ATETH PHAꞌYESA JESÚS POEYOCHRESHAꞌ
LOS HECHOS
Ateth otnerranet Jesús wapanetchaꞌ Parets Poekamkëñ
1
1 Theꞌpaꞌ,
masheñe Teófilo,
nekellkothpaꞌ oꞌch neserrpareꞌtaterrperr poꞌpocheño.
Awaña ñeñth nekellkonaph all neñotataph ora allpon ateth peꞌth Jesús allempo añe patsroꞌtsenmeñ.
Ñamha ora allpon yexhateꞌth Jesús, ñeñthpaꞌxhoꞌ oꞌ notwaph nekellkoth.
2 Tharraña allempotheñ aꞌterr poeꞌntañopaꞌ palltena oꞌch notaph ñamha.
Theꞌ añ nekellkothpaꞌ oꞌch notaph.
Tharraña amaꞌt allempo ama aꞌterraꞌ Jesúspaꞌ añña ñeñth poeyochreshaꞌpaꞌ oꞌ otwanet atethchaꞌ pet.
Eꞌñe Parets Poekamkëñothpaꞌ oꞌ llesensaꞌwanerran poeyochreshaꞌ ñeñth akraꞌ ña.
3 Amaꞌt pomoeroxhteñoth oꞌ rromwa awaña,
allempoñapaꞌ oꞌ orrterrana poeyochreshaꞌ eꞌñe bethnathoth.
Ñeñthoꞌmarña ñetpaꞌ eñochet eꞌñe poꞌñoxh añpaꞌ ñeñthara Jesús ñeñth rromats awaña.
Tharroꞌmar paꞌtatsoch xharramatnerr attho orrtameꞌtnerranet mameshaꞌtets.
Ñamha xhokma eñcheteꞌth allameꞌtets.
Allempoña ñapaꞌ aꞌpothanet ateth penaña Parets poꞌkowenña attho ayochreshathtena ña.
4 Allempo alloꞌtsenet eꞌñe parro epoet poeyochreshaꞌpaꞌ ateth otanet:
—Amach erra setatsto arroth,
allasach arrma Jerusaléño.
Oꞌch sekweñ esempoch xhaponasa ñeñth Parets Poekamkëñ.
Tharroꞌmar Paretspaꞌ oꞌ otwas oꞌch moeñonas Poekamkëñ.
Ñeñthoꞌmar napaꞌ oꞌ naꞌpothwonas Parets poꞌñoñ awaña.
Jesús sube al cielo (Hechos 1.4-11)
5 Allempopaꞌ añña ñeñth notwas:
Juanañpaꞌ añothña apateꞌth oño,
tharraña na tsapathonethpaꞌ añchaꞌña nechorratasa Parets Poekamkëñ.
Añpaꞌ allowa ateth ot Jesús.
6 Poꞌpocheño all apxhenet aspentho paꞌsoꞌcheñ Olivopen.
Poeyochreshaꞌñapaꞌ ateth aꞌphthoꞌchet Jesús:
—Theꞌpaꞌ,
Partseshachaꞌ, ñatoꞌ pokteꞌ penteñ oꞌch phapaterrey ñeñthey israelneshay yepatseñ. Allochñapaꞌ amach eseshaꞌ poñeña yeyoreꞌtameꞌtenaye.
7 Jesúsñapaꞌ ateth otanet:
—Ñeñth sokoppaꞌ ama pokteyaye oꞌch señoch.
Añña Yompor poꞌpartsoteñoth eꞌñe eñotweñ.
Ñapaꞌ oꞌ neꞌ allempoch etsotwerra ora allowen añexhno.
8 Jesúspaꞌ alla oterraneterr:
—Añña pokteꞌ oꞌch señoch,
ñerraꞌm esempoch waponasa Parets Poekamkëñ sesho,
ñach awamenkath sephoseꞌ.
Allempopaꞌ saꞌpothonchaꞌ neñoñ errapharen —Jerusaléño,
ñamha ora Judeo,
ñamha Samario,
ñamha ora allowanen pats.
Arrpaꞌ ateth perra Jesús allempo aꞌterr poeꞌntaño
9 Ñeñtha otwanenanetpaꞌ allempoñapaꞌ aꞌtenochayoꞌ enoneth.
Añña poeyochreshaꞌ pokwanrrorteñothetpaꞌ oꞌ maꞌnatena oso.
Oꞌwañ orrta,
amaꞌt mamesha.
10 Amaꞌt allempo oꞌwañ orrta Jesús,
ñetpaꞌ alloꞌ kowanrrortenet enoneth alleneth oꞌ chenkaꞌwanena Jesús.
Allempoñapaꞌ kowerrtset patsonethpaꞌ alla entet epsheña yakma oꞌ thomxhaꞌtoset eꞌñe parro.
Paꞌshtamoetpaꞌ nanakoꞌ wallamaꞌthareret.
11 Ñetñapaꞌ ateth otosanet:
—Eswañakaꞌ galileoꞌmarneshachaꞌ sekwanrrortenña enoneth.
Añ Jesús ñeñth oꞌ aꞌterr entopaꞌ werrerrchaꞌ poꞌpocheño ateth senteñ oꞌ awerr ento.
12 Allempoña oꞌ aꞌten Jesúspaꞌ añña poeyochreshaꞌpaꞌ oꞌ awanerret alla Jerusaléño.
Oꞌ onaxherret Olivophnoth alloth aꞌterr Jesús.
Tharroꞌmar ñeñth aspeneth Olivopenpaꞌ allameꞌttsoꞌtsena Jerusaléñoth,
Olivophnothpaꞌ ñatoꞌ alloꞌtsentheꞌ patherr kilómetro atthoch yexhap Jerusaléño.
13 Oꞌña xhaxherret anetso Jerusaléño all pokollo allekma aꞌpoenetpaꞌ oꞌ beꞌthosxhaꞌtwerret,
aꞌtapoet eno all tama aꞌyowen bhath.
Allñapaꞌ apxhet allowenet.
Ñeñth apxhatsa ñeñthpaꞌ añexhno:
Pedro,
ñamha Jacobo,
a ñamha Juan,
ñamha Andrés,
ñamha Felipe,
ñamha Tomás,
ñamha Bartolomé,
ñamha Mateo,
ñamha Jacobo ñeñth Alfeo poechemer,
ñamha Simón ñeñth cananistaneshaꞌ ñeñth atarr thorratseꞌth paꞌnetsrekop,
ñamha alloꞌtsen Judas ñeñth Jacobo paꞌmoꞌnasheñ.
14 Allña apxhenetpaꞌ eꞌñe ñeñtha neteꞌth poeyoxhro kowen ñoñets.
Allothpaꞌ eꞌñe pomaꞌyoxhreñothet kowenpaꞌ xhokma maꞌyocheteꞌth.
Alloꞌtsen ñamha koyaneshaxhno,
amaꞌt Jesús pachor María,
ñamha paꞌmoꞌnasheñneshaꞌ alloꞌtsenet ñamet.
Ateth pha Jesús poellsensarneshaꞌ allempo net Matías ñeñthchaꞌ epoet aꞌpothoñet Yompor poꞌñoñ
15 Parrochña Pedropaꞌ oꞌ thomos oꞌch serrpareꞌtatanet.
Allempopaꞌ ñatoꞌ alloꞌtsentheꞌ ciento veinte acheñeneshaꞌ.
Allempoñapaꞌ otanet:
16 —Oꞌch masheñneshachaꞌ notas:
Poꞌñoxh oꞌ etsotwa Yompor poꞌñoñ ñeñth anareth awathotheñ.
Tharroꞌmar Parets Poekamkëñoth eñoseꞌth David.
Amaꞌt awathpaꞌ oteꞌth David atethchaꞌ pha Judasoñ ñeñth anmoeꞌ ñeñth rromoeꞌ Jesús.
Ñewa,
pokteꞌñaxhoꞌ oꞌch etsota Yompor poꞌñoñ.
17 Judasoñpaꞌ awaña allempo alloꞌtseney eꞌñe parro ñapaꞌxhoꞌña akreñña Jesús oꞌch poeyochreshaꞌ peꞌ.
18-19 Ñewa,
Judasoñpaꞌ tsaꞌchet allpon kelle attho poman Jesús.
Tharraña ñeñth kellepaꞌ allo rañthet pats.
Tharraña allempo shoraꞌnom Judasoñ xhap patsopaꞌ potsaꞌnmos paꞌth,
oꞌ yoꞌpawa ora.
Allempoña eꞌmareꞌch allowen jerusaléñoꞌmarneshaꞌ attho Judasoñpaꞌ oꞌ rroma.
Añña pats ñeñth rañthet Judasoñ poꞌkhllayorothpaꞌ oꞌ sochet Acéldama.
Añ ñoñets ñeñth otenet Acéldama ya yeñoño yoteñ Errasatsotnanen.
20 Añña ñeñth kellkëꞌth awath David ñeñthpaꞌ anwarethta añ libro Salmos.
Añña ñeñth ateth oteney:
All yexhena,
poenasepaꞌch amarath,
all amach eseshayeꞌ yexhatstatso.
Ñeñth poꞌtarwas phaꞌ atthoch sherbhaneñ Yomporpaꞌ tharraña ñeñthpaꞌ apanepaꞌch poꞌpsheñeñ.
Ateth oten añ libro Salmos.
21-22 Alla oterraneterr Pedro:
—Ñeñthoꞌmar theꞌpaꞌ añ poktetsa oꞌch yeꞌñ poꞌpsheñeñ ñeñthchaꞌ parro yaꞌpotha attho Jesúspaꞌ oꞌ tanterra.
Oꞌch yeꞌner poesheñarr ñeñth xhokma parro yechopeñeꞌcheꞌth awaña allempo arroꞌtsenmeñ Yepartseshar Jesús.
Oꞌch yeꞌner poesheñarr ñeñth xhokma yokthayeꞌth amaꞌt allempotheñ Juanañpaꞌ apatapan Jesús tharrempowa allempo aꞌterr Jesús.
23 Allempoñapaꞌ oꞌ neñet epsheña,
poesheñarr añ paꞌsoꞌcheñ José Justo,
ñeñthara José oteñet ñamha Barsabás.
Poꞌpsheñeñpaꞌ añ paꞌsoꞌcheñ Matías.
24 Allempoñapaꞌ oꞌ maꞌyochet.
Poemaꞌyocheñothetpaꞌ ateth otet:
—Yompore,
ñeñtheph enteneꞌ alloweney yeyoxher,
theꞌpaꞌ oꞌch peñotatey erraꞌtsentheꞌ pemnen pha ñeñthchaꞌ ello alla sherberrets phokop ateth ñerraꞌm pellsensar.
25 Judasoñpaꞌ oꞌ saꞌnmoey oꞌ awoꞌ all ñeñth oꞌpatatarethtena ña eꞌñe ña poꞌchñaroth.
26 Allempoñapaꞌ yellsheñeꞌchet eꞌñe ñet poꞌswertoth atthoch eñochet erraꞌtsentheꞌ moenenña Yompor ñeñthchaꞌ alla sherberrayerr.
Allempoña yellsheñeꞌchenet aña orrtatsa Matías ñeñthepaꞌt moenenña Yompor.
Allempotheñ Matíaspaꞌ awoꞌ agëñ poꞌpoñexhno ñeñth xharrasheña poechetsa patherr ñeñth poellsensar Jesús.