Yesu Ikarata Tool Yo Botoboto Medana Ikani I
8
1 Ye kene yo Yesu iyege kawal madini a imulu a isi ye in nga,
ngan di tooltool alunu le alunu kaiye la titoo nga.
2 Ngan tool atu yo botoboto medana ikana tinini i,
in iman le man igun turunu du Yesu kene punu ke dama,
inbe iwete panga nen,
“Tool Mai,
kumata be lom nen nga,
ngan kuyei au le tinik igalanga mulu.”
3 Motong la Yesu itara baene lo tool tani in pono,
inbe iwete panga nen,
“Dook mata,
au i lok nen,
le ole tinim igalanga mulu.”
Ngan le pattu leu,
inbe botoboto medana tina ngan imapmap,
inbe tinini dook mata mulu.
4 Motong la Yesu iwete betanga medana panga a ilele nen,
“Ai,
kin kula ngan kugasa pang di tooltool ye so yo ayeii yong i,
in be.
Bong kupa so le la ong taum kupatnai ong pang tool ke paroranga so pang Maro in muku.
Lo ngan be kuyei paroranga ye so pang Maro ye yo tinim igalanga mulu,
dawa ben tina yo ger ke Mose iwete nga,
a be nen ngan di tooltool lodi galanga ye yo tinim igalanga koot nga.”
Yesu Ikarata Kapraingi Ke Tool Turana Bulbulini Ke Patokongo Le Tinini Dook Mulu
5 Ye kene yo Yesu ipa le lo pombe malala mai Kapenam ye in nga,
ngan tool turana bulbulini ke patokongo kidi Rom,
in man itoro Yesu be iloni.
6 Iyei ne,
“Tool Mai,
kapraingi kiau ni imasoposopo le ke be ipulles tiap,
inbe imassingi mai san le ya nani la ipas le iken leu rumu ni.”
7 Motong la Yesu iwete panga nen,
“Ole ala akarata le tinini dook mata mulu.”
8 Ngan tool tani iraua betanga ke Yesu nen,
“Atoo,
Tool Mai,
o nen tiap!
Au i lok tarau ngan au i tool dook mata ke be kuman a kulo rumu lono kiau tiap.
Bong kupas le kuwete ye koom leu,
inbe kapraingi kiau tani ole tinini dook mata mulu.
9 Awete nen nga,
yesoo ayepe gurana ke tool mai kiau yo matan kalau i,
in parmana.
Inbe au tauk i di tooltool kiau ke patokongo nga,
ngan tiyepe gurana kiau parmana lapau.
Le kumata be awete pang atu nen,
‘Kula,’
ngan ole ila.
E be awete pang san nen,
‘Kuman,’
ngan ole iman.
E be awete pang kapraingi kiau nen,
‘Kuyeie urata i,’
ngan ole itoo kook a iyeie urata tani.”
10 Yesu ilongo betanga ke tool turana bulbulini ke patokongo tani yo iwete nen nga,
le itakrai ye.
Motong la iwete pang di tooltool budanga mai tina ngan nen,
“Awete pang moolmool nen,
au i apuske touo tool sa ke Isrel yo itara lono medana mai mata dawa ben tool i,
ngan tiap.
11 Le awete pang nen,
di tooltool alunu kaiye dawa ben ya i ole tipa ke ni yo ke ipa ye a ise i,
inbe ye ni yo ke idu ye i,
a timan tiye Apram ye Esaka inbe Yakop man tiwur,
inbe tikan so ye lal yo Maro itaru be matan kala di tooltool ki ye i.
12 Bong di tooltool yo Maro ipootoo di panga muku nga,
ngan ole inganga di a tidu diki a du tiyepe todo maiyoko lono.
Ngan ye ni tani in ole timassingi a titangtang,
inbe tikanen dongadi a iparrasa.”
13 Yesu iwete nen a imot,
motong la iwete pang tool turana bulbulini ke patokongo tani in nen,
“Ai,
kula.
So yo kutorau ye i,
in ole pombe ben tina yo kutara lom medana be ole pombe nga.”
Le ye kene tani,
in kapraingi ke tool mai tani in tinini dook mata mulu.
Yesu Ikarata Pita Roonoo Garup Le Tinini Dook Mata Mulu
14 Motong la Yesu ipa le la pombe ye ni ke Pita,
a ilo rumu lono ki.
Ngan ikamata Pita roonoo garup yo matamatenge ikauu le tinin yes a ikenen mie pono nga.
15 Le nga Yesu itoko garup tani in baene,
ngan le pattu leu,
be matamatenge ikoo ye le tinini dook mata mulu.
Motong la imadit a ikarata kaningi pang Yesu a be ikan.
Yesu Ikarata Di Tooltool Alunu Le Tinidi Dook Mata Mulu
16 Yesu iye di tiyepe le du rrai,
motong la di tooltool yo so sadi tidiwidiwi di nga,
ngan di sokadi tikap di a timan pang ye.
Motong la iwete pang di so sadi tina a inganga di a tikoo,
inbe iyei di tooltool yo matamatenge ikap di nga,
ngan le tinidi dook mata mulu.
17 Ngan tina Yesu iyei nen,
le iyeie betanga ke Maro koonoo yo Esai i,
in le kanono pombe moolmool.
Ngan Esai tani in iwete nen,
“Ya in igiri matamatenge kiidi,
inbe iyei idi le tiniidi dook mata mulu.”a
Di Tooltool Yo Lodi Be Titoo Yesu Nga
18 Yesu ikamata di tooltool alunu san man tigaua le tigaliuu,
le nga iwete pang di galiunu be tisuku ookoo kidi inbe tipie siut a be tila ke ran koonoo san.
19 Motong la pannoongoo ke ger ke Maro atu in iman pang ye Yesu man iwete panga.
Iyei ne,
“Pannoongoo,
au i ole atoo ong ye ni nangai yo be kupa pang ye nga.”
20 Ngan Yesu raua betanga ki nen,
“Di gaunu gok ngan agoro kidi ke kenongo,
inbe di man ngan giniu kidi ke kenongo lapau,
bong Tool Moolmool ke Maro,
in taukan ni yo be iken a imaryoo ye i.”
21 Motong la tool san yo Yesu galiunu,
in iwete pang Yesu nen,
“Tool mai,
ole kumalum pau a la akelmaia tamak muku ngan,
lo ngan be man atoo ong.”
22 Bong ngan Yesu iraua betanga ki nen,
“Di tooltool yo titoo Maro tiap le tiyepe dawa ben di tooltool matedi nga,
ngan ole di tapdi tikelmai di diedi yo timmata koot nga.
Bong ong in kuman a man kutoo au.”
Yesu Iwete Katkat Pang Eng Mai Le Imata
23 Motong la Yesu ipas lo ookoo pono,
inbe di galiunu titoo a tipas lo ookoo pono lapau a tikooi a tila.
24 Tikooi a tila me pono,
inbe pattu leu be eng mai imadit.
Ngan eng tani in isi le mai mata,
le kokor ki popobe a ipases lo ookoo lono,
bong Yesu iken mata a ila oo.
25 Ngan tina eng mai nen nga,
le nga di galiunu la tipoongoo a tiyei ne,
“Tool Mai,
kulonam!
Nga be tamere a tallede!”
26 Tipoongoo,
motong la iwete pang di nen,
“Ai,
ang nga katara lomim medana pau mai tiap sa.
Nga yelei a katattadai mata nga?”
Motong la imadit tina le iwete katkat pang eng le kokor tina,
le imata le manini susube dook mata.
27 Ngan iyei nen a di galiunu tina tikamata,
le titakrai,
inbe di tapdi tipartortor nen,
“Ona tiap!
I tool belei a le eng le kokor tilongo koonoo nga?”
Yesu Inganga Di So Sadi Ye Di Tooltool Ru
28 Ye kene tani yo Yesu iye di galiunu tila tisolo ran koonoo kapala ye tana kidi Gadarab nga,
ngan di tooltool ru yo so sadi tidiwidiwi di a tiyepe agoro lono kidi matenge ngan tisi pang ye Yesu.
Yaru ngan di so sadi tidiwidiwi di le guradi mata,
inbe tikap malmal le tool sa ke be ipa a ikapus di ye ni tani,
in tiap.
29 Di tooltool ru tina tikamata Yesu,
motong koodi panga nen,
“Atoo!
Ong i Maro Natunu.
Nga soo so be kuyeii pam i?
Ngan lal yo Maro itaru be ikap masngana pam ye i,
in pombe tiao,
bong kuman ni nga be man kop masngana pam,
too?”
30 Ye kene tani in di ga alunu la tisu a tikanen ben manga mooloo kasin ye di nga.
31 Le nga di so sadi tina titoro Yesu a timangmang ye nen,
“Be kungangam nga,
ngan kumalum pam a la amdewe a amlo di ga ngo lodi.”
32 Yesu iman tina le iwete pang di nen,
“Kapas a kala.”
Yo ngan tina le tipas a tisi tana a tila tidewe lo ga tina ngan lodi.
Motong la ga budanga tina ngan tidada a tila sakar matana a tipas du ran lono le taun tidadup a timmata.
33 Ngan nen le di tooltool yo matadi kala di ga nga,
ngan titattadai ye so yo tikamata nga.
Le tina tidada a tilo pang malala kidi,
a lo tikaua bingi ye so le imot yo pombe ye di ga nga,
inbe ye di tooltool ru tina yo so sadi tidiwidiwi di nga,
ngan lapau.
34 Motong di tooltool yo tiyepe ye malala mai tani nga,
ngan di le imot tidu be du tikamata Yesu.
Tidu tikamata,
motong la tiwete panga a timangmang ye be ikoo ye ni kidi a ila pang ye ni san mulu.