COHUEN ÑOÑETS ÑEÑT̃ QUELLCAʼ
SAN LUCAS
Ñehua, añpaʼ ñeñt̃caʼyeña eʼñe paʼmot̃er penña serrparñats
1
1-4 Masheñe Teófilo,
p̃apaʼ peñoteñ ahuañmoʼchapaʼ paʼnamen esocmañen ñeñt̃ atet̃ etsotayeseʼt̃ Jesús acheñeneshesho ñeñt̃ eʼñe ñanom ameʼñaya ña,
amaʼt t̃emeʼttsen yocpaʼnaña ñeñt̃ey oʼ yameʼñera yam̃a.
Ñam̃a allempot̃eñ Jesúspaʼ orrtana paʼnamen acheñeneshaʼ ñeñt̃ entyesayeʼt̃ eʼñe allameʼtets.
Ñetñapaʼ eʼñe entuoñeteʼt̃ allohuen ñeñt̃ atet̃ p̃aʼyeseʼt̃.
Ñetñapaʼ serrpareʼtyeseteʼt̃ atet̃ oten Yompor poʼñoñ.
Att̃ot̃ña eñotaterryetña yam̃a.
Ñeñt̃ atet̃ eñotatyenet ñetpaʼ shonteʼ acheñeneshaʼ quellcaʼyesetañ ñeñt̃ atet̃ p̃osa Cristo allempo huapa.
Ñeñt̃oʼmarña napaʼc̈hoʼña eʼñe pocteʼ nenteñ oʼch nequellconap̃ eʼñe ora allpon ñeñt̃ atet̃ orrtatos Jesús,
t̃arroʼmar napaʼ ahuañmoʼchot̃eñ atarr noct̃apeʼcheñ oʼch eʼñe neñoch errot̃ent̃eʼña ñeñt̃ eʼñe poʼñoc̈h atet̃ p̃aʼyesosa Jesús.
Ñeñt̃oʼmarña t̃eʼ arrpaʼ oʼch eʼñe neñotatap̃ ora allpon ñeñt̃ oʼ etsotua allochñapaʼ att̃och eʼñe peñotuer p̃am̃a ñeñt̃ allpon yec̈hatenpetpaʼ ñeñt̃paʼ eʼñe poʼñoc̈h atet̃.
Ñehua,
arrpaʼ atet̃ oʼ etsotua.
El Comienzo
Ñehua, t̃eʼpaʼ oʼch neserrpareʼtatap̃ att̃o mellañot̃eñpaʼ eñotatanet oʼch eñalleta Juan ñeñt̃chaʼ apatañtatsa Yomporecop
5 Ahuat̃ allempo añ am̃chaʼtaret̃tatseʼt̃ Herodes all anetso Judeo,
eñall ñam̃a puesheñarr ñeñt̃ judioneshaʼ poʼcorneshar.
Ñeñt̃paʼ añ paʼsoʼcheñ Zacarías ñeñt̃ c̈hocma yemtenana poʼpotantañ cornaneshac̈hno ñeñt̃ otenet Abíasonaʼtar ñeñt̃ t̃orratseʼt̃ Yompor paʼpacllo.
Zacarías puet̃apor añ paʼsoʼcheñ Elisabet;
ñapaʼc̈hoʼña corneshap̃nor ñeñt̃ poʼm̃reneñ pen Aarón ñeñt̃ corneshatatseʼt̃ ahuat̃.
6 Ñetña epsheñoʼmaretpaʼ Yomporñapaʼ eʼñe pocteʼ entenanet ñeñt̃ atet̃ penet ñet,
eʼñe cohuen etsotueññañet ora poʼñoñ ñeñt̃ atet̃ anaret̃ ahuat̃ot̃eñ acheñeneshacop ñeñt̃chaʼ atet̃ p̃ohuenet.
Ñeñt̃oʼmarña amaʼt puesheñarrapaʼ amach errot̃enot̃ otaret̃teto,
“ama pocteyaye ñeñt̃ atet̃ sepena.”
7 Ñetpaʼ ama eñalleto amaʼt puesheñarra pacñeʼt̃er t̃arroʼmar Elisabetpaʼ ama achoyoreʼtañeyaye.
Amaʼt ñam̃a puerrollar epsheñoʼmaret oʼ att̃a poʼnmeʼtuenet.
8-9 Att̃eñapaʼ c̈hap allempo t̃orrena allohuen cornaneshac̈hno ñeñt̃ epuet parro yemtena Zacarías att̃o corneshatenet Yomporecop.
Ñehua,
allempopaʼ allohuen ñeñt̃ corneshatatseʼt̃ Yomporecop,
ñetñapaʼ añ yec̈heteʼt̃ ahuoʼch yellsheñeʼchenet allohuenet att̃och eñochet poʼsuertot̃ erraʼtsenchaʼ puesheñarrer ñeñt̃chaʼ beʼt̃osets Yompor paʼpacllo allchaʼ aʼcrratan ñeñt̃chaʼ eñmosat̃tatsa Yomporecop.
Allempoña pamt̃arrpaʼ aña orrtatsa Zacarías ñeñt̃chaʼ beʼt̃osets Yompor paʼpacllo allchaʼ aʼcrratan ñeñt̃chaʼ eñmosat̃tatsa Yomporecop.
10 Ñehua,
allempo c̈hap allempoch beʼt̃osos puesheñarr Yompor paʼpacllo shonteʼ acheñeneshaʼ ñetñapaʼ allach t̃omc̈haʼtet aʼyot̃ allchaʼ maʼyochrraʼtoset.
Amaʼt allempo beʼt̃osos Zacaríaspaʼ att̃erach maʼyochrraʼtet aʼyot̃.
11 Ñehua,
Zacarías allempo sherbenan Yompor oʼpono,
allñapaʼ machayot̃epaʼtchaʼ orrtoña Yompor poʼm̃llañot̃eñer.
Arr t̃omos altar poʼcohuenrot̃,
ñeñt̃ altarpaʼ allecma aʼcrratenet ñeñt̃ eñmosat̃tetsa Yomporecop,
ñeñt̃paʼ att̃o sherbeteʼt̃ Yompor.
12 Allempo orrtoña mellañot̃eñ,
Zacaríasñapaʼ atarr yoren,
atarr nanac mechaʼch.
13 Mellañot̃eññapaʼ atet̃ otosan Zacarías:
—Zacarías,
amach peyorenatsto t̃arroʼmar Yomporpaʼ eʼmuennap̃ ñeñt̃ atet̃ penamueñ pemaʼyocheñot̃.
Ñeñt̃oʼmarña t̃eʼ pet̃apor Elisabetpaʼ eñalletaterranchaʼ pat̃err asheñorr ñeñt̃ eʼñe p̃o pechemer,
ñeñt̃ñapaʼ pesochchaʼ Juan.
14 P̃apaʼ atarrchaʼ p̃ocshena nanac.
Shonteʼch acheñeneshaʼ ñeñt̃chaʼ nanac p̃ocshapretaya att̃o oʼ eñalleta pechemer.
15 Ñapaʼ atarrchaʼ asherben enteñ Yompor.
Ñapaʼ amach orrarñat̃eyaye,
amaʼt vinosapaʼ amach orreñe.
Amaʼt ñam̃a paʼnamen ñeñt̃ aposaʼtpotetsapaʼ amach orreñe amaʼt mamesha.
Ñapaʼ eʼñech aña chorraya Parets Puecamquëñ.
Amaʼt allempot̃eñ pachor paʼt̃oʼtsen ñapaʼ eʼñech chorreña Parets Puecamquëñ.
16 Allempoña mellañot̃eñpaʼ alla otererr:
—Ñapaʼ cohuenchaʼ cot̃apeʼchaterran shonteʼ israelenaʼtarneshaʼ allochñapaʼ att̃och cot̃apeʼcherret eʼñe cohuen Yomporecop ñeñt̃chaʼ Poʼpartseshar perret.
17 Ñeñt̃ña Juanpaʼ ñeñt̃chaʼña ñanom orrtatsa Yomporecop.
Ñapaʼ añchaʼ ahuamencat̃ peneʼ Yompor Puecamquëñ atet̃ peʼt̃ ahuat̃ Elías ñeñt̃ aʼm̃tayeʼt̃ Yompor poʼñoñ.
Allochñapaʼ att̃och eʼñe cohuen amoʼtstaterrana achemeret̃ec̈hno puechemereshaʼ.
Allochñapaʼ amaʼt ñeñt̃ at̃pareʼtetsapaʼ oʼch ameʼñaterranet ñeñt̃ eʼñe pocteʼ es pets.
Att̃ochña cot̃apeʼchaterranet cohuen,
allochñapaʼ att̃och agapueret Partseshaʼ ñerraʼm esempoch orrta.
18 Zacaríasñapaʼ ahuoʼ aʼp̃t̃oʼtan mellañot̃eñ,
ahuoʼ och:
—Taʼ,
¿errot̃enochña neñoch eʼñet̃eʼ poʼñoc̈h oʼch eñalleta cheshat̃oll?
T̃arroʼmar napaʼ oʼ nepoʼnmeʼten;
net̃aporpaʼc̈hoʼña eʼñe att̃ecmay oʼ atarr yepoʼnmeʼtuen.
19 Mellañot̃eññapaʼ alla otererr:
—Napaʼ ñeñt̃en Gabrieletets ñeñt̃en sherbeneʼ Yompor.
Napaʼ ña nellsenseneʼ att̃och neʼñoranaʼtap̃a oʼch neñotatap̃ añ cohuen ñoñets.
20 T̃arraña p̃apaʼ ama p̃ameʼñenno ñeñt̃ atet̃ notenep̃,
ñeñt̃oʼmarña t̃eʼ p̃apaʼ oʼch p̃oʼpanat,
amach eshec peʼñorerro t̃ayot̃eñ t̃arrempohuach allempoch eñalleta pechemer,
allempochña peʼñorerra.
T̃arroʼmar poʼñoc̈h etsoterrach ñeñt̃ atet̃ oʼ notuap̃ oʼch c̈hap allempo onañcharet̃.
Arrpaʼ allohua ñeñt̃ atet̃ ot mellañot̃eñ.
21 Att̃oʼ ellapes Zacarías oʼponopaʼ acheñeneshaʼñapaʼ cohueñet aʼyot̃ ama c̈haʼnerro.
Att̃oʼ cohueñetpaʼ otannaʼtet:
—¿Esoʼmart̃eʼ amoʼ c̈haʼnerroña Yompor paʼpacllot̃?
22 Allempoña c̈haʼnerrpaʼ ama eshcayeʼ eñoranaʼtuerraneto.
Ñetñapaʼ otyenet pueyoc̈hreto,
ñatoʼ c̈hot̃eʼ es orrtoya Yomporecop ñeñt̃oʼmart̃eʼña atarr ellapes oʼpono Yompor paʼpacllo.
Ñañapaʼ ama eshcayeʼ eñoranaʼtuerraneto,
potot̃a eñotatuerranet ñeñt̃ atet̃ ent Yompor paʼpacllo.
23 Allempoña oʼ c̈hap allponmat ñeñt̃ att̃o sherbenet Yompor paʼpacllo,
Zacaríasñapaʼ oʼ ahuerr paʼpacllo.
24 Eʼñe allponmatatsapaʼ oʼ ac̈homenta puet̃apor.
Allempot̃eñña Elisabetpaʼ ama mueno oʼch orrterra acheñeneshesho.
Amaʼt oʼ amnarm̃a arrorrpaʼ ñañapaʼ ama orrteno.
Ñañapaʼ atet̃ oten:
25 —T̃eʼñapaʼ atarr cohuen mueraʼna Yepapar,
allochñapaʼ oʼhuañchaʼ alloʼna pencnaʼntatnennet t̃arroʼmar napaʼ otyennet muec̈hopenoʼ.
Att̃o mellañot̃eñpaʼ eñotatanet oʼch eñalleta Jesús
26 Allempoña oʼ pechapm̃a arrorr ac̈homenta Elisabet,
Yomporñapaʼ oʼ alla mueñerranerr poʼm̃llañot̃eñer ñeñt̃ara Gabriel.
Arr mueñe anetso Nazareto ñeñt̃ara Galilea.
Un ángel anuncia el nacimiento de Jesús (Lucas 1.26-38)
27 Allempoña c̈hap Nazareto,
allñapaʼ orrtosana puesheñarr shopsheshaʼ ñeñt̃ ama aʼp̃llaret̃eyaye.
Ñehua,
ñeñt̃ shopsheshaʼpaʼ añ oʼpatenaya yacma ñeñt̃paʼ añ paʼsoʼcheñ José,
ñoʼch yoreʼ.
Ñeñt̃ña shopsheshaʼ arrot̃ eñalletña David poʼm̃renñot̃;
ñeñt̃paʼ añ paʼsoʼcheñ María.
28 Mellañot̃eñña allempo c̈hap eʼñe ñeshopaʼ atet̃ otos:
—Oʼch noc̈ha nehuom̃chaʼtosep̃.
Yompor eʼñe puemuereñot̃ep̃ p̃apaʼ atarrchaʼ coshaterrep̃,
ñapaʼ eʼñe peshoʼtsen.
Yomporpaʼ atarr bensareʼtam̃penep̃.
Ello pem̃tanaʼtueñ allohuen p̃acmaneshaʼ att̃o bensareʼtam̃penanet ñet.
29 Allempo eʼman atet̃ och mellañot̃eñ,
ñañapaʼ c̈ha moññeʼtacha,
c̈ha cot̃apeʼch pueyoc̈hro:
—Taʼ,
¿est̃eʼ otenenña ñeñt̃ atet̃ huom̃chaʼtenen?
30 Mellañot̃eññapaʼ alla otererr:
—María,
amach pem̃chaʼtatsto,
Yomporpaʼ atarr oʼ morrenterrp̃a.
31 T̃eʼpaʼ p̃ac̈homentach,
pechyoreʼtchaʼ ñeñt̃paʼ asheñorrchaʼ.
Ñeñt̃ñapaʼ pesochchaʼ JESÚS.
32 Ñeñt̃chaʼ nanac am̃chaʼtaret̃tatsa.
Otyesetchaʼ ñapaʼ ña Ñeñt̃ Nanac Parets Puechemer.
Pomporña ñeñt̃ara Paretspaʼ ñachña neʼ am̃chaʼtaret̃ atet̃ am̃chaʼtaret̃teʼt̃ paʼtañ David.
33 Att̃eña ñapaʼ am̃chaʼtaret̃tach Jacob poʼm̃renñecop ñeñt̃ara israelneshaʼ.
Amaʼt errponañapaʼ amach huañerro ñeñt̃ att̃o am̃chaʼtaret̃tena ña.
34 Maríañapaʼ atet̃ otapan mellañot̃eñ:
—Taʼm ¿errot̃enot̃chaʼña nechyoreʼtña?
Napaʼ amaʼt puesheñarra encaneshaʼ amarramtso yorennaʼ.
35 Mellañoteññapaʼ alla otererr:
—Paretschaʼcaʼye Puecamquëñ pec̈hapoya.
Ñeñt̃ Nanac Parets poʼhuamencpaʼ aʼpomam̃p̃sosep̃chaʼ atet̃ ñerraʼmrrat̃eʼ os p̃aʼpomam̃peneʼ.
Ñeñt̃oʼmarña cheshat̃oll ñeñt̃chaʼ peʼñalletatpaʼ ñapaʼ añach eʼñe maʼyoc̈hrosa ñeñt̃ atet̃ muenen Parets.
Otyesetchaʼ ñapaʼ ña eʼñe Yompor Puechemer.
36 Ñam̃a Elisabetña ñeñt̃ p̃amoʼts pepen,
ñapaʼc̈hoʼña oʼ t̃otana asheñorrot̃oll,
amaʼt oʼ poʼnmeʼten.
Ñam̃a amaʼt oteñet muec̈hop̃paʼ t̃eʼñapaʼ oʼ pechapm̃a arrorr oʼ ac̈homenta.
37 T̃arroʼmar Yomporpaʼ ama eñalle ñocop ñeñt̃ atarr t̃orrapoʼ enten.
38 Allempoña Maríapaʼ alla oterranerr mellañot̃eñ:
—Ñehua,
napaʼ eʼñe pocteʼ nenteñ oʼch nesherber Yepapar ñeñt̃ Nepartseshar nepen.
Ñeñt̃paʼ att̃etepaʼch nocop ñeñt̃ atet̃ p̃otenen.
Allempoña mellañot̃eñpaʼ oʼ ahuerr.
Att̃o Maríapaʼ emoʼtenanaʼ Elisabet ñeñt̃ eʼñe pamoʼts pen
39-40 Maríañapaʼ allent̃a ahuoʼ pomaʼyorñecma oʼch emoʼtenanaʼ Elisabet.
All yec̈henapaʼ all shonteʼ aspent̃arer allara Judeo.
Allempoña c̈hap anetso all sechenapaʼ beʼt̃osos Zacarías paʼpacllo,
huom̃chaʼtosan Elisabet.
41 Ñañapaʼ allempo eʼmapan María ñeñt̃ atet̃ huom̃chaʼtospaʼ pueʼmaret̃ollña ñeñt̃ paʼt̃oʼtsenpaʼ allent̃epaʼtchaʼ pella.
Pachorñapaʼ eʼñe chorreña Parets Puecamquëñ.
42 Ñeñt̃ña eñorateneʼ,
pocsheñeshocmañen eñorena huomencpaʼ atet̃ otapan María:
—P̃apaʼ oʼ atarr coshaterrep̃ Yepapar.
P̃apaʼ oʼ eʼñe pem̃tanaʼtue ora allohuen yacmaneshac̈hno att̃o coshatenanet ñet Yepapar.
Ñam̃a Yepaparpaʼ atarrchaʼ bensareʼtam̃pennap̃ pechoyoret̃oll.
43 Amaʼt na Yepaparpaʼ atarr coshatenen att̃o pemoʼtenen amaʼt ñeñt̃ep̃ pachor pen ñeñt̃chaʼ Yepartseshar yeperr.
44 T̃arroʼmar eʼñe allempocma neʼmaponap̃ peñoñ atet̃ pehuom̃chaʼtosen,
neʼmaret̃ollpaʼ eʼñe pocsheñeshot̃paʼ allent̃epaʼtchaʼ pella nat̃o.
45 P̃aña t̃eʼpaʼ atarr cosheñtsoʼtsenep̃ t̃arroʼmar p̃apaʼ eʼñe p̃ameʼñaʼhuoña ñeñt̃ atet̃ otuenp̃aʼ Yepapar.
Ñeñt̃oʼmarña ñeñt̃paʼ eʼñech atet̃ etsoterra p̃ocop.
46 Maríañapaʼ alla otererr:
—T̃eʼñapaʼ eʼñech neyoc̈hrocmañen naʼyeʼchoc̈htatoñ Yepapar.
47 Necamquëñohuen atarr nocsheña Yepapar ñeñt̃ Yaʼqueshp̃atañer yepen.
48 Yepapar eʼñe puemuereñot̃en ñapaʼ entenen ama esoyayno,
añana ñeñt̃en t̃orretsa ñocop.
T̃arraña t̃eʼpaʼ allohuen acheñeneshaʼ ñeñt̃chaʼ mererrtsa arr patsro ñetñapaʼ atarrchaʼ coshapreterrnet att̃o Yepaparpaʼ oʼ atarr coshaterren na.
49 T̃arroʼmar ñapaʼ ñeñt̃ atarr ahuamencat̃tetsa att̃oña oʼ orrtaton ñeñt̃ nanac sherbets,
ñeñt̃ara Yepapar ñeñt̃ otenet Ñeñt̃ atarr nanac Parets.
50 Allohuen ñeñt̃ am̃chaʼnaʼtpoʼ enteneʼ Yepapar,
ñañapaʼ c̈hocmach atarr muererranet amaʼt t̃ayot̃eñ errponañohuen amaʼt allpon allohuen acheñeneshaʼ ñeñt̃chaʼ mererrtsa arr patsro.
51 Ñam̃a ñapaʼ eʼñe etsotuenan amaʼt ñeñt̃ atarr nanac echarr entyenet,
ñam̃a allpon allohuen acheñ ñeñt̃ atarr asherben entyetsa,
ñañapaʼ eʼñech pomnaren p̃ohuerranet.
52 Ñam̃a ñeñt̃ atarr ahuamencat̃ entyetsa ñañapaʼ eʼñech aʼsuatanrrortatuerranet allot̃ am̃chaʼtaret̃tenet.
T̃arraña ñeñt̃ ama esosheʼmayeʼ entyetsopaʼ ñetñapaʼ Yepaparchaʼ nohuerrahuet att̃ot̃chaʼ am̃chaʼnaʼtpoʼ enter allohuen acheñeneshaʼ.
53 Ñam̃a ñeñt̃ nanac es palltaʼyetsa,
ñetñapaʼ Yepaparchaʼ esocmañen aphuerrahuet.
T̃arraña ñeñt̃ atarr esocmaneñ es echyets,
ñetñapaʼ Yepaparchaʼ puerratam̃pesuerrahuet,
amach es anerreto amaʼt coñeʼt̃a.
54-55 Yepaparpaʼ añach c̈hocma yenpuen israelenaʼtar ñeñt̃ pueyochreshaʼ pen ña.
Amach pueserrano ñeñt̃ atet̃ otaneʼt̃ ahuat̃ yamoʼmtayñeneshañ ñeñt̃chaʼ atet̃ perranet ñam̃a allohuen ñeñt̃chaʼ poʼm̃reneñ perret.
Eʼñe atet̃ otaneʼt̃ ahuat̃ Abraham poʼm̃renñecop.
Att̃och c̈hocma muerenanet amaʼt errponohuañen.
Arrpaʼ allohua ñeñt̃ atet̃ ac̈hotan María Yompor.
56 Allempoñapaʼ ñatoʼ maʼpm̃at̃eʼ arrorr alla aʼpa Elisabetesho.
Allot̃ña Maríapaʼ ahuerr paʼpacllo.
Arrpaʼ att̃o eñalleta Juan ñeñt̃ apatañtatseʼt̃ Yomporecop
57 Allempoña c̈hap allempoch emareʼten Elisabet.
Ñeñt̃ña pueʼmarpaʼ asheñorrot̃oll.
58 Allohuen acheñeneshaʼ ñeñt̃ yec̈hetsa all ñesho ñam̃a allohuen pamoʼtseshaʼ ñetñapaʼ eʼñe coshaprechet.
T̃arroʼmar eñoteñet Yomporpaʼ oʼ orrtatoñ att̃o ñapaʼ atarr muereña.
59 Allempoña oʼ posocmataʼmuen ñeñt̃ña asheñorrot̃ollpaʼ oʼ tsorrat̃olleʼtaʼmueñet t̃arroʼmar ñetpaʼ atet̃caʼye yec̈henet ñeñt̃et judioneshet.
a Allempopaʼ añ sochetañ Zacarías oʼch anmatoñetañ pompor paʼsoʼcheñ.
60 T̃arraña pachorpaʼ otanet:
—Napaʼ ama nemno oʼch sesochon neʼmar Zacarías.
Napaʼ añchaʼ nesoch Juan.
61 Allempoña acheñeneshaʼpaʼ atet̃ ochet:
—¿Esoʼmareʼt pemneñña oʼch pesoch Juan t̃arroʼmar amaʼt puesheñarra p̃amoʼtspaʼ ama eñalle ñeñt̃ sochetsa Juan?
62 Allempoña acheñeneshaʼpaʼ eʼñe potot̃eta aʼp̃t̃oʼtoñet emat̃oll pompor eschaʼ sochanña puechemeret̃oll.
63 Ñapaʼc̈hoʼña potot̃a eñotatan acheñeneshaʼ oʼch apet quellcatets allchaʼ quellcan ñeñt̃chaʼ sochan puechemeret̃oll.
Allempoñapaʼ apet quellcatets,
allñapaʼ atet̃ quellcaʼ:
“Añchaʼ yesoch Juan.”
Acheñeneshaʼñapaʼ att̃a cohuanrrorchet.
64 Eʼñe allempocma Zacaríasñapaʼ allent̃a eñorerra.
Allorocma ayeʼchoc̈htaterran Yompor.
65 Acheñeneshaʼña ñeñt̃ yec̈hetsa allpaʼ allohuenet atarr mechaʼnaʼteñet Yompor.
Ñetñapaʼ serrpareʼtatannaʼtyeset all aspent̃arero Judeo.
66 Ñam̃a amaʼt allohuen ñeñt̃ eʼmareʼtyeseʼ ñetñapaʼ cot̃apeʼchyeset pueyoc̈hreto,
atet̃ otyenet:
—Añ cheshat̃ollpaʼ poʼñoc̈hchaʼ atarr sherberran Yompor tsapat̃onet̃.
T̃arroʼmar Yomporpaʼ atarr muereña.
Att̃o Zacarías atarr ac̈hotenan Yompor Parets
67 Cheshat̃ollña pompor ñeñt̃ Zacaríaspaʼ añ chorrenaya Parets Puecamquëñ ñeñt̃ña eñoraterreʼ Yomporecop ñeñt̃chaʼ atet̃ perra amaʼt esempo.
Ñeñt̃paʼ atet̃ ot Zacarías:
68 —Ayeʼchoc̈htaterrapoʼch Yompor,
ñeñt̃ara ñeñt̃ Poʼpartseshar pen allohuen israelneshaʼ,
t̃arroʼmar t̃eʼñapaʼ oʼ orrtaterrnay puemuereña ñeñt̃chaʼ yaʼqueshp̃aterreʼ ñeñt̃ey puechemer pen.
69 Ñapaʼ oʼ orrtatonay ñeñt̃chaʼ aʼqueshp̃atañterrtsa ñeñt̃ atarr ahuamencat̃eshaʼ ñeñt̃ara ñeñt̃chaʼ eñalletatsa David poʼm̃renñot̃,
ñeñt̃ara David ñeñt̃ atarr sherb̃ayeʼt̃ ahuat̃ Yompor.
70 Ñeñt̃paʼ ahuat̃ot̃eñ atet̃ eñoratyesaneʼt̃ ñeñt̃ aʼm̃taʼyesayeʼt̃ poʼñoñ,
amaʼt allohuen ñeñt̃ eʼñe maʼyoc̈hraʼyestseʼt̃ Partsocop.
71 Amaʼt ñam̃a allohuen allpon ñeñt̃ yeʼmoñeʼteneʼ ñeñt̃ am̃chaʼnoc̈hetyetsa yocop,
ñachña yaʼrroyataterreʼ.
72 Att̃ochña etsotaterrnay ñeñt̃ atet̃ otaneʼt̃ ahuat̃ yatañneshañ ñeñt̃chaʼ att̃o c̈hocma muererrya.
Att̃eña ñapaʼ amach pueserrano ñeñt̃ atet̃ aʼpoctat ahuat̃ot̃eñ yocop t̃arroʼmar ñeñt̃paʼ eʼñe Partseshot̃ aʼpoctataret̃ta.
73 Ñehua,
añpaʼ atet̃ p̃a allempo Yomporpaʼ ahuat̃ otan yatañ Abraham ñeñt̃chaʼ atet̃ perrnay eʼñe poʼñoc̈h.
74 Ñeñt̃paʼ atet̃ oteʼt̃ Yompor yocop amaʼt ñeñt̃ allpon ñeñt̃ yeʼmoñeʼteneʼ ñeñt̃ am̃chaʼnoc̈hen yentyen ya,
ñañapaʼ ñach yaʼrroyataterreʼ.
Allochña yapaʼ oʼhuañchaʼ yem̃chaʼnañot̃ yesherber Yompor.
75 Att̃och yetsotoñ ñeñt̃ eʼñe pocteʼ enten Parets allochñapaʼ att̃ochña pocteʼ enteney ñam̃a acheñeneshaʼ att̃o eʼñe cohuen es yep̃aʼyen eʼñech t̃arrempohua esempohuach yocrrena arr patsro.
76 T̃eʼpaʼ oʼch nechemeret̃olle notap̃:
P̃apaʼ oterrpetchaʼ ñeñt̃ep̃oʼ ñeñt̃chaʼ eñoranaʼtena ñeñt̃ nanac Parets.
T̃arroʼmar p̃apaʼ p̃anomchaʼ orrtatsa att̃och p̃aʼcohuentatyesoñ allchaʼ oñmos Partseshaʼ.
77 Ñeñt̃paʼ att̃och p̃oct̃apeʼchater acheñeneshaʼ eʼñe cohuen allochña ñetpaʼ eshecchaʼ ap̃retnaret̃terret poʼchñaret att̃och aʼqueshp̃ataret̃terret.
78 T̃eʼpaʼ c̈hapchaʼ allempoch Yompor eʼñe puemuereñot̃ey c̈hapaterrnaychaʼ ñeñt̃ huetsa entot̃ ñeñt̃chaʼ yoct̃apeʼchaterreʼ eʼñe cohuen,
ñeñt̃ña cot̃ap̃ñatserpaʼ ñeñt̃chaʼ yaʼpuetarsam̃perreʼ.
79 Att̃ochña aʼpuetarsam̃p̃saret̃terra allohuen acheñeneshaʼ ñeñt̃ checmetoʼtsaʼyeneta,
ñeñt̃ ama eñotenaye Yompor,
ñetñapaʼ aña oʼpatenahuet rromueñets ñeñt̃ara coñcheñets.
Ñeñt̃ att̃o aʼpuetarsam̃p̃saret̃ey ñeñt̃chaʼña yeñotateneʼ att̃och eʼñe cohuen yocsheñeshocmañen yeyc̈hena arr patsro.
Arrpaʼ allohua huañ att̃o Zacaríaspaʼ ac̈hotenan Yompor eʼñe pocsheñeshocmañen.
80 Añña cheshat̃oll Juanpaʼ alloʼna sen atarretnomtsa.
Puecamquëñot̃paʼ atarr ahuamencat̃etnena.
Ñañapaʼ alla yec̈hena allap̃ar amayo t̃arrempohua allempo orrta israelenaʼtarneshesho.