen lapau.
41 Le ye kene tani in Tool Moolmool ke Maro ole iwanga di bangabangana ki si tikap di tooltool yo tiyei di tooltool a la tiyei noonoo nga,
le tipa ye di tooltool kapala yo tikapsap ye noonoo nga,
ngan a tikoo ye di tooltool yo Maro be matan kala di nga.
42 Ngan ole tikap di a tikatte di lo ei somai lono.
Ngan ni tani in di tooltool tina ole timassingi a titangtang,
inbe tikanen dongadi a iparrasa.
43 Bong di tooltool yo noonoodi nga,
ngan ole pilik pilikbe dawa ben ke matana,
inbe ole tilo ye malala ke Tamadi a tiye di tooltool yo matan kala di nga,
ngan tiyepe.
Le sei tool be talngana nga,
ngan itar talngana dook a ilongo betanga kiau nga.”
Kattenge Betanga Ke Tool Atu Ipuske Pat Dook Mata Tikelmaii
44 Motong la Yesu iwete le ikatte betanga san mulu pang di galiunu nen,
“Dada yo Maro be matan kala di tooltool ki ye i,
in dawa ben pat ke yimoongoo so yo iken ye karei mai atu a tikelmaii du tana lono i.
Ngan pat tani in iken nen le tool san ipuske,
motong la itarkoo mulu sila iken.
Ngan nen le tool tani in lon ponana kaiye le ila,
ngan la iyawar so ki ngan le imot a ikap pat ye,
a be nen ngan imulu la iyimi tana tani yo tikelmaia pat ye i,
in panga.”
Kattenge Betanga Ke Tool Atu Isere Pat Sallinene Panga
45 Motong la ikatte betanga san mulu nen,
“Dada yo Maro be matan kala di tooltool ki ye i,
in dawa ben tool atu yo ipa be isere pat ke gomo yo sallinene dook mata i.
46 Kumata be ipa le ipuske atu yo sallinene dook mata le dook mata kaiye in nga,
ngan ole la iyawar so ki le imot a ikap pat ye,
a be nen ngan imulu la iyimi pat ke gomo tani,
in panga.” Yesu Ikatte Betanga Ye Pu
47 Motong la Yesu ikatte betanga san mulu pang di nen,
“Dada yo Maro be matan kala di tooltool ki ye i,
in dawa ben pu yo di tooltool tikatte du ran lono a tikap di i matana matana ye i.
48 Yeisa be di i tilo tilo le pu tani in ipon,
motong di tooltool ke yoosoongoo tiyolo pu tani in idi tana.
Idi tana,
motong la du tiwur,
inbe tipelnai di i yo dook mata nga,
ngan a ilo karei lono.
E yo dook tiap nga,
ngan tikatte di.
49 Ngan dada gaongo leu nen la be pombe pang ye di tooltool ye lal yo Maro itaru be tana i imot ye i.
Ye kene tani in di bangabangana ke Maro ole tisi be si tipelnai di tooltool ke yeingi dada dook tiap nga,
ngan a tikoo ye di tooltool yo noonoodi nga.
50 Lo ngan be tikatte di tooltool ke yeingi dada dook tiap nga,
ngan tidu ye ei somai lono.
Ngan ni tani in ole timassingi a titangtang,
inbe tikanen dongadi a iparrasa.”
51 Motong la Yesu itor di galiunu nen,
“Betanga le imot yo awete nga,
ngan ang nga lomim galanga ye punu lapau?”
Ngan di galiunu tiyei ne,
“E.”
52 Motong la Yesu iwete pang di nen,
“Ngan nen le di pannoongoo ke ger ke Maro yo lodi galanga dook ye dada yo Maro be matan kala di tooltool ki ye in nga,
ngan ke be tipatomonai di tooltool ye betanga paunu inbe ye betanga gurunu lapau.
Le di ngan dawa ben rumu taunu atu ilo rumu lono ki a lo ipadu so dook mata ki yo paunu nga,
inbe yo gurunu ngan lapau a isi tana.”
Di Tooltool Ke Malala Nasaret Tiwala Muridi Pang Yesu
53 Ye kene yo Yesu ikatte betanga tina pang di a imot nga,
ngan le imadit a iyege ni tani in.
54 Inbe ipa ngan le lo pombe ye malala ki ya taunu,
motong la ilo rumu kidi Yuda ke gaongo in lono,
a lo ipatomonai di tooltool.
Ngan di tooltool tina tilongo betanga ki le tisorroko ni ye,
le nga di tapdi tipartortor.
Tiyei ne,
“Ona tiap!
Tool i lo galanga inbe gurana yo iyei mos ye nga,
ngan ikap ngai?
55 Tool i,
tool ke renge rumu,
in natunu.
Inbe tinana la Madia i.
Inbe di taini la Yemis ye Yosep ye Simon inbe Yuta nga.
56 Inbe di lini nanga la taye di tayepe ni nga.
E tool i nga ikap lo galanga le gurana nga ngai?”
57 Ngan tina tikamata ben ya in tool sokorai nga,
le tiwala muridi panga.
Bong ngan Yesu iwete pang di nen,
“Awete pang nen,
kumata be tool iyei Maro koonoo nga,
ngan di tooltool ke malala ki ya taunu inbe di rara ki nga,
ngan di leu la lodi be tilongo betanga ki inbe tiraua panga tiap nga.”
58  Ngan nen le iyei mos sa alunu tiap,
yesoo di tooltool ke malala ki titara lodi medana panga tiap.